ഒട്ടാവ: കാനഡ ഇമിഗ്രേഷൻ വകുപ്പ് (IRCC) 2026 ജനുവരി 28-ന് പുറത്തുവിട്ട കണക്കുകൾ പ്രകാരം വിവിധ വിസ അപേക്ഷകളുടെ പ്രോസസ്സിംഗ് സമയത്തിൽ വലിയ മാറ്റങ്ങളാണ് രേഖപ്പെടുത്തിയിരിക്കുന്നത്. ഇൻ-കാനഡ അപേക്ഷകർക്ക് ആശ്വാസകരമായി കനേഡിയൻ എക്സ്പീരിയൻസ് ക്ലാസ് (CEC) വഴിയുള്ള പി.ആർ അപേക്ഷകളുടെ സമയം 6 മാസമായി കുറഞ്ഞു. എന്നാൽ ഫെഡറൽ സ്കിൽഡ് വർക്കർ (FSWP), പി.എൻ.പി (Express Entry PNP) എന്നിവ വഴിയുള്ള അപേക്ഷകൾക്ക് ഇപ്പോൾ 7 മാസത്തോളം സമയമെടുക്കുന്നുണ്ട്. പൗരത്വത്തിനായി (Citizenship) അപേക്ഷിക്കുന്നവർക്ക് 13 മാസത്തെ കാത്തിരിപ്പാണ് നിലവിലുള്ളത്. സിറ്റിസൺഷിപ്പ് സർട്ടിഫിക്കറ്റുകൾ ലഭിക്കാൻ 10 മാസവും പുതിയ പി.ആർ കാർഡുകൾക്ക് 62 ദിവസവും എടുക്കുന്നു.
കുടുംബാംഗങ്ങളെ കാനഡയിലേക്ക് കൊണ്ടുവരാൻ ആഗ്രഹിക്കുന്നവർക്ക് പങ്കാളിയുടെ സ്പോൺസർഷിപ്പിനായി (Spouse Sponsorship) 14 മാസം കാത്തിരിക്കേണ്ടി വരും. ക്യുബെക്ക് പ്രവിശ്യയിൽ ഉള്ളവർക്ക് ഇത് 35 മാസം വരെ നീളാം. മാതാപിതാക്കളുടെയും ഗ്രാൻഡ് പാരന്റ്സിന്റെയും സ്പോൺസർഷിപ്പിന് ഏകദേശം 37 മാസമാണ് സമയം കണക്കാക്കുന്നത്. ഇതിനിടയിൽ താൽക്കാലിക വിസകളിൽ ഇന്ത്യയിൽ നിന്നുള്ള വിസിറ്റർ വിസയ്ക്ക് 83 ദിവസവും സ്റ്റഡി പെർമിറ്റിന് വെറും 4 ആഴ്ചയും മതിയാകും. വർക്ക് പെർമിറ്റുകൾക്ക് 8 ആഴ്ച വരെ സമയമെടുക്കുമ്പോൾ കാനഡയ്ക്കകത്ത് നിന്നുള്ള വർക്ക് പെർമിറ്റ് പുതുക്കാൻ (Inside Canada Work Permit) 241 ദിവസം വരെ എടുത്തേക്കാം എന്നത് അപേക്ഷകർ ശ്രദ്ധിക്കേണ്ട കാര്യമാണ്. അപേക്ഷകളിലെ രേഖകൾ കൃത്യമല്ലെങ്കിൽ പ്രോസസ്സിംഗ് സമയം ഇനിയും നീളാൻ സാധ്യതയുള്ളതിനാൽ എല്ലാ രേഖകളും കൃത്യമായി സമർപ്പിക്കാൻ അപേക്ഷകർ ശ്രദ്ധിക്കണം.
കാനഡയിലെ ഏറ്റവും പുതിയ വാർത്തകൾക്കായി:https://chat.whatsapp.com/Ghtm5bIjsVN8SItyDlaj3Q?mode=wwt
New IRCC Processing Times For January 2026
