ഒട്ടാവ: കാനഡയിലെ സാമ്പത്തിക വിഭാഗം (Economic Class) സ്ഥിരതാമസക്കാർക്ക് നൽകിവരുന്ന സൗജന്യ സെറ്റിൽമെന്റ് സേവനങ്ങളിൽ വലിയ നിയന്ത്രണങ്ങൾ ഏർപ്പെടുത്തിക്കൊണ്ട് ഇമിഗ്രേഷൻ വകുപ്പിന്റെ (IRCC) പുതിയ ഉത്തരവ് പുറത്തിറങ്ങി. ഏപ്രിൽ 1, 2026 മുതൽ പ്രാബല്യത്തിൽ വരുന്ന പുതിയ നിയമപ്രകാരം, സൗജന്യ സേവനങ്ങൾ ലഭിക്കുന്നതിനുള്ള കാലാവധി കൃത്യമായി പരിമിതപ്പെടുത്തിയിരിക്കുകയാണ്. ഇതുവരെ കനേഡിയൻ പൗരത്വം ലഭിക്കുന്നത് വരെ എത്ര വർഷം വേണമെങ്കിലും കുടിയേറ്റക്കാർക്ക് ഇത്തരം സേവനങ്ങൾ പ്രയോജനപ്പെടുത്താമായിരുന്നു. എന്നാൽ പുതിയ മാറ്റമനുസരിച്ച് പി.ആർ. ലഭിച്ച് ആറ് വർഷം വരെ മാത്രമേ ഈ ആനുകൂല്യങ്ങൾ ലഭിക്കൂ. 2027 ഏപ്രിൽ ഒന്നുമുതൽ ഈ കാലാവധി വീണ്ടും കുറച്ച് അഞ്ച് വർഷമാക്കാനും സർക്കാർ തീരുമാനിച്ചിട്ടുണ്ട്.
ഈ നിയമം മുൻകാല പ്രാബല്യത്തോടെ നടപ്പിലാക്കുന്നതിനാൽ നിലവിൽ കാനഡയിലുള്ളവരെയും ഇത് കാര്യമായി ബാധിക്കും. ഉദാഹരണത്തിന്, 2020 ഏപ്രിൽ ഒന്നിനോ അതിന് മുൻപോ സ്ഥിരതാമസം (PR) ലഭിച്ചവർക്ക് ഈ വരുന്ന ഏപ്രിൽ ഒന്നോടെ എല്ലാ സൗജന്യ സേവനങ്ങളും നഷ്ടപ്പെടും. എക്സ്പ്രസ് എൻട്രി, പി.എൻ.പി (PNP), അറ്റ്ലാന്റിക് ഇമിഗ്രേഷൻ പ്രോഗ്രാം തുടങ്ങിയ സാമ്പത്തിക കുടിയേറ്റ പദ്ധതികൾ വഴി എത്തിയവർക്കും അവരുടെ കുടുംബാംഗങ്ങൾക്കുമാണ് ഈ നിയന്ത്രണം ബാധകമാകുന്നത്. എന്നാൽ കുടുംബ സ്പോൺസർഷിപ്പ് വഴിയെത്തിയവർക്കും അഭയാർത്ഥികൾക്കും ഈ സമയപരിധി ബാധകമല്ല.
സൗജന്യ ഭാഷാ പഠന ക്ലാസുകൾ (LINC), തൊഴിൽ പരിശീലനങ്ങൾ, കരിയർ കോച്ചിംഗ്, വിദേശ വിദ്യാഭ്യാസ രേഖകൾ അംഗീകരിപ്പിക്കാനുള്ള സഹായങ്ങൾ എന്നിവയെല്ലാമാണ് ഈ സമയപരിധി കഴിയുന്നതോടെ അപേക്ഷകർക്ക് നഷ്ടമാകുക. സ്വകാര്യ മേഖലയിൽ പതിനായിരക്കണക്കിന് ഡോളർ ചിലവ് വരുന്ന ഇത്തരം സേവനങ്ങളാണ് സർക്കാർ സൗജന്യമായി നൽകിയിരുന്നത്. കുടിയേറ്റക്കാർ കാനഡയിലെ ആദ്യ വർഷങ്ങളിൽ തന്നെ ഈ സേവനങ്ങൾ പ്രയോജനപ്പെടുത്തി സ്വയംപര്യാപ്തരാകുന്നു എന്ന് ഉറപ്പാക്കാനും സാമ്പത്തിക ലാഭത്തിനുമാണ് സർക്കാർ ഇത്തരമൊരു നടപടി സ്വീകരിക്കുന്നത്. അതിനാൽ ഓരോ സ്ഥിരതാമസക്കാരും തങ്ങളുടെ പി.ആർ. ലഭിച്ച തീയതി പരിശോധിച്ച് കാലാവധി തീരുന്നതിന് മുൻപ് ലഭ്യമായ സേവനങ്ങൾ പരമാവധി ഉപയോഗപ്പെടുത്തണമെന്ന് അധികൃതർ നിർദ്ദേശിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Canada Stricter Newcomer Services Rules Effective April 1
