ഇനി ക്ലോക്ക് തിരിച്ചു വയ്ക്കേണ്ട; നിർണായക തീരുമാനവുമായി നോർത്ത്‌വെസ്റ്റ് ടെറിറ്ററീസ്

യെല്ലോനൈഫ്: നോർത്ത്‌വെസ്റ്റ് ടെറിറ്ററീസ് (N.W.T.) സർക്കാർ വർഷം തോറുമുള്ള സീസണൽ സമയമാറ്റം ഔദ്യോഗികമായി അവസാനിപ്പിച്ചു. ഇനി മുതൽ “നോർത്ത്‌വെസ്റ്റ് ടെറിറ്ററീസ് ടൈം” എന്ന പേരിലുള്ള സ്ഥിരമായ സമയ സംവിധാനമായിരിക്കും പ്രദേശത്ത് വർഷം മുഴുവൻ പ്രാബല്യത്തിലുണ്ടാവുക. സാധാരണക്കാരായ ജനങ്ങളുടെ ദൈനംദിന ജീവിതത്തിൽ കൂടുതൽ സ്ഥിരത കൊണ്ടുവരാനാണ് സർക്കാർ ഈ പ്രധാന മാറ്റം വരുത്തിയിരിക്കുന്നത്.

ഈ പുതിയ ഉത്തരവോടെ ഓരോ വർഷവും ക്ലോക്കുകൾ മുന്നോട്ടും പിന്നോട്ടും മാറ്റുന്ന പരമ്പരാഗത പതിവാണ് പൂർണ്ണമായി അവസാനിക്കുന്നത്. സാധാരണയായി വരുന്ന നവംബർ 1-ന് ഒരു മണിക്കൂർ പിന്നോട്ടാക്കേണ്ട ക്ലോക്കുകൾ ഇത്തവണ മാറ്റേണ്ടതില്ലെന്ന് സർക്കാർ വ്യക്തമാക്കിക്കഴിഞ്ഞു. പുതിയ സമയക്രമം പ്രാബല്യത്തിൽ വരുന്നതോടെ നോർത്ത്‌വെസ്റ്റ് ടെറിറ്ററീസ് ഇനി അയൽ പ്രവിശ്യകളായ ആൽബർട്ടയുടെയും സസ്കാച്വാന്റെയും സമയവുമായി പൂർണ്ണമായി പൊരുത്തപ്പെടും.

ആധുനിക സോഫ്റ്റ്‌വെയറുകളിൽ പ്രവർത്തിക്കുന്ന സ്മാർട്ട്‌ഫോണുകൾ, കമ്പ്യൂട്ടറുകൾ, മറ്റ് ഡിജിറ്റൽ ഉപകരണങ്ങൾ എന്നിവയിൽ ഈ സമയമാറ്റം സ്വയം മാറുന്നതാണ്. കമ്പനികൾ സിസ്റ്റം അപ്‌ഡേറ്റ് പുറത്തിറക്കുന്നതോടെ ഉപകരണങ്ങളിലെ സമയം താനേ മാറിവരും. അതിനാൽ തന്നെ ടെറിറ്ററിയിലെ ഭൂരിഭാഗം താമസക്കാർക്കും സാങ്കേതികമായി തടസ്സങ്ങളൊന്നുമില്ലാതെ തന്നെ പുതിയ സമയരീതിയിലേക്ക് മാറാൻ സാധിക്കുമെന്നാണ് വിലയിരുത്തപ്പെടുന്നത്.

2022-ൽ നടത്തിയ വ്യാപകമായ പൊതുജന അഭിപ്രായത്തിന്റെ തുടർച്ചയായാണ് സർക്കാർ ഇപ്പോൾ ഈ തീരുമാനം ഔദ്യോഗികമായി കൈക്കൊണ്ടിരിക്കുന്നത്. അന്ന് നടത്തിയ ഓൺലൈൻ സർവേയിൽ 3,500-ത്തിലധികം പ്രദേശവാസികൾ സജീവമായി പങ്കെടുകയുണ്ടായി. അതിൽ 87 ശതമാനത്തിലധികം ആളുകളും വർഷത്തിൽ രണ്ടുതവണ ക്ലോക്ക് മാറ്റുന്ന രീതി പൂർണ്ണമായും അവസാനിപ്പിക്കണമെന്നും വർഷം മുഴുവൻ മൗണ്ടൻ ഡേലൈറ്റ് ടൈം നിലനിർത്തണമെന്നുമാണ് അഭിപ്രായപ്പെട്ടത്.

Also Read: യു.എസ് ബാങ്കുകളെയും ഡോളറിനെയും ആശ്രയിക്കുന്നത് കുറയ്ക്കും: നിർണായക നീക്കവുമായി കാനഡ

സീസൺ മാറുമ്പോൾ സമയം മാറ്റുന്ന രീതി അവസാനിപ്പിക്കണമെന്ന് ജനങ്ങൾ കാത്തിരുന്ന ആവശ്യമാണെന്ന് പ്രീമിയർ ആർ.ജെ. സിംപ്സൺ ബുധനാഴ്ച വാർത്താക്കുറിപ്പിൽ പറഞ്ഞു. ഈ തീരുമാനം സാധാരണക്കാർക്കും കുടുംബങ്ങൾക്കും ബിസിനസുകൾക്കും ഒരുപോലെ ഉപകാരപ്പെടും. ആളുകളുടെ ദിവസേനയുള്ള ജീവിതത്തിലും ജോലി കാര്യങ്ങളിലും കൂടുതൽ വ്യക്തത കൊണ്ടുവരാൻ ഇത് സഹായിക്കുമെന്നും അദ്ദേഹം കൂട്ടിച്ചേർത്തു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq