ഒട്ടാവ : പ്രധാനമന്ത്രി മാർക്ക് കാർണിയും ജപ്പാൻ പ്രധാനമന്ത്രി ടാകൈച്ചി സനേയും പുതിയ സമഗ്ര തന്ത്രപരമായ പങ്കാളിത്ത കരാറിൽ (Comprehensive Strategic Partnership) ഒപ്പുവെച്ചു. പ്രതിരോധം, ഊർജ്ജം, സാങ്കേതികവിദ്യ എന്നീ മേഖലകളിൽ ഇരുരാജ്യങ്ങളും തമ്മിലുള്ള സഹകരണം കൂടുതൽ ദൃഢമാക്കുകയാണ് കരാറിലൂടെ ലക്ഷ്യമിടുന്നത്. നിലവിലെ ബന്ധം കൂടുതൽ വിപുലപ്പെടുത്താൻ ഇരുരാജ്യങ്ങളും തയ്യാറാണെന്ന് കരാർ ഒപ്പിട്ട ശേഷം മാർക്ക് കാർണി വ്യക്തമാക്കി. ജപ്പാനിൽ ജോലി ചെയ്തിട്ടുള്ള തനിക്ക് ജാപ്പനീസ് ഭാഷയിലുള്ള അറിവ് പ്രകടിപ്പിച്ചുകൊണ്ട് കാർണി നടത്തിയ പ്രസംഗം ചടങ്ങിൽ ശ്രദ്ധേയമായി.
ഓസ്ട്രേലിയ, ഇന്ത്യ എന്നീ രാജ്യങ്ങൾ സന്ദർശിച്ച ശേഷമാണ് മാർക്ക് കാർണി തന്റെ പത്തുദിവസത്തെ പര്യടനത്തിന്റെ ഭാഗമായി ജപ്പാനിലെത്തിയത്. ലോക സാമ്പത്തിക ഫോറത്തിൽ അദ്ദേഹം മുന്നോട്ടുവെച്ച ‘മിഡിൽ പവർ’ രാജ്യങ്ങളുടെ കൂട്ടായ്മ എന്ന ആശയത്തിന് ഓസ്ട്രേലിയൻ പ്രധാനമന്ത്രി ആന്തണി അൽബനീസി ഉൾപ്പെടെയുള്ളവരിൽ നിന്ന് വലിയ പിന്തുണ ലഭിച്ചിരുന്നു. ഈ മാസമാദ്യം വീണ്ടും തിരഞ്ഞെടുക്കപ്പെട്ട ജപ്പാനിലെ ആദ്യ വനിതാ പ്രധാനമന്ത്രി സനേ ടാകൈച്ചിയുമായുള്ള കൂടിക്കാഴ്ചയോടെയാണ് പര്യടനം അവസാനിക്കുന്നത്.
കാനഡയുടെ മൂന്ന് വർഷം പഴക്കമുള്ള ഇന്തോ-പസഫിക് തന്ത്രം ജപ്പാനുമായുള്ള ബന്ധം ആഴത്തിലുള്ളതാക്കാൻ സഹായിച്ചതായി ഏഷ്യ പസിഫിക് ഫൗണ്ടേഷൻ വൈസ് പ്രസിഡന്റ് വിന നജീബുള്ള വിലയിരുത്തി. സാമ്പത്തിക നിക്ഷേപം, ഊർജ്ജം, നിർണ്ണായക ധാതുക്കൾ എന്നിവയുമായി ബന്ധപ്പെട്ട പങ്കാളിത്തം ഉൾപ്പെടുന്ന ഒരു ‘ഫുൾ സ്പെക്ട്രം’ ബന്ധമാണിതെന്ന് അവർ വിശേഷിപ്പിച്ചു. ഇരുരാജ്യങ്ങളും തമ്മിലുള്ള മൂല്യങ്ങളിലെ സമാനതയും ജനങ്ങൾ തമ്മിലുള്ള ശക്തമായ ബന്ധവും ഈ പങ്കാളിത്തത്തിന് കരുത്തുപകരുന്നതായും അവർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New strategic partnership between Canada and Japan; Mark Carney concludes Indo-Pacific tour
