വിദേശത്ത് ജനിച്ചവർക്ക് ഇനി കനേഡിയൻ പൗരത്വം എളുപ്പം; പുതിയ നിയമം ഇങ്ങനെ

ഒട്ടാവ :കാനഡയുടെ പൗരത്വ നിയമത്തിലെ ചില പ്രശ്നങ്ങൾ പരിഹരിക്കാൻ ലക്ഷ്യമിട്ടുള്ള ഒരു പുതിയ നിയമം ഇപ്പോൾ പ്രാബല്യത്തിൽ. ഈ നിയമം, “നഷ്ടപ്പെട്ട കനേഡിയൻസ്” എന്നറിയപ്പെടുന്ന നിരവധി ആളുകൾക്ക് അവരുടെ പൗരത്വം തിരികെ കിട്ടാനും സമാധാനത്തോടെ ജീവിക്കാനും കഴിയും. ബുധനാഴ്ച സെനറ്റ് അംഗീകരിച്ച ഈ നിയമത്തിന് വ്യാഴാഴ്ച ‘റോയൽ അസ്സന്റ്’ (രാജകീയ അനുമതി) ലഭിച്ചതോടെയാണ് നിയമമായത്. കാനഡയിൽ ജനിച്ചവരുടെ മക്കൾ വിദേശത്ത് ജനിച്ചാൽ അവർക്ക് പൗരത്വം കൈമാറുന്നതിൽ നേരത്തെ നിയമപ്രകാരം തടസ്സമുണ്ടായിരുന്നു. ഈ വിഷയത്തിൽ കോടതി നിയമം ഭരണഘടനാ വിരുദ്ധമാണെന്ന് വിധിച്ചതിനെ തുടർന്നാണ് പുതിയ മാറ്റങ്ങൾ കൊണ്ടുവന്നത്.

പുതിയ നിയമപ്രകാരം, കാനഡയിൽ ജനിച്ച മാതാപിതാക്കളുടെ മക്കൾ വിദേശത്താണ് ജനിക്കുന്നതെങ്കിലും അവർക്ക് ഇനി കനേഡിയൻ പൗരത്വം ലഭിക്കും. കുട്ടിയുടെ മാതാപിതാക്കൾ, കുട്ടി ജനിക്കുന്നതിന് മുമ്പ് കാനഡയിൽ മൊത്തം മൂന്ന് വർഷമെങ്കിലും താമസിച്ചിരിക്കണം. ഈ വ്യവസ്ഥ കാരണം, വിദേശത്ത് ജനിച്ച രണ്ടാം തലമുറയിലുള്ളവർക്കും (അതായത്, നിങ്ങളുടെ അച്ഛൻ കാനഡയിൽ ജനിച്ചു, നിങ്ങൾ വിദേശത്ത് ജനിച്ചു എങ്കിൽ) വിദേശത്ത് നിന്ന് ദത്തെടുക്കുന്ന കുട്ടികൾക്കും പൗരത്വം എളുപ്പത്തിൽ കിട്ടും.

എന്നാൽ, ദത്തെടുത്ത കുട്ടികളുടെ പൗരത്വ വിഷയത്തിൽ ചില സെനറ്റർമാർ ആശങ്ക അറിയിച്ചു. വിദേശത്ത് നിന്ന് ദത്തെടുക്കുന്ന കുട്ടികൾക്ക് പൗരത്വം ലഭിക്കുന്നതിന് ഈ ‘മൂന്ന് വർഷത്തെ താമസം’ എന്ന നിബന്ധന (substantial connection test) ബാധകമാക്കുന്നത് നീതിയല്ലെന്ന് സെനറ്റർ ഡേവിഡ് ആർനോട്ട് വാദിച്ചു. രാജ്യത്തിനകത്ത് ദത്തെടുക്കുന്ന കുട്ടികൾക്ക് ഈ നിബന്ധനയില്ലാത്തത് പോലെ, വിദേശത്ത് നിന്ന് ദത്തെടുക്കുന്ന കുട്ടികൾക്കും ഇളവ് നൽകണമെന്ന് അദ്ദേഹം ആവശ്യപ്പെട്ടു. കാരണം, വിദേശത്ത് നിന്ന് ദത്തെടുക്കുന്നതിന് മുമ്പ് തന്നെ ധാരാളം പരിശോധനകളും നിയമപരമായ നടപടികളും പൂർത്തിയാക്കുന്നുണ്ടെന്നും അദ്ദേഹം ചൂണ്ടിക്കാട്ടി. ഈ വിഷയം പരിഹരിക്കാൻ ഭാവിയിൽ സർക്കാർ മാറ്റം വരുത്തുമെന്നും അദ്ദേഹം പ്രതീക്ഷ പ്രകടിപ്പിച്ചു.

നിയമം നടപ്പിലാക്കാൻ കോടതി ജനുവരി 20 വരെ സമയം നൽകിയിട്ടുള്ളതിനാൽ ഇപ്പോൾ മാറ്റങ്ങൾ വരുത്താൻ സാധിക്കില്ല. എങ്കിലും, അന്താരാഷ്ട്ര ഉടമ്പടികളുടെ ലംഘനമാണ് ഈ വിവേചനം എന്ന് അഭിഭാഷകർ പറയുന്നു. ദത്തെടുത്ത കുട്ടികളുടെ അവകാശങ്ങൾ സംരക്ഷിക്കാൻ നിയമപരമായ വെല്ലുവിളികൾ (Charter challenge) നേരിടാൻ അഭിഭാഷകർ ഒരുങ്ങുന്നുമുണ്ട്. എങ്കിലും, കോടതിയെ സമീപിക്കുന്നതിന് പകരം നിയമം വഴി തന്നെ ഈ പ്രശ്നം പരിഹരിക്കാൻ കഴിയുമെന്നാണ് അവരുടെ പ്രതീക്ഷ.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Canadian citizenship will now be easier for those born abroad; new law says so