ടൊറന്റോ: കാനഡയിലെ പ്രശസ്തമായ ‘ബ്രെഡ് വില ഒത്തുകളി’ കേസിൽ അനുകൂല വിധി സമ്പാദിച്ച ഉപഭോക്താക്കൾക്ക് ഒടുവിൽ കാത്തിരുന്ന നഷ്ടപരിഹാര തുക ലഭിച്ചു തുടങ്ങി. പാക്കേജ്ഡ് ബ്രെഡ് നിർമ്മാതാക്കളായ ‘കാനഡ ബ്രെഡ്’ കമ്പനിയിൽ നിന്നും ലഭിക്കേണ്ട തുകയാണ് ഇപ്പോൾ ഉപഭോക്താക്കളുടെ അക്കൗണ്ടുകളിലേക്ക് എത്തിക്കൊണ്ടിരിക്കുന്നത്. 2026 മെയ് 11 മുതൽ തുക വിതരണം ചെയ്യാൻ ആരംഭിച്ചതായി സെറ്റിൽമെന്റ് വെബ്സൈറ്റ് ഔദ്യോഗികമായി സ്ഥിരീകരിച്ചു. അപേക്ഷകരുടെ എണ്ണം വളരെ കൂടുതലായതിനാൽ ഘട്ടം ഘട്ടമായാണ് പണം കൈമാറുന്നത്.
കഴിഞ്ഞ വർഷം ഡിസംബർ 12-നകം കൃത്യമായി അപേക്ഷ സമർപ്പിച്ച്, അംഗീകരിക്കപ്പെട്ട ക്ലെയിമുകൾ ഉള്ളവർക്കാണ് ഇപ്പോൾ പണം ലഭിക്കുന്നത്. മുൻപ് ‘ലോബ്ലോ കാർഡ് പ്രോഗ്രാമിൽ’ പങ്കെടുക്കാത്ത ഉപഭോക്താക്കൾക്ക് 49.11 ഡോളർ മുഴുവനായി ലഭിക്കുമ്പോൾ, മുൻപ് ലോബ്ലോ കാർഡ് വഴി ആനുകൂല്യം കൈപ്പറ്റിയവർക്ക് നിലവിൽ 24.11 ഡോളർ മാത്രമേ ലഭിക്കൂ. ബാങ്ക് ഇ-ട്രാൻസ്ഫറിന് പകരം ചെക്ക് വഴി പണം സ്വീകരിക്കുന്നവർക്ക് പ്രൊസസിംഗ് ഫീസായി 2 ഡോളർ കുറച്ചേ ലഭിക്കൂ എന്ന് മാത്രമല്ല തപാൽ വഴി വരുന്നത് കൊണ്ട് ഇവർക്ക് പണം ലഭിക്കാൻ കൂടുതൽ സമയമെടുക്കുകയും ചെയ്യും.
പണം വിതരണം ആരംഭിച്ചതോടെ കാനഡയിൽ വ്യാജ തട്ടിപ്പുകാരും സജീവമായിട്ടുണ്ട്. യഥാർത്ഥ Interac e-Transfer പണമിടപാട് സന്ദേശങ്ങൾ notify@payments.interac.ca എന്ന ഔദ്യോഗിക ഇമെയിൽ വിലാസത്തിൽ നിന്ന് മാത്രമേ വരൂ എന്ന് അധികൃതർ അറിയിച്ചു. ഈ സെറ്റിൽമെന്റുമായി ബന്ധപ്പെട്ട് യാതൊരുവിധ SMS സന്ദേശങ്ങളും അധികൃതർ അയക്കുന്നതല്ല. ലിങ്കുകളിൽ ക്ലിക്ക് ചെയ്യാനോ ബാങ്ക് വിവരങ്ങൾ നൽകാനോ ആവശ്യപ്പെടുന്ന ഫോൺ സന്ദേശങ്ങൾ പൂർണ്ണമായും അവഗണിക്കണമെന്നും മുന്നറിയിപ്പുണ്ട്.
നിങ്ങൾ മുൻപ് അപേക്ഷിച്ച വ്യക്തിയാണെങ്കിൽ ഇമെയിലിലെ ‘Junk’ അല്ലെങ്കിൽ ‘Spam’ ഫോൾഡറുകൾ കൂടി പരിശോധിക്കേണ്ടതാണ്. ക്ലെയിം സമർപ്പിക്കാനുള്ള അവസാന തീയതി കഴിഞ്ഞതിനാൽ പുതിയതായി ആർക്കും ഇനി ഇതിനായി അപേക്ഷിക്കാൻ സാധിക്കില്ല. ഒട്ടനവധി ആളുകൾക്ക് പണം അയക്കാനുള്ളതിനാൽ വരും ദിവസങ്ങളിൽ ബാക്കിയുള്ളവർക്കും തുക അക്കൗണ്ടിൽ എത്തുമെന്നാണ് അഡ്മിനിസ്ട്രേറ്റർ വ്യക്തമാക്കുന്നത്.
New Canada Bread Settlement Payments Are Now Going Out
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
