ടൊറൻ്റോ: സൗത്തേൺ ഒന്റാരിയോയിലും ടൊറന്റോ, ഗ്രേറ്റർ ടൊറന്റോ (GTA) പ്രദേശങ്ങളിലും ബുധനാഴ്ച ഉച്ചയ്ക്ക് ശേഷം ശക്തമായ ഇടിമിന്നലോടുകൂടിയ മഴയ്ക്കും കൊടുങ്കാറ്റിനും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. ബുധനാഴ്ച രാവിലെ കിഴക്കൻ പ്രദേശങ്ങളിൽ നേരിയ മഴ പെയ്തിരുന്നെങ്കിലും വൈകുന്നേരത്തോടെ തണുത്ത അന്തരീക്ഷം എത്തുന്നതാണ് കാലാവസ്ഥ മാറ്റത്തിന് കാരണം. ചുഴലിക്കാറ്റിനും സാധ്യതയുള്ളതിനാൽ പ്രാദേശിക സമയം ഉച്ചയ്ക്ക് 3:30 മുതൽ രാത്രി 8:00 മണി വരെയുള്ള സമയങ്ങളിൽ ജനങ്ങൾ ജാഗ്രത പാലിക്കണമെന്ന് കാലാവസ്ഥാ വിദഗ്ധർ നിർദ്ദേശിച്ചു.
കാലാവസ്ഥ മാറ്റം
ബുധനാഴ്ച നഗരത്തിൽ ഉയർന്ന താപനില 28 ഡിഗ്രി സെൽഷ്യസ് വരെ ഉയരുമെങ്കിലും അന്തരീക്ഷത്തിലെ ഉയർന്ന ഈർപ്പം കാരണം 36 ഡിഗ്രി സെൽഷ്യസ് ചൂട് അനുഭവപ്പെടും. എന്നാൽ വ്യാഴാഴ്ചയോടെ താപനില 27 ഡിഗ്രിയായി കുറയുകയും കാലാവസ്ഥ തെളിയുകയും ചെയ്യും. വെള്ളി, ശനി, ഞായർ ദിവസങ്ങളിൽ നഗരത്തിൽ സുഖകരമായ കാലാവസ്ഥയായിരിക്കും അനുഭവപ്പെടുകയെന്നും വ്യാഴാഴ്ച തെക്കുപടിഞ്ഞാറൻ ഒന്റാരിയോയിൽ ചിലയിടങ്ങളിൽ മാത്രം നേരിയ മഴയ്ക്ക് സാധ്യതയുണ്ടെന്നും പ്രവചനത്തിലുണ്ട്.
Also Read: ഒന്റാറിയോയിലെ പുതിയ ജാമ്യ നിയമത്തിന് സ്റ്റേ; ഫോർഡ് സർക്കാരിന് കോടതിയുടെ തിരിച്ചടി
സജ്ജീകരണങ്ങളുമായി നഗരസഭ
മഴ ശക്തമാകുമെന്ന മുന്നറിയിപ്പിനെ തുടർന്ന് മുൻകരുതലായി ടൊറന്റോയിൽ എമർജൻസി ഓപ്പറേഷൻസ് സെന്റർ പ്രവർത്തനം ആരംഭിച്ചതായി മേയർ ഒലിവിയ ചൗ അറിയിച്ചു. ഗതാഗത വിഭാഗം, അടിയന്തര സേവനങ്ങൾ, ടി.ടി.സി (TTC), ഷെൽട്ടർ സേവനങ്ങൾ എന്നിവ ഏകോപിപ്പിച്ച് സ്ഥിതിഗതികൾ നിരീക്ഷിച്ചു വരികയാണ്. നഗരവാസികളുടെ സുരക്ഷ ഉറപ്പാക്കാൻ വ്യക്തമായ പദ്ധതികൾ തയ്യാറാക്കിയിട്ടുണ്ടെന്നും അടിയന്തര സാഹചര്യങ്ങളിൽ 911 എന്ന നമ്പറിൽ ബന്ധപ്പെടണമെന്നും മേയർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
Possibility of heavy rain and tornadoes in Ontario; weather agency issues alert.
