ടൊറന്റോ: കാനഡയിലെ ലക്ഷക്കണക്കിന് കുറഞ്ഞ-മിത വരുമാനക്കാരായ ആളുകൾക്കും ആശ്വാസമായി കാനഡ റവന്യൂ ഏജൻസിയുടെ (CRA) പുതിയ പ്രഖ്യാപനം. വരാനിരിക്കുന്ന 2026 ജൂൺ 5 മുതൽ അർഹരായവരുടെ അക്കൗണ്ടുകളിലേക്ക് ഒറ്റത്തവണയായി വലിയൊരു തുക (One-time top-up) നേരിട്ട് നിക്ഷേപിക്കും. പുതിയ ‘കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റിലേക്ക്’ മാറുന്നതിന്റെ ഭാഗമായാണ് ഈ സാമ്പത്തിക സഹായം നൽകുന്നത്.
എത്ര രൂപ വരെ ലഭിക്കും?
വ്യക്തികളുടെ വരുമാനവും കുടുംബ പശ്ചാത്തലവും അനുസരിച്ചായിരിക്കും തുക നിർണ്ണയിക്കുന്നത്:
നാലംഗ കുടുംബത്തിന്: പരമാവധി $533 (കനേഡിയൻ ഡോളർ) വരെ ലഭിക്കാം.
പങ്കാളികളില്ലാത്ത വ്യക്തികൾക്ക്: പരമാവധി $267 വരെ ലഭിക്കും.
കുട്ടികളുള്ള ദമ്പതികൾക്ക്: കുട്ടികളുടെ എണ്ണം അനുസരിച്ച് $441 മുതൽ $717 വരെ തുക വർദ്ധിക്കാം.
ആരാണ് ഇതിന് അർഹർ? പ്രത്യേക അപേക്ഷ വേണോ?
ഇതിനായി പ്രത്യേകം അപേക്ഷ സമർപ്പിക്കേണ്ടതില്ല. 2026 ജനുവരിയിൽ ജിഎസ്ടി/എച്ച്എസ്ടി (GST/HST) ക്രെഡിറ്റ് ലഭിച്ച എല്ലാവർക്കും ഈ തുക പൂർണ്ണമായും ഓട്ടോമാറ്റിക്കായി അക്കൗണ്ടിൽ വരും. 2024-ലെ ടാക്സ് റിട്ടേൺ അടിസ്ഥാനമാക്കിയാണ് തുക കണക്കാക്കുന്നത്. കാനഡയിലെത്തി 18 മാസം പൂർത്തിയാക്കിയ താൽക്കാലിക താമസക്കാർക്കും (Temporary Residents), ആദ്യ ടാക്സ് റിട്ടേൺ ഫയൽ ചെയ്ത പുതിയ സ്ഥിരതാമസക്കാർക്കും (Newcomers) ഇതിന് അർഹതയുണ്ടായിരിക്കും.
പണം ലഭിക്കാതിരിക്കാൻ കാരണങ്ങൾ എന്തെല്ലാം?
എല്ലാവർക്കും ഈ തുക ലഭിക്കണമെന്നില്ല. ചില സാഹചര്യങ്ങളിൽ ഈ ആനുകൂല്യം നഷ്ടപ്പെടാം. കാനഡ റവന്യൂ ഏജൻസിയിലേക്ക് മുൻപ് ടാക്സ് ഇനത്തിലോ മറ്റോ എന്തെങ്കിലും പണം അടയ്ക്കാനുണ്ടെങ്കിൽ (Outstanding balance), ഈ തുക അതിലേക്ക് വകയിരുത്തും. ഒരു കുടുംബത്തിൽ പങ്കാളികളിൽ ഒരാൾക്ക് മാത്രമേ ഈ തുക ലഭിക്കൂ. 2026 ജനുവരിയിലെ GST/HST ക്രെഡിറ്റ് ലഭിക്കാത്തവർക്ക് ഈ ടോപ്പ്-അപ്പ് ലഭിക്കില്ല.
ജൂൺ 5-ന് ബാങ്ക് അക്കൗണ്ടിൽ നേരിട്ട് പണം വരുന്നില്ലെങ്കിൽ 5 പ്രവൃത്തിദിനങ്ങൾ കൂടി കാത്തിരിക്കുക. അതിനുശേഷവും തുക ലഭിച്ചില്ലെങ്കിൽ CRA മൈ അക്കൗണ്ട് (CRA My Account) പരിശോധിക്കുകയോ, 1-800-387-1193 എന്ന നമ്പറിൽ ബന്ധപ്പെടുകയോ ചെയ്യാം. പേപ്പർ ചെക്ക് വഴി പണം ലഭിക്കുന്നവർക്ക് തപാൽ വഴി ഇത് ലഭിക്കാൻ കുറച്ചു ദിവസങ്ങൾ കൂടി എടുത്തേക്കാം. കൂടാതെ, വരുന്ന ജൂലൈ 3 മുതൽ പുതുക്കിയ നിരക്കിലുള്ള ജിഎസ്ടി ക്രെഡിറ്റിന്റെ ആദ്യ ഗഡുവും അക്കൗണ്ടുകളിലേക്ക് എത്തിത്തുടങ്ങും.
New One-Time CRA Payment Confirmed For June 2026
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
