ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്നവർക്കും നിലവിൽ അപേക്ഷ നൽകി കാത്തിരിക്കുന്നവർക്കും ആശ്വാസകരമായ വിവരങ്ങൾ നൽകിക്കൊണ്ട് ഇമിഗ്രേഷൻ വകുപ്പ് (IRCC) 2025 ഡിസംബർ മാസത്തെ ഏറ്റവും പുതിയ പ്രോസസ്സിംഗ് സമയം പ്രസിദ്ധീകരിച്ചു. ഡിസംബർ 23-ലെ കണക്കുകൾ പ്രകാരം പൗരത്വം, പി.ആർ കാർഡ്, ഫാമിലി സ്പോൺസർഷിപ്പ്, വിസിറ്റർ വിസ തുടങ്ങി വിവിധ വിഭാഗങ്ങളിലെ കാത്തിരിപ്പ് കാലാവധിയിൽ മാറ്റങ്ങൾ വന്നിട്ടുണ്ട്. അപേക്ഷകരിൽ 80 ശതമാനം പേർക്കും അനുഭവപ്പെട്ട കൃത്യമായ സമയപരിധിയാണ് ഐ.ആർ.സി.സി ഇപ്പോൾ പുറത്തുവിട്ടിരിക്കുന്നത്.
പുതിയ റിപ്പോർട്ട് പ്രകാരം കാനഡ പൗരത്വം ലഭിക്കുന്നതിന് ഏകദേശം 13 മാസത്തെ കാത്തിരിപ്പ് ആവശ്യമാണ്. പൗരത്വ സർട്ടിഫിക്കറ്റിനായി 9 മാസം വരെ കാത്തിരിക്കേണ്ടി വരും. പി.ആർ കാർഡുകളുടെ കാര്യത്തിൽ പുതിയ കാർഡ് ലഭിക്കാൻ 55 ദിവസവും കാർഡ് പുതുക്കുന്നതിന് 34 ദിവസവുമാണ് സമയം കണക്കാക്കുന്നത്. കുടുംബാംഗങ്ങളെ സ്പോൺസർ ചെയ്യുന്നവർക്ക് കാനഡയ്ക്ക് പുറത്തുനിന്നുള്ള പങ്കാളിയുടെ അപേക്ഷകൾക്ക് 14 മാസവും മാതാപിതാക്കളുടെ അപേക്ഷകൾക്ക് 40 മാസവും പ്രോസസ്സിംഗ് സമയം വേണ്ടിവരും. ക്യുബെക് പ്രവിശ്യയിൽ പ്രൊവിൻഷ്യൽ അനുമതി കൂടി വേണ്ടതിനാൽ ഈ സമയം 36 മാസം മുതൽ 49 മാസം വരെയായി നീളുന്നു.
ഇന്ത്യയിൽ നിന്നുള്ള വിസിറ്റർ വിസ അപേക്ഷകർക്ക് ശരാശരി 117 ദിവസമാണ് പ്രോസസ്സിംഗ് സമയം. സൂപ്പർ വിസയ്ക്ക് ഇത് 194 ദിവസമായി വർധിച്ചിട്ടുണ്ട്. എന്നാൽ പഠന വിസയുടെ കാര്യത്തിൽ (Study Permit) കാര്യങ്ങൾ വേഗത്തിലാണ്; ഇന്ത്യക്കാർക്ക് 3 ആഴ്ചയ്ക്കുള്ളിൽ ഇതിൽ തീരുമാനം അറിയാം. വർക്ക് പെർമിറ്റിന് 9 ആഴ്ചയാണ് ശരാശരി സമയം. എക്സ്പ്രസ് എൻട്രി വിഭാഗത്തിലെ കാത്തിരിപ്പ് ഏകദേശം 6 മുതൽ 7 മാസം വരെയാണ്. ഓരോ രാജ്യത്തെയും അപേക്ഷകരുടെ എണ്ണവും രേഖകളുടെ കൃത്യതയും അനുസരിച്ച് ഈ സമയപരിധിയിൽ മാറ്റങ്ങൾ വരാമെന്നും അപേക്ഷകർ കൃത്യമായ ഇടവേളകളിൽ വെബ്സൈറ്റ് പരിശോധിച്ച് വിവരങ്ങൾ ഉറപ്പാക്കണമെന്നും ഐ.ആർ.സി.സി നിർദ്ദേശിച്ചു.
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New IRCC Processing Times As Of December 2025
