നോർത്ത് വെസ്റ്റ് ടെറിട്ടറി ഇമിഗ്രേഷൻ നയങ്ങളിൽ വൻ മാറ്റം; പുതിയ സെലക്ഷൻ രീതിയും അപേക്ഷാ തീയതിയും പ്രഖ്യാപിച്ചു

കാനഡയിലെ നോർത്ത് വെസ്റ്റ് ടെറിട്ടറി (NWT) 2026-ലേക്കുള്ള ഇമിഗ്രേഷൻ നാമനിർദ്ദേശങ്ങളുടെ എണ്ണവും അപേക്ഷാ രീതിയിലെ പുതിയ മാറ്റങ്ങളും ഔദ്യോഗികമായി പ്രഖ്യാപിച്ചു. ഫെഡറൽ സർക്കാരിൽ നിന്ന് ഈ വർഷം 197 നോമിനേഷൻ ഒഴിവുകളാണ് പ്രവിശ്യയ്ക്ക് അനുവദിച്ചിരിക്കുന്നത്. കഴിഞ്ഞ വർഷത്തെ അതേ എണ്ണം തന്നെ ഈ വർഷവും നിലനിർത്തിയിരിക്കുകയാണ്. പുതിയ തീരുമാനപ്രകാരം പ്രവിശ്യാ കുടിയേറ്റ പദ്ധതിയായ എൻടിഎൻപി (NTNP), അപേക്ഷകരെ തിരഞ്ഞെടുക്കുന്നതിനായി ‘എക്സ്പ്രഷൻ ഓഫ് ഇൻട്രസ്റ്റ്’ (EOI) എന്ന പുതിയ മോഡൽ അവതരിപ്പിച്ചു. 2026 മാർച്ച് 9-ന് രാവിലെ 9 മണി മുതൽ (MST) പുതിയ അപേക്ഷകൾ സ്വീകരിച്ചു തുടങ്ങും.

തൊഴിലുടമകൾ വഴി അപേക്ഷിക്കുന്ന ‘എംപ്ലോയർ ഡ്രിവൺ സ്ട്രീമിനാണ്’ പുതിയ ഇ.ഒ.ഐ (EOI) രീതി ബാധകമാകുന്നത്. എൻട്രി ലെവൽ/സെമി സ്കിൽഡ്, സ്കിൽഡ് വർക്കർ, എൻ.ഡബ്ല്യു.ടി എക്സ്പ്രസ് എൻട്രി എന്നീ മൂന്ന് വിഭാഗങ്ങൾ ഇതിൽ ഉൾപ്പെടുന്നു. ഈ പുതിയ രീതി പ്രകാരം തൊഴിലുടമ ആദ്യം ഓൺലൈൻ അക്കൗണ്ട് രജിസ്റ്റർ ചെയ്യുകയും തുടർന്ന് ഉദ്യോഗാർത്ഥി ഒരു സർവേയിലൂടെ സ്വന്തം പ്രൊഫൈൽ തയ്യാറാക്കി പൂളിൽ സമർപ്പിക്കുകയും വേണം. അപേക്ഷകരുടെ പ്രവൃത്തിപരിചയം, ഭാഷാ പ്രാവീണ്യം, പ്രവിശ്യയുമായുള്ള ബന്ധം, തൊഴിൽ വിപണിയിലെ ആവശ്യം എന്നിവ കണക്കിലെടുത്ത് പോയിന്റുകൾ നൽകും. ഉയർന്ന പോയിന്റ് ലഭിക്കുന്നവരെയാണ് കുടിയേറ്റത്തിനായി തിരഞ്ഞെടുക്കുക. ഇതിൽ നോർത്ത് വെസ്റ്റ് ടെറിട്ടറിയിലെ തൊഴിൽ വിപണിയുമായുള്ള ബന്ധത്തിനാണ് ഏറ്റവും കൂടുതൽ പോയിന്റ് (340) അനുവദിച്ചിരിക്കുന്നത്.

അതേസമയം ഫ്രഞ്ച് ഭാഷാ സ്ട്രീമും ബിസിനസ് സ്ട്രീമും പഴയതുപോലെ തന്നെ ‘ആദ്യം അപേക്ഷിക്കുന്നവർക്ക് ആദ്യം’ (First-come, first-served) എന്ന രീതിയിൽ തുടരും. 2025 സെപ്റ്റംബറിൽ നടത്തിയ പൊതുജനാഭിപ്രായ രൂപീകരണത്തിന് ശേഷമാണ് ഇത്തരമൊരു മാറ്റം കൊണ്ടുവരാൻ സർക്കാർ തീരുമാനിച്ചത്. കൂടുതൽ സുതാര്യത ഉറപ്പാക്കാനും പ്രവിശ്യയുടെ സാമ്പത്തിക വളർച്ചയ്ക്ക് ആവശ്യമായ കഴിവുള്ള തൊഴിലാളികളെ കൃത്യമായി കണ്ടെത്താനും പുതിയ രീതി സഹായിക്കുമെന്ന് വിദ്യാഭ്യാസ-തൊഴിൽ മന്ത്രി കെയ്റ്റ്‌ലിൻ ക്ലീവ്‌ലാൻഡ് വ്യക്തമാക്കി.

മാർച്ച് 25-നാണ് ആദ്യത്തെ ഇ.ഒ.ഐ നറുക്കെടുപ്പ് നടക്കുക. ആദ്യഘട്ടത്തിൽ യോഗ്യരായ 65 പേർക്ക് അപേക്ഷിക്കാനുള്ള ക്ഷണം (ITA) നൽകാനാണ് അധികൃതർ ലക്ഷ്യമിടുന്നത്. ഈ വർഷം ഉടനീളം ഇത്തരത്തിൽ നിരവധി നറുക്കെടുപ്പുകൾ നടക്കും. നോർത്ത് വെസ്റ്റ് ടെറിട്ടറിയിലെ ഈ പുതിയ നിയമങ്ങൾ കുടിയേറ്റക്കാർക്ക് പ്രവിശ്യയിൽ വേരുകളുറപ്പിക്കാനും അവിടുത്തെ സാമൂഹിക സാമ്പത്തിക ജീവിതത്തിന്റെ ഭാഗമാകാനും കൂടുതൽ അവസരമൊരുക്കും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

NWT Nominee Program announces nomination allocation for 2026, introduces EOI selection model