ഹാലിഫാക്സ്: നോവ സ്കോഷ്യ പ്രവിശ്യയിലേക്ക് കുടിയേറാൻ ആഗ്രഹിക്കുന്നവർക്ക് പ്രധാന അറിയിപ്പ്. പ്രവിശ്യാ നോമിനി പ്രോഗ്രാമിനായുള്ള (NSNP) അപേക്ഷാ രീതിയിലും അറ്റ്ലാന്റിക് ഇമിഗ്രേഷൻ പ്രോഗ്രാമിലും (AIP) വലിയ പരിഷ്കാരങ്ങൾ. ഇതിന്റെ ഭാഗമായി എല്ലാ പ്രൊവിൻഷ്യൽ സ്ട്രീമുകൾക്കും AIP പ്രോഗ്രാമുകൾക്കുമായി ഏകീകൃത EOI (Expression of Interest) സംവിധാനം അവതരിപ്പിച്ചു. ഇതനുസരിച്ച്, പഴയതും പുതിയതുമായ എല്ലാ അപേക്ഷകളും ഇനി ഒരൊറ്റ പൂളിൽ (Unified EOI Pool) ഉൾപ്പെടും. പ്രവിശ്യയിലെ യഥാർത്ഥ തൊഴിൽ വിപണി ആവശ്യകതകൾക്കനുസരിച്ച് സ്ഥാനാർത്ഥികളെ തിരഞ്ഞെടുക്കാൻ ഈ ഏകീകൃത സംവിധാനം അധികൃതർക്ക് കൂടുതൽ സ്വാതന്ത്ര്യം നൽകും.
തൊഴിൽ മുൻഗണനകൾ, ലഭ്യമായ ക്വാട്ട, അപേക്ഷാ പൂളിന്റെ വലുപ്പം എന്നിവ അടിസ്ഥാനമാക്കിയായിരിക്കും തിരഞ്ഞെടുപ്പ് നടക്കുക. ആരോഗ്യ സംരക്ഷണം, ട്രേഡ്സ്, നിർമ്മാണം, STEM, ഉത്പാദന മേഖല, പ്രകൃതി വിഭവങ്ങൾ തുടങ്ങി ഉയർന്ന തൊഴിലവസരങ്ങളുള്ള മേഖലകളിൽ നിന്നുള്ള അപേക്ഷകർക്കായിരിക്കും പ്രധാനമായും മുൻഗണന ലഭിക്കുക.
അപേക്ഷകനെയോ അല്ലെങ്കിൽ തൊഴിലുടമയേയോ തിരഞ്ഞെടുക്കുമ്പോൾ മാത്രമേ അധികൃതർ അറിയിക്കുകയുള്ളൂ. EOI അപേക്ഷകൾ എപ്പോൾ തിരഞ്ഞെടുക്കപ്പെടും എന്ന് പ്രവചിക്കാൻ നോവ സ്കോഷ്യയ്ക്ക് കഴിയില്ല. നറുക്കെടുപ്പുമായി ബന്ധപ്പെട്ട വിവരങ്ങൾ ഔദ്യോഗിക വെബ്സൈറ്റിൽ ലഭ്യമാകും. അപേക്ഷ സമർപ്പിച്ചതുകൊണ്ട് മാത്രം അന്തിമ അംഗീകാരം ഉറപ്പില്ല. തിരഞ്ഞെടുക്കപ്പെടുന്നത് തൊഴിൽ ആവശ്യകതകൾക്ക് അനുസരിച്ച് ആണെങ്കിലും, വിസയുടെ അന്തിമ തീരുമാനം സമഗ്രമായ വിലയിരുത്തലിന് ശേഷമായിരിക്കും കൈക്കൊള്ളുക.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Reforms/Updates in the Nova Scotia Immigration Program
