ന്യൂഫൗണ്ട്ലാന്റ് ആന്റ് ലാബ്രഡോർ പ്രവിശ്യാ സർക്കാർ വന്ധ്യതാ ചികിത്സയ്ക്കുള്ള ഒറ്റത്തവണ ധനസഹായ തുക ഉയർത്തി. നിലവിലുള്ള 20,000 ഡോളറിൽ നിന്ന് 9,000 ഡോളർ കൂടി വർദ്ധിപ്പിച്ച് 29,000 കനേഡിയൻ ഡോളറായാണ് തുക പുതുക്കിയത്. ഐ.വി.എഫ് ചികിത്സയ്ക്കും യാത്രയ്ക്കുമായി തുക റീഇംബേഴ്സ്മെന്റായി ലഭിക്കും.
പദ്ധതിക്കായി 1.8 മില്യൺ ഡോളർ കൂടി അധികമായി വകയിരുത്തിയതോടെ വാർഷിക ബജറ്റ് 5.8 മില്യൺ ഡോളറായി ഉയർന്നു. സാമ്പത്തിക സഹായം തടസ്സങ്ങൾ നീക്കാൻ സഹായിക്കുമെങ്കിലും, പ്രവിശ്യയിൽ സ്വന്തമായി ഐ.വി.എഫ് ക്ലിനിക്ക് ഇല്ലാത്തതിനാൽ നിലവിൽ രോഗികൾക്ക് മറ്റ് പ്രവിശ്യകളിലേക്ക് യാത്ര ചെയ്യേണ്ടി വരുന്നുണ്ട്.
സ്വന്തമായി ഐ.വി.എഫ് ക്ലിനിക്ക് സ്ഥാപിക്കുന്നതിനുള്ള ആദ്യപടിയായാണ് തുക വർദ്ധിപ്പിച്ചതെന്ന് ആരോഗ്യ-സാമൂഹിക സേവന മന്ത്രി ലെല ഇവാൻസ് വ്യക്തമാക്കി. പ്രദേശത്ത് ക്ലിനിക്ക് ആരംഭിക്കുന്നത് സംബന്ധിച്ച് ഡോക്ടർമാരുമായും എൻ.എൽ ഹെൽത്ത് സർവീസസുമായും ചർച്ചകൾ നടന്നുവരികയാണ്.
മുൻ ലിബറൽ സർക്കാരിന്റെ കാലത്ത് 2021-ൽ ആന്ഡ്രൂ ഫ്യൂറി ആണ് സ്വന്തമായി ക്ലിനിക്ക് ആരംഭിക്കുമെന്ന് ആദ്യം പ്രഖ്യാപിച്ചത്. പിന്നീട് ഫെർട്ടിലിറ്റി വിദഗ്ധരായ ഡോ. ഡീന മർഫിയും ഡോ. ഷോൺ മർഫിയും ചേർന്ന് 2026 തുടക്കത്തിൽ ക്ലിനിക്ക് തുറക്കാൻ പദ്ധതിയിട്ടിരുന്നെങ്കിലും മുൻ ഭരണകൂടത്തിന് കീഴിലെ ആരോഗ്യ അധികൃതർ ഇത് നീട്ടിവെക്കുകയായിരുന്നു.
സർക്കാരിന്റെ സാമ്പത്തിക സഹായ വർദ്ധനവിനെ സ്വാഗതം ചെയ്യുമ്പോഴും, സ്വന്തമായി ഒരു ക്ലിനിക്ക് ഇനിയും യാഥാർത്ഥ്യമാകാത്തതിൽ വലിയ നിരാശയുണ്ടെന്ന് ‘ഫേസസ് ഓഫ് ഫെർട്ടിലിറ്റി’ സംഘടനയിലെ ലേഡൺ വെല്ലൺ പറഞ്ഞു. യാത്രയ്ക്കായി വൻ തുക ചെലവഴിക്കേണ്ടി വരുന്നത് ഒഴിവായാൽ മാത്രമേ 29,000 ഡോളർ എന്ന സഹായം പൂർണ്ണമായും പ്രയോജനപ്പെടൂ എന്നും മറ്റു പ്രവിശ്യകളിലെപ്പോലെ ഒരു ഘട്ടത്തിലെ മുഴുവൻ ചികിത്സയും പൂർത്തിയാക്കാൻ ഇതിലൂടെ സാധിക്കൂ എന്നും അവർ ചൂണ്ടിക്കാട്ടി.
Newfoundland government increases IVF treatment assistance by $9,000; raises annual budget for program
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
