കാനഡയിലെ മോൺട്രിയൽ നഗരം വേനൽക്കാലത്ത് ഏഴ് കിലോമീറ്ററിലധികം നീളമുള്ള പ്രധാന റോഡുകൾ കാൽനടക്കാർക്ക് മാത്രമായി മാറ്റിവയ്ക്കുന്ന പദ്ധതി പ്രഖ്യാപിച്ചു. എല്ലാ വർഷവും വേനൽക്കാലത്ത് നടപ്പാക്കുന്ന ഈ പരിപാടി നടപ്പാത സൗകര്യം മെച്ചപ്പെടുത്താനും ആ പ്രദേശങ്ങളിലെ 1,300-ലധികം കട-ബിസിനസുകളുടെ വിൽപ്പന വർധിപ്പിക്കാനുമാണ് ലക്ഷ്യമിടുന്നത്.
മൗണ്ട് റോയൽ അവന്യൂ, വെല്ലിംഗ്ടൺ സ്ട്രീറ്റ്, സെയിന്റ് കാതറിൻ സ്ട്രീറ്റ് ഈസ്റ്റ് എന്നിവയുടെ ഭാഗങ്ങൾ ഉൾപ്പെടുന്ന പ്രധാന റോഡുകളിൽ മെയ് മുതൽ ഒക്ടോബർ വരെയുള്ള വ്യത്യസ്ത തീയതികളിൽ വാഹന നിരോധനം നിലവിൽ വരും. പ്ലേസ് ഡു മാർഷെ-ഡു-നോർഡ്, മോൺക്ലാൻഡ് അവന്യൂ തുടങ്ങിയ പ്രദേശങ്ങളിൽ പരിമിതമായ സമയക്രമത്തിൽ മാത്രമായി ഈ പദ്ധതി ഏർപ്പെടുത്തുമെന്നും വിവിധ ബറോകൾക്കനുസരിച്ച് ഇത് വ്യത്യാസപ്പെടുമെന്നും നഗരം അറിയിച്ചു.
കഴിഞ്ഞ വർഷത്തെ അപേക്ഷിച്ച് ശ്രദ്ധേയമായ മാറ്റം സെയിന്റ് ഹ്യൂബർട്ട് പ്ലാസയെ കാൽനടയാത്രക്കാർ ഉള്ള മേഖലയുടെ പട്ടികയിൽ നിന്ന് ഒഴിവാക്കിയതാണ്. എന്നാൽ വേനൽക്കാലം പുരോഗമിക്കുമ്പോൾ പ്രാദേശിക ബറോകൾക്ക് അധിക റോഡുകൾ ഇതിൽ ചേർക്കാൻ കഴിയുമെന്നും നഗരം ഊന്നിപ്പറഞ്ഞു.
നടപ്പാത സൗകര്യത്തിനും നഗര സ്ഥലങ്ങളുടെ പൊതു ഉപയോഗത്തിനും മുൻഗണന നൽകുന്ന മോൺട്രിയലിന്റെ വിപുലമായ ശ്രമങ്ങളുടെ ഭാഗമാണ് ഈ പദ്ധതി. കാൽനടയാത്രക്കാർക്കുള്ള സൗകര്യം വർധിപ്പിക്കുകയും നഗരത്തിലെ പബ്ലിക് സ്പേസുകളുടെ ആസ്വാദനം പ്രോത്സാഹിപ്പിക്കുകയും ചെയ്യുന്നതിന് ഈ വർഷവും തുടർന്നു കൊണ്ടിരിക്കുന്ന ശ്രമങ്ങളുടെ ഭാഗമാണിത്.
