ടെമിസ്കാമിംഗ് ഷോഴ്സ്: നോർത്ത് അമേരിക്കയിലെ ആദ്യത്തെ ബാറ്ററി-ഗ്രേഡ് കോബാൾട്ട് സൾഫേറ്റ് റിഫൈനറി സ്ഥാപിക്കുന്നതിനായി ഇലക്ട്ര ബാറ്ററി മെറ്റീരിയൽസ് 73 മില്യൺ യുഎസ് ഡോളറിന്റെ ബജറ്റ് അംഗീകരിച്ചു. ഒന്റാറിയോയിലെ ടെമിസ്കാമിംഗ് ഷോഴ്സിനും ടൗൺ ഓഫ് കോബാൾട്ടിനും അതിർത്തിയിലുള്ള നിലവിലെ പ്ലാന്റ് വികസിപ്പിക്കുന്നതിനാണ് കമ്പനി ഭരണസമിതി അനുമതി നൽകിയത്. വൈദ്യുത വാഹനങ്ങളുടെ ബാറ്ററികൾ നിർമ്മിക്കുന്നതിനാവശ്യമായ ശുദ്ധീകരിച്ച കോബാൾട്ട് ഉത്പാദിപ്പിക്കുന്ന നോർത്ത് അമേരിക്കയിലെ ആദ്യത്തെ പ്ലാന്റായിരിക്കും ഇതെന്നും കാനഡയിലെയും അമേരിക്കയിലെയും വിവിധ ഗവൺമെന്റുകളുടെ നിക്ഷേപവും പിന്തുണയും പദ്ധതിക്കുണ്ടെന്നും കമ്പനി അറിയിച്ചു.
കോവിഡ് മഹാമാരിയെത്തുടർന്ന് പലതവണ തടസ്സപ്പെട്ട പദ്ധതിയുടെ നിർമ്മാണം അടുത്ത വർഷത്തോടെ പൂർത്തിയാക്കാനാണ് ലക്ഷ്യമിടുന്നതെന്ന് കമ്പനി സ്ഥാപകനും സിഇഒയുമായ ട്രെന്റ് മെൽ വ്യക്തമാക്കി. പ്ലാന്റിന്റെ ചില ഭാഗങ്ങൾ 2026 അവസാനത്തോടെ പ്രവർത്തനസജ്ജമാകും. പദ്ധതി നടപ്പിലാക്കുന്നതിനായി നൈപുണ്യമുള്ള തൊഴിലാളികളെ ആവശ്യമുണ്ടെന്നും ഇതിനായുള്ള ടെൻഡർ നടപടികൾ ഉടൻ പൂർത്തിയാക്കുമെന്നും അദ്ദേഹം അറിയിച്ചു. റിഫൈനറി പൂർണ്ണതോതിൽ പ്രവർത്തനസജ്ജമാകുന്നതോടെ മേഖലയിലെ ഹോട്ടലുകളിലും താമസസൗകര്യങ്ങളിലും കൂടുതൽ തിരക്ക് അനുഭവപ്പെടുമെന്നും കമ്പനി വിലയിരുത്തുന്നു.
അടുത്ത വർഷം പ്ലാന്റിൽ വാണിജ്യാടിസ്ഥാനത്തിലുള്ള ഉത്പാദനം ആരംഭിക്കാനാണ് കമ്പനിയുടെ തീരുമാനം. ഉത്പാദിപ്പിക്കുന്ന കോബാൾട്ടിന്റെ 60 ശതമാനവും എൽജി ഇലക്ട്രോണിക്സിനാണ് (LG Electronics) നൽകുക. കോംഗോയിൽ നിന്ന് ഇറക്കുമതി ചെയ്യുന്ന അസംസ്കൃത വസ്തുക്കൾ ഇവിടെ വെച്ച് സൾഫേറ്റായി മാറ്റും. കാർ ബാറ്ററികൾ, പവർ ടൂളുകൾ, സെൽഫോണുകൾ എന്നിവയുടെ നിർമ്മാണത്തിനായിട്ടായിരിക്കും പ്രധാനമായും ഇത് വിതരണം ചെയ്യുകയെന്നും അധികൃതർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
North America’s first cobalt sulfate refinery is coming; $73 million project begins in Ontario
