ലണ്ടൻ: യു.കെ. സന്ദർശിക്കാൻ ഒരുങ്ങുന്ന കനേഡിയൻ പൗരന്മാർക്ക് 2026 ഫെബ്രുവരി 25 മുതൽ ഇലക്ട്രോണിക് ട്രാവൽ ഓതറൈസേഷൻ (eTA) നിർബദ്ധം. ഈ തീയതി മുതൽ, സാധുവായ ഇ.ടി.എ. ഇല്ലാത്ത യാത്രക്കാരെ യു.കെ.യിലേക്ക് പ്രവേശിക്കാൻ അനുവദിക്കുകയോ വിമാനത്തിൽ കയറാൻ സമ്മതിക്കുകയോ ചെയ്യില്ലെന്ന് ബ്രിട്ടീഷ് സർക്കാർ അറിയിച്ചു.
ഇ.ടി.എ. എന്നാൽ ഒരു സാധാരണ വിസയല്ല. യു.കെ. സന്ദർശിക്കാൻ വിസ എടുക്കേണ്ട ആവശ്യമില്ലാത്ത രാജ്യക്കാർക്ക് വേണ്ടിയുള്ള ഒരു ഓൺലൈൻ അനുമതിയാണിത്. കാനഡക്കാർക്ക് ഈ അനുമതി ഉപയോഗിച്ച് ആറ് മാസം വരെ ചെറിയ യാത്രകൾക്കായി യു.കെ.യിൽ പോകാൻ കഴിയും. 16 പൗണ്ട് (ഏകദേശം 30 കനേഡിയൻ ഡോളർ) ആണ് ഇതിനായുള്ള ഫീസ്. ഔദ്യോഗിക സർക്കാർ വെബ്സൈറ്റ് വഴിയോ യു.കെ. ഇ.ടി.എ. ആപ്പ് വഴിയോ കാനഡക്കാർക്ക് ഓൺലൈനായി അപേക്ഷിക്കാം. ഓൺലൈൻ തട്ടിപ്പുകൾ ഒഴിവാക്കാൻ ഔദ്യോഗിക വെബ്സൈറ്റുകൾ മാത്രം ഉപയോഗിക്കണമെന്ന് വിദഗ്ധർ മുന്നറിയിപ്പ് നൽകുന്നു.
ഒരിക്കൽ ഇ.ടി.എ. അംഗീകാരം ലഭിച്ചാൽ, അത് രണ്ടുവർഷത്തേക്ക് അല്ലെങ്കിൽ പാസ്പോർട്ടിന്റെ കാലാവധി കഴിയുന്നതുവരെ സാധുവായിരിക്കും. ഈ കാലയളവിൽ എത്ര തവണ വേണമെങ്കിലും യു.കെ. സന്ദർശിക്കാവുന്നതാണ്. അപേക്ഷ സമർപ്പിച്ചാൽ മിക്ക കേസുകളിലും മിനിറ്റുകൾക്കുള്ളിൽ തീരുമാനം ലഭിക്കുമെങ്കിലും, അപേക്ഷകർ മൂന്ന് പ്രവൃത്തി ദിവസങ്ങൾ വരെ കാത്തിരിക്കാൻ തയ്യാറാകണം. അതേസമയം, ഇ.ടി.എ. ലഭിക്കുന്നത് യു.കെ.യിലേക്കുള്ള പ്രവേശനം ഉറപ്പുനൽകുന്നില്ലെന്നും സർക്കാർ വ്യക്തമാക്കി.
എന്നാൽ, ബ്രിട്ടീഷ് പൗരത്വം കൂടിയുള്ള കാനഡക്കാർക്ക് ഇ.ടി.എ. ബാധകമല്ല. ഇവർക്ക് സാധുവായ ബ്രിട്ടീഷ് പാസ്പോർട്ടാണ് ആവശ്യം. കൂടാതെ, യു.കെ. വിമാനത്താവളങ്ങളിൽ കസ്റ്റംസ് പരിശോധനയ്ക്ക് വിധേയമാകാതെ ട്രാൻസിറ്റ് ചെയ്യുന്ന യാത്രക്കാർക്കും ഈ പുതിയ നിയമം ബാധകമല്ല. കാനഡ, യു.എസ്.എ., യൂറോപ്യൻ യൂണിയൻ ഉൾപ്പെടെയുള്ള മറ്റു രാജ്യങ്ങളും സമാനമായ ഇലക്ട്രോണിക് യാത്രാ സംവിധാനങ്ങൾ നടപ്പാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
No visa required, but this is a must! Travel to the UK from Canada is no longer easy
