ഒട്ടാവ: ഗുരുതരമായ അലർജി ബാധിക്കുന്നവർക്ക് ആശ്വാസമായി കുത്തിവെപ്പ് ഇല്ലാത്ത പുതിയ ചികിത്സാ രീതിക്ക് കാനഡയിൽ അനുമതി. അലർജി പ്രതിപ്രവർത്തനങ്ങൾ പെട്ടെന്ന് തടയാൻ സഹായിക്കുന്ന ‘നെഫി’ (Neffy) എന്ന നേസൽ സ്പ്രേയ്ക്കാണ് ഹെൽത്ത് കാനഡ അംഗീകാരം നൽകിയത്. ഇഞ്ചക്ഷനുകൾക്ക് പകരമായി മൂക്കിലടിക്കാൻ കഴിയുന്ന ഈ മരുന്ന് അലർജി ചികിത്സാ രംഗത്തെ വിപ്ലവകരമായ മാറ്റമായാണ് വിലയിരുത്തപ്പെടുന്നത്.
ഭക്ഷണം, മരുന്നുകൾ, പ്രാണികളുടെ കടി എന്നിവ മൂലമുണ്ടാകുന്ന അതിശക്തമായ അലർജി അഥവാ അനാഫിലാക്സിസ് (Anaphylaxis) ചികിത്സിക്കാനാണ് നെഫി ഉപയോഗിക്കുന്നത്. എൽകെ-അബെല്ലോ ഫാർമസ്യൂട്ടിക്കൽസ് (ALK-Abello Pharmaceuticals) വികസിപ്പിച്ചെടുത്ത ഈ മരുന്ന് പോക്കറ്റിൽ കൊണ്ടുനടക്കാവുന്ന ചെറിയ കുപ്പിയിലാണ് ലഭ്യമാകുക. അടിയന്തര സാഹചര്യങ്ങളിൽ ഇഞ്ചക്ഷൻ സൂചികൾ ഉപയോഗിക്കുന്നതിലെ പ്രായോഗിക ബുദ്ധിമുട്ടുകൾ ഒഴിവാക്കാൻ ഇതിലൂടെ സാധിക്കും.
കാനഡയിൽ ഏകദേശം 25 ലക്ഷത്തോളം ആളുകൾ ഗുരുതരമായ അലർജി പ്രശ്നങ്ങൾ നേരിടുന്നവരാണെന്നാണ് കണക്കുകൾ. എന്നാൽ ഇതിൽ പകുതിയോളം പേരും അടിയന്തര ഘട്ടങ്ങളിൽ ഉപയോഗിക്കേണ്ട ‘എപിനെഫ്രിൻ ഓട്ടോ-ഇഞ്ചക്ടറുകൾ’ കൈവശം വെക്കാറില്ലെന്ന് എൽകെ-അബെല്ലോ ഫാർമസ്യൂട്ടിക്കൽസ് വ്യക്തമാക്കുന്നു. സൂചികളോടുള്ള ഭയവും ഇഞ്ചക്ഷൻ എടുക്കാനുള്ള പ്രായോഗിക ബുദ്ധിമുട്ടുമാണ് പലരെയും ഇതിൽ നിന്ന് പിന്നോട്ട് വലിക്കുന്നത്. ഈ പ്രതിസന്ധിക്കുള്ള പരിഹാരമായാണ് നേസൽ സ്പ്രേ അവതരിപ്പിച്ചിരിക്കുന്നത്.
മറ്റ് മരുന്നുകളെ അപേക്ഷിച്ച് സൂക്ഷിക്കാൻ എളുപ്പമാണെന്നതാണ് നെഫിയുടെ പ്രധാന പ്രത്യേകത. 30 മാസത്തോളം ഇതിന് കാലാവധിയുണ്ട് (Shelf life). പ്രത്യേക താപനിലയിലോ സാഹചര്യങ്ങളിലോ സൂക്ഷിക്കണമെന്ന നിബന്ധനയുമില്ല. ഈ വർഷം വേനൽക്കാലത്തോടെ കാനഡയിലെമ്പാടുമുള്ള ഫാർമസികളിൽ മരുന്ന് ലഭ്യമായി തുടങ്ങും. കുട്ടികൾക്കും മുതിർന്നവർക്കും ഒരുപോലെ ഉപകാരപ്രദമാകുന്ന ഈ സംവിധാനം വരും വർഷങ്ങളിൽ മറ്റ് രാജ്യങ്ങളിലേക്കും വ്യാപിക്കുമെന്നാണ് കരുതപ്പെടുന്നത്.
അലർജി മൂലമുണ്ടാകുന്ന മരണനിരക്ക് കുറയ്ക്കാൻ പുതിയ നേസൽ സ്പ്രേ സഹായിക്കുമെന്നാണ് ആരോഗ്യ വിദഗ്ധരുടെ പ്രതീക്ഷ. അത്യാധുനിക മെഡിക്കൽ സാങ്കേതികവിദ്യ സാധാരണക്കാരിലേക്ക് എത്തുന്നതിന്റെ മികച്ച ഉദാഹരണമായി ഈ നീക്കം മാറുകയാണ്.
No more fear of injections; Canada approves 'Nefi' nasal spray
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
