ഫ്രഞ്ചിൽ സംസാരിച്ചില്ല, ഔദ്യോഗിക ഭാഷാ അവകാശം ലംഘിച്ചു; ന്യൂ ബ്രൺസ്‌വിക്കിൽ ആശുപത്രിക്ക് പിഴ, കോടതിയുടെ സുപ്രധാന വിധി

മോൺക്ടൺ: ഔദ്യോഗിക ഭാഷാ അവകാശം ലംഘിച്ചതിന് ന്യൂ ബ്രൺസ്‌വിക്കിലെ ആശുപത്രിക്ക് $5,000 പിഴ ചുമത്തി കോടതി. മോൺക്ടൺ നിവാസിയായ പോൾ ഔല്ലറ്റിന് ഫ്രഞ്ച് ഭാഷയിൽ സേവനം ലഭിക്കാതിരുന്നതിനെത്തുടർന്ന് അദ്ദേഹം നൽകിയ കേസിലാണ് വിധി. വ്യക്തിയുടെ ഭാഷാപരമായ അവകാശ ലംഘനത്തിന് നഷ്ടപരിഹാരം നൽകാൻ ന്യൂ ബ്രൺസ്‌വിക്ക് കോടതി ഉത്തരവിടുന്നത് ഇതാദ്യമാണ്.

2020 മെയ് മുതൽ ഓഗസ്റ്റ് വരെ മോൺക്ടൺ ആശുപത്രിയിലെ സൈക്യാട്രിക് യൂണിറ്റിൽ സഹോദരിയുടെ പരിചരണത്തിനായി എത്തിയപ്പോഴാണ് തനിക്ക് ഫ്രഞ്ച് ഭാഷയിൽ സേവനം ലഭിച്ചില്ലെന്ന് ആരോപിച്ച് ഔല്ലറ്റ് ഹോറൈസൺ ഹെൽത്ത് നെറ്റ്‌വർക്കിനെതിരെ പരാതി നൽകിയത്. ഈ കാലയളവിൽ ജീവനക്കാർ ഫ്രഞ്ചിൽ സേവനം നൽകുന്നതിൽ പരാജയപ്പെട്ടതുമായി ബന്ധപ്പെട്ട് അദ്ദേഹം 13 പ്രത്യേക സംഭവങ്ങൾ കോടതിയിൽ ചൂണ്ടിക്കാട്ടി.

ഔല്ലറ്റ് ഇംഗ്ലീഷും ഫ്രഞ്ചും മാറി ഉപയോഗിച്ചെന്നും, ചില സമയങ്ങളിൽ അദ്ദേഹത്തിൻ്റെ പെരുമാറ്റം ഭീഷണിപ്പെടുത്തുന്നതായിരുന്നു എന്നും ഹോറൈസൺ ഹെൽത്ത് നെറ്റ്‌വർക്കിൻ്റെ അഭിഭാഷകർ വാദിച്ചിരുന്നു.എന്നാൽ, ഈ വാദങ്ങൾ ഭാഷാപരമായ അവകാശം നിഷേധിക്കുന്നതിനുള്ള നിയമപരമായ കാരണങ്ങളല്ലെന്ന് കിംഗ്‌സ് ബെഞ്ച് കോടതിയിലെ ജഡ്ജി മായ ഹമൂ (Maya Hamou) ഒക്ടോബർ 31-ന് പുറത്തിറക്കിയ വിധിയിൽ വ്യക്തമാക്കി. “താൻ തിരഞ്ഞെടുത്ത ഭാഷയിൽ സേവനം ലഭിക്കാതെ വരുമ്പോൾ ഒരു പൗരൻ നിരാശനാവുകയും ആശയവിനിമയത്തിനായി മറ്റൊരു ഭാഷ ഉപയോഗിക്കുകയും ചെയ്യുന്നത് മനസ്സിലാക്കാവുന്നതേയുള്ളൂ,” എന്നും ജഡ്ജി നിരീക്ഷിച്ചു.

ഹോറൈസൺ ഹെൽത്ത് നെറ്റ്‌വർക്ക് പോൾ ഔല്ലറ്റിന് $5,000 നഷ്ടപരിഹാരം നൽകണം. കൂടാതെ, ഔല്ലറ്റിൻ്റെ നിയമപരമായ ചെലവുകൾക്കായി $7,500 കൂടി നൽകാനും കോടതി ഉത്തരവിട്ടു. ന്യൂ ബ്രൺസ്‌വിക്കിൽ ആദ്യമായാണ് വ്യക്തിഗത ഭാഷാ അവകാശ ലംഘനത്തിന് കോടതി നഷ്ടപരിഹാരം വിധിക്കുന്നത്. ഈ വിധി ഒരു മുന്നറിയിപ്പായി നിലകൊള്ളുമെന്നും പൊതു സ്ഥാപനങ്ങൾ ഭാഷാ അവകാശങ്ങൾ ഉറപ്പാക്കാൻ ജാഗ്രത പാലിക്കണമെന്ന ശക്തമായ സന്ദേശമാണ് നൽകുന്നതെന്നും ഔല്ലറ്റിൻ്റെ അഭിഭാഷകൻ ഡോമിനിക് കരോൺ പറഞ്ഞു.

കോടതി വിധി അംഗീകരിക്കുന്നതായും അപ്പീൽ നൽകാൻ ഉദ്ദേശിക്കുന്നില്ലെന്നും ഹോറൈസൺ ഹെൽത്ത് നെറ്റ്‌വർക്ക് അറിയിച്ചു. ഔദ്യോഗിക ഭാഷാ നിയമങ്ങൾക്കനുസൃതമായി രണ്ട് ഔദ്യോഗിക ഭാഷകളിലും സേവനങ്ങൾ നൽകാൻ തങ്ങൾ പ്രതിജ്ഞാബദ്ധരാണെന്നും അവർ പ്രസ്താവനയിൽ വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

New Brunswick hospital ordered to pay man $5K because staff didn’t speak French