ടൊറന്റോ: പാൻക്രിയാറ്റിക് കാൻസർ രോഗികളുടെ ആയുസ്സ് ഇരട്ടിയാക്കാൻ സഹായിക്കുന്ന പുതിയ ഗുളികയുടെ പരീക്ഷണം ഉടൻ ആരംഭിക്കാനൊരുങ്ങി കാനഡ. അമേരിക്കയിൽ 500 രോഗികളിൽ വിജയകരമായി പൂർത്തിയാക്കിയ മൂന്നാംഘട്ട പരീക്ഷണങ്ങളുടെ പശ്ചാത്തലത്തിലാണ് കാനഡയിലും ഇതിനുള്ള നടപടികൾ വേഗത്തിലാക്കുന്നത്. ‘ഡാരാക്സോൺറാസിബ്’ (Daraxonrasib) എന്ന് പേരിട്ടിരിക്കുന്ന ഈ മരുന്ന് പാൻക്രിയാറ്റിക് കാൻസർ ചികിത്സാ രംഗത്ത് വലിയ പ്രതീക്ഷയാണ് നൽകുന്നതെന്ന് ടൊറന്റോയിലെ പ്രിൻസസ് മാർഗരറ്റ് കാൻസർ സെന്റർ മേധാവി ഡോ. ജെന്നിഫർ നോക്സ് വ്യക്തമാക്കി. അമേരിക്കയിൽ നടന്ന രാജ്യാന്തര മെഡിക്കൽ സമ്മേളനത്തിലാണ് പുതിയ പഠനവിവരങ്ങൾ ഔദ്യോഗികമായി പുറത്തുവിട്ടത്.
പാൻക്രിയാറ്റിക് കാൻസറിന് കാരണമാകുന്ന ‘ആർ.എ.എസ്’ (RAS) എന്ന പ്രോട്ടീന്റെ പ്രവർത്തനത്തെ തടഞ്ഞാണ് ഈ ഗുളിക രോഗവ്യാപനം നിയന്ത്രിക്കുന്നത്. കാൻസർ ബാധിതരിൽ 90 ശതമാനത്തിലധികം പേരിലും ഈ പ്രോട്ടീന്റെ അമിതവളർച്ചയാണ് രോഗം ഗുരുതരമാക്കുന്നത്. സാധാരണ കീമോതെറാപ്പി ചികിത്സ മാത്രം ലഭിച്ച രോഗികൾ ശരാശരി ആറുമാസം മാത്രം ജീവിച്ചിരുന്ന സ്ഥാനത്ത്, ദിവസേന ഈ പുതിയ ഗുളിക കഴിച്ചവർ ഒരു വർഷത്തിലധികം ആരോഗ്യത്തോടെ ജീവിച്ചിരുന്നതായി പരീക്ഷണങ്ങളിൽ കണ്ടെത്തി. കൂടാതെ, രോഗികൾക്ക് ശാരീരിക വേദന കുറയുകയും ജീവിതനിലവാരം മെച്ചപ്പെടുകയും ചെയ്തതായും പഠന റിപ്പോർട്ടിൽ പറയുന്നു. ത്വക്കിലെ ചൊറിച്ചിൽ, വായ്പ്പുണ്ണ് എന്നിവയാണ് മരുന്നിന്റെ പ്രധാന പാർശ്വഫലങ്ങളായി രേഖപ്പെടുത്തിയിട്ടുള്ളത്.
മരുന്ന് വിപണിയിലെത്തിക്കുന്നതിനായി നിർമ്മാതാക്കളായ റെവല്യൂഷൻ മെഡിസിൻസ് അമേരിക്കൻ ഭക്ഷ്യ-മരുന്ന് നിയന്ത്രണ ഏജൻസിക്ക് (FDA) ഇതിനകം അപേക്ഷ സമർപ്പിച്ചിട്ടുണ്ട്. നിലവിൽ കാനഡയിൽ ലൈസൻസിനായുള്ള ഔദ്യോഗിക അപേക്ഷകൾ ലഭിച്ചിട്ടില്ലെന്ന് ഹെൽത്ത് കാനഡ അറിയിച്ചിട്ടുണ്ടെങ്കിലും, അനുമതി കാത്തുനിൽക്കാതെ തന്നെ ക്ലിനിക്കൽ പരീക്ഷണങ്ങളിലൂടെ കൂടുതൽ രോഗികൾക്ക് ഈ ചികിത്സ ലഭ്യമാക്കാനാണ് ഗവേഷകരുടെ തീരുമാനം. മുൻപ് ഒരുതവണ കീമോതെറാപ്പിക്ക് വിധേയരായവരിലാണ് ഈ മരുന്ന് പരീക്ഷിച്ചത്. കാൻസർ രോഗത്തിന്റെ തുടക്കത്തിൽ തന്നെ ഈ മരുന്ന് നൽകിയാൽ കൂടുതൽ മികച്ച ഫലം ലഭിക്കുമോ എന്ന കാര്യത്തിലാണ് ഗവേഷകർ ഇനി അടുത്ത ഘട്ടത്തിൽ പഠനം നടത്തുക.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
New breakthrough in pancreatic cancer treatment; Canada set to test life-extending pill
