ഒന്റാറിയോ: ഒന്റാറിയോയിലും ടൊറന്റോയിലും ആദ്യമായി എംപോക്സ് ക്ലേഡ് 1ബി (clade Ib) വകഭേദം സ്ഥിരീകരിച്ചു. വിദേശയാത്ര കഴിഞ്ഞെത്തിയ രണ്ട് വ്യക്തികളിലാണ് അതിവേഗം വ്യാപിക്കുന്ന ഈ വൈറസ് വകഭേദം കണ്ടെത്തിയതെന്ന് ടൊറന്റോ പബ്ലിക് ഹെൽത്ത് (TPH) അറിയിച്ചു. മധ്യ, കിഴക്കൻ ആഫ്രിക്കൻ രാജ്യങ്ങളിൽ റിപ്പോർട്ട് ചെയ്യപ്പെട്ട ഈ വകഭേദം നിലവിൽ വിവിധ യൂറോപ്യൻ രാജ്യങ്ങളിലും സ്ഥിരീകരിച്ചിട്ടുണ്ട്. 2022 മുതൽ ടൊറന്റോയിൽ റിപ്പോർട്ട് ചെയ്തിരുന്ന ക്ലേഡ് 2ബി വകഭേദത്തിൽ നിന്നും വ്യത്യസ്തമാണിത്. എന്നാൽ ക്ലേഡ് 1എ വകഭേദത്തെ അപേക്ഷിച്ച് പുതിയ വൈറസ് തീവ്രത കുറഞ്ഞതാണെന്ന് പബ്ലിക് ഹെൽത്ത് ഏജൻസി ഓഫ് കാനഡ വ്യക്തമാക്കി.
കഴിഞ്ഞ വർഷം ടൊറന്റോയിൽ ആകെ 155 എംപോക്സ് കേസുകളാണ് റിപ്പോർട്ട് ചെയ്തത്. നിലവിൽ ടൊറന്റോയുടെ ഡൗൺടൗൺ മേഖലയിലുള്ളവരിലാണ് കൂടുതൽ കേസുകൾ കാണപ്പെടുന്നത്. രോഗബാധിതരുമായുള്ള ശാരീരിക സമ്പർക്കം, ശരീര സ്രവങ്ങൾ, മുറിവുകൾ, മലിനമായ വസ്ത്രങ്ങൾ അല്ലെങ്കിൽ കിടക്ക വിരികൾ എന്നിവയിലൂടെയാണ് വൈറസ് പകരുന്നത്. നിലവിൽ റിപ്പോർട്ട് ചെയ്യപ്പെട്ട കേസുകളിൽ ഭൂരിഭാഗവും അടുത്ത ശാരീരിക സമ്പർക്കത്തിലൂടെയോ ലൈംഗിക ബന്ധത്തിലൂടെയോ ആണ് പടർന്നിട്ടുള്ളത്. പനി, പേശിവേദന, തൊലിപ്പുറത്തെ വേദനാജനകമായ കുമിളകൾ എന്നിവയാണ് പ്രധാന ലക്ഷണങ്ങൾ.
എംപോക്സിനെ പ്രതിരോധിക്കാൻ അർഹരായ എല്ലാ താമസക്കാരും ‘ഇംവാമ്യൂൺ’ (Imvamune) വാക്സിൻ സ്വീകരിക്കണമെന്ന് ടൊറന്റോ പബ്ലിക് ഹെൽത്ത് നിർദ്ദേശിച്ചു. രണ്ട് ഡോസ് വാക്സിനാണ് പൂർണ്ണ പ്രതിരോധത്തിനായി ശുപാർശ ചെയ്യുന്നത്. ആദ്യ ഡോസ് സ്വീകരിച്ചവർ 28 ദിവസത്തിന് ശേഷം രണ്ടാം ഡോസ് എടുക്കണം. മുൻപ് വസൂരി വാക്സിൻ എടുത്തവരും എംപോക്സ് പ്രതിരോധത്തിനായി വാക്സിൻ സ്വീകരിക്കേണ്ടതുണ്ട്. ഒന്റാറിയോ ഹെൽത്ത് ഇൻഷുറൻസ് പ്ലാൻ (OHIP) കാർഡ് ഇല്ലാത്തവർക്കും ക്ലിനിക്കുകൾ വഴി സൗജന്യമായി വാക്സിൻ ലഭ്യമാണെന്നും അധികൃതർ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
New Mpox variant confirmed in Toronto; Health department issues alert
