കാനഡയിൽ അടിമുടി മാറ്റം: ഏപ്രിൽ ഒന്നു മുതൽ സാധാരണക്കാർക്ക് ആശ്വാസമായി പുതിയ ഫെഡറൽ നിയമങ്ങൾ

ഒന്റാറിയോ: കാനഡയിലെ പൊതുജനങ്ങളെ നേരിട്ട് ബാധിക്കുന്ന പ്രധാന നിയമങ്ങളിലും സാമ്പത്തിക നയങ്ങളിലും മാറ്റം വരുത്തി ഫെഡറൽ സർക്കാർ. രാജ്യത്തെ കോടിക്കണക്കിന് ആളുകളുടെ നിത്യജീവിതത്തെയും സാമ്പത്തിക നിലയെയും സ്വാധീനിക്കുന്ന ഈ പുതിയ ചട്ടങ്ങൾ 2026 ഏപ്രിൽ മാസം മുതൽ പ്രാബല്യത്തിൽ വരുമെന്ന് അധികൃതർ അറിയിച്ചു. ഫെഡറൽ തലത്തിൽ നടപ്പിലാക്കുന്ന ഈ മാറ്റങ്ങൾ ആരോഗ്യ സേവനങ്ങൾ, കുറഞ്ഞ വേതനം, നികുതി ആനുകൂല്യങ്ങൾ, ബാങ്കിംഗ് ഫീസുകൾ എന്നിവയുൾപ്പെടെയുള്ള വിവിധ മേഖലകളിൽ വലിയ സ്വാധീനം ചെലുത്തും.

ആരോഗ്യമേഖലയിൽ വിപ്ലവകരമായ മാറ്റം
പുതിയ കാനഡ ഹെൽത്ത് ആക്ട് (Canada Health Act) സേവന നയം ഏപ്രിൽ ഒന്ന് മുതൽ നിലവിൽ വരും. ഇതനുസരിച്ച് ഡോക്ടർമാർക്ക് പുറമെ നഴ്സ് പ്രാക്ടീഷണർമാർ, ഫാർമസിസ്റ്റുകൾ, മിഡ്വൈഫുകൾ എന്നിവർ നൽകുന്ന ചികിത്സാ സേവനങ്ങളും ഇനി മുതൽ ഇൻഷുറൻസ് പരിധിയിൽ വരും. ഇതിനായി രോഗികളിൽ നിന്ന് അധിക പണം ഈടാക്കുന്നത് ‘എക്സ്ട്രാ ബില്ലിംഗ്’ ആയി കണക്കാക്കി കർശന നടപടി സ്വീകരിക്കും. കുടുംബ ഡോക്ടർമാരുടെ സേവനം ലഭ്യമല്ലാത്ത 60 ലക്ഷത്തോളം പേർക്ക് ഈ പരിഷ്‌കാരം വലിയ ആശ്വാസമാകും നൽകുക.

വേതന വർധനയും ഗ്രോസറി ബെനിഫിറ്റും
ഫെഡറൽ പരിധിയിൽ വരുന്ന ബാങ്കിംഗ്, എയർലൈൻ, ടെലികോം, ട്രാൻസ്പോർട്ട് മേഖലകളിലെ തൊഴിലാളികളുടെ കുറഞ്ഞ വേതനം മണിക്കൂറിന് 17.75 ഡോളറിൽ നിന്ന് 18.15 ഡോളറായി വർധിപ്പിച്ചു. ഏകദേശം 11 ലക്ഷം തൊഴിലാളികൾക്ക് ഇതിന്റെ പ്രയോജനം ലഭിക്കും. കൂടാതെ, വിലക്കയറ്റം നേരിടുന്നതിനായി 1.2 കോടി ജനങ്ങൾക്ക് ‘കാനഡ ഗ്രോസറി ആൻഡ് എസൻഷ്യൽസ് ബെനിഫിറ്റ്’ (Canada Groceries & Essentials Benefit) വഴി സാമ്പത്തിക സഹായം നൽകും. ജി.എസ്.ടി ക്രെഡിറ്റിന്റെ പുതുക്കിയ രൂപമായ ഈ പദ്ധതിയിലൂടെ അർഹരായവർക്ക് ഒറ്റത്തവണയായി നിശ്ചിത തുക അധികമായി ലഭിക്കും.

മറ്റ് പ്രധാന മാറ്റങ്ങൾ:

• ബാങ്ക് പിഴ കുറച്ചു: അക്കൗണ്ടിൽ മതിയായ ബാലൻസ് ഇല്ലാത്ത സാഹചര്യത്തിൽ ഈടാക്കുന്ന എൻ.എസ്.എഫ് (NSF) ഫീസ് 45-48 ഡോളറിൽ നിന്നും 10 ഡോളറായി കുറച്ചു. മാർച്ച് 12 മുതൽ ഇത് പ്രാബല്യത്തിലായി.
• മദ്യത്തിന് വില കൂടും: ഏപ്രിൽ ഒന്ന് മുതൽ ബിയർ ഉൾപ്പെടെയുള്ള മദ്യങ്ങളുടെ എക്സൈസ് ഡ്യൂട്ടിയിൽ രണ്ട് ശതമാനം വർധനവുണ്ടാകും.
• ടാക്സ് ഡെഡ്‌ലൈൻ: 2025 നികുതി വർഷത്തെ റിട്ടേണുകൾ സമർപ്പിക്കാനുള്ള അവസാന തീയതി ഏപ്രിൽ 30 ആണ്. നിശ്ചിത സമയത്തിനകം ടാക്സ് ഫയൽ ചെയ്യുന്നവർക്ക് മാത്രമേ പുതിയ ഗ്രോസറി ബെനിഫിറ്റ് ഉൾപ്പെടെയുള്ള ആനുകൂല്യങ്ങൾ ലഭിക്കൂ.
• ബൈ കനേഡിയൻ നയം: സർക്കാർ കരാറുകളിൽ കനേഡിയൻ കമ്പനികൾക്ക് മുൻഗണന നൽകുന്ന നയം ഈ സ്പ്രിംഗ് സീസൺ മുതൽ നടപ്പിലാക്കും.

രാജ്യത്തെ സാധാരണക്കാരുടെ സാമ്പത്തിക ഭദ്രത ഉറപ്പാക്കുന്നതിനും സേവനങ്ങൾ കൂടുതൽ സുതാര്യമാക്കുന്നതിനുമാണ് പുതിയ ചട്ടങ്ങളിലൂടെ സർക്കാർ ലക്ഷ്യമിടുന്നത്.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Drastic change in Canada: New federal laws bring relief to ordinary people from April 1