ടൊറന്റോ: ഒന്റാറിയോയിലെ വാഹന ഇൻഷുറൻസ് മേഖലയിൽ കഴിഞ്ഞ പത്ത് വർഷത്തിനിടയിലെ ഏറ്റവും വലിയ പരിഷ്കാരങ്ങൾ വരുന്നു. 2026 ജൂലൈ 1 മുതൽ നിലവിൽ വരുന്ന പുതിയ നിയമമനുസരിച്ച് ഇൻഷുറൻസ് പോളിസികളിലെ പല ആനുകൂല്യങ്ങളും ഇനി നിർബന്ധിതമായിരിക്കില്ല. പകരം ഡ്രൈവർമാർക്ക് തങ്ങൾക്ക് ആവശ്യമുള്ള പരിരക്ഷകൾ മാത്രം തിരഞ്ഞെടുക്കാനുള്ള ‘ഫ്ലെക്സിബിൾ മോഡൽ’ സംവിധാനമാണ് സർക്കാർ നടപ്പിലാക്കുന്നത്.
നിലവിൽ ഒന്റാറിയോയിലെ എല്ലാ ഇൻഷുറൻസ് പോളിസികളിലും അപകടാനുകൂല്യങ്ങൾ ഒരു പാക്കേജായി നിർബന്ധമായും ഉൾപ്പെടുത്തിയിരുന്നു. എന്നാൽ പുതിയ നിയമപ്രകാരം മെഡിക്കൽ, പുനരധിവാസ സഹായം, അറ്റൻഡന്റ് കെയർ എന്നീ മൂന്ന് കാര്യങ്ങൾ മാത്രമേ നിർബന്ധിത വിഭാഗത്തിൽ ഉണ്ടാവുകയുള്ളൂ. വരുമാന നഷ്ടത്തിനുള്ള പരിരക്ഷ (Income Replacement) അടക്കമുള്ള മറ്റെല്ലാ ആനുകൂല്യങ്ങളും ഇനി മുതൽ ഓപ്ഷണൽ ആയിരിക്കും. അതായത് ഈ ആനുകൂല്യങ്ങൾ വേണമെന്നുണ്ടെങ്കിൽ നിങ്ങൾ പ്രത്യേകം തിരഞ്ഞെടുത്ത് പണമടയ്ക്കണം.
അപകടം മൂലം ജോലിക്ക് പോകാൻ കഴിയാത്ത അവസ്ഥയിൽ ലഭിക്കുന്ന ആഴ്ചയിലുള്ള 400 ഡോളർ സഹായം ഇനി മുതൽ പോളിസിയിൽ തനിയെ ലഭിക്കില്ല എന്നുള്ളതാണ് ഏറ്റവും വലിയ മാറ്റം. ഇത് ആവശ്യമുള്ളവർ പ്രത്യേകം ഇൻഷുറൻസ് കമ്പനിയോട് ആവശ്യപ്പെടണം. കൂടാതെ അപകടം മൂലമുള്ള ചികിത്സാ ചിലവുകൾക്ക് ഇനി മുതൽ നിങ്ങളുടെ സ്വകാര്യ അല്ലെങ്കിൽ ജോലിസ്ഥലത്തെ ഇൻഷുറൻസിനേക്കാൾ മുൻപ് ഓട്ടോ ഇൻഷുറൻസ് കമ്പനിയായിരിക്കും പണം നൽകുക.
2026 ജൂലൈ ഒന്നിന് ശേഷം പുതിയ പോളിസി എടുക്കുന്നവർക്ക് ഏറ്റവും കുറഞ്ഞ കവറേജ് മാത്രമേ ഡിഫോൾട്ടായി ലഭിക്കൂ എന്നതിനാൽ ആവശ്യമായ അധിക പരിരക്ഷകൾ ഉപഭോക്താവ് നേരിട്ട് ആവശ്യപ്പെടേണ്ടി വരും. എന്നാൽ നിലവിൽ ഇൻഷുറൻസ് ഉള്ളവർ പോളിസി പുതുക്കുമ്പോൾ പഴയ ആനുകൂല്യങ്ങൾ തന്നെ തുടരും. മാറ്റം വരുത്തണമെങ്കിൽ മാത്രം ഇൻഷുറൻസ് കമ്പനിയെ രേഖാമൂലം അറിയിച്ചാൽ മതിയാകും.
സ്വയം തൊഴിൽ ചെയ്യുന്നവർ, വിദ്യാർത്ഥികൾ, മുതിർന്ന പൗരന്മാർ എന്നിവർ ഈ മാറ്റം പ്രത്യേകം ശ്രദ്ധിക്കണം. കുറഞ്ഞ പ്രീമിയത്തിനായി ഇൻഷുറൻസ് ആനുകൂല്യങ്ങൾ ഒഴിവാക്കുന്നത് അപകട സമയത്ത് വലിയ സാമ്പത്തിക ബാധ്യത വരുത്തി വെച്ചേക്കാം എന്ന് വിദഗ്ധർ മുന്നറിയിപ്പ് നൽകുന്നു. ഇൻഷുറൻസ് പുതുക്കുന്നതിന് മുൻപായി നിങ്ങളുടെ നിലവിലെ പോളിസിയും ജോലിസ്ഥലത്തെ ഇൻഷുറൻസ് ആനുകൂല്യങ്ങളും തമ്മിലുള്ള വ്യത്യാസം മനസ്സിലാക്കി ഇൻഷുറൻസ് ബ്രോക്കറുമായി സംസാരിച്ച് വ്യക്തത വരുത്തുന്നത് ഉചിതമായിരിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Ontario Auto Insurance Rules Coming In 2026
