ദശാബ്ദങ്ങൾ കണ്ട ഏറ്റവും ഭീകരമായ പ്രളയത്തിൽ നേപ്പാളിലെ തുരങ്കത്തിനുള്ളിൽ വെളിച്ചമോ ഭക്ഷണമോ ഇല്ലാതെ ഒമ്പത് ദിവസത്തോളം കുടുങ്ങിക്കിടന്ന രണ്ട് പേർ അത്ഭുതകരമായി ജീവിതത്തിലേക്ക് തിരിച്ചെത്തി. അപ്പർ ത്രിശൂലി 3എ ജലവൈദ്യുത പദ്ധതിയിലെ തൊഴിലാളിയായ കബീർ മഹർജൻ, മെക്കാനിക്കൽ ഫോർമാൻ സഞ്ജയ് സാഹ എന്നിവരാണ് ദിവസങ്ങളോളം ചെളിവെള്ളക്കെട്ടിൽ മരണത്തോട് മല്ലിട്ട് രക്ഷപെട്ടത്. ആഗസ്റ്റ് 26-ന് ലാംഗ്താംഗ് ലിറുങ് മലനിരകളിൽ ഹിമാനി തകർന്നുണ്ടായ ശക്തമായ മലവെള്ളപ്പാച്ചിലിലാണ് ഇവർ അപകടത്തിൽപ്പെട്ടത്. നൂറുകണക്കിന് ജീവനക്കാരെ കാണാതാവുകയും 1,300-ലധികം ആളുകൾ കൊല്ലപ്പെടുകയും ചെയ്ത വൻ ദുരന്തമായിരുന്നു ഇത്.
ദുരന്ത ദിവസം രാവിലെ 7:30-ഓടെ ജോലിക്ക് കയറുന്നതിന് മുൻപ് കബീർ മഹർജൻ തന്റെ ഭാര്യയോട് ഫോണിൽ സംസാരിച്ചിരുന്നു. “ഞാൻ തുരങ്കത്തിനുള്ളിലേക്ക് പോവുകയാണ്, അവിടെ നെറ്റ്വർക്ക് ഉണ്ടാകില്ല” എന്നായിരുന്നു അദ്ദേഹം പറഞ്ഞത്. തൊട്ടുപിന്നാലെ 25 മൈൽ അകലെയുണ്ടായ ഹിമാനി തകർച്ചയെ തുടർന്നുണ്ടായ ശക്തമായ മലവെള്ളപ്പാച്ചിൽ ഗ്രാമങ്ങളെ തച്ചുടയ്ക്കുകയും 900-ത്തോളം തൊഴിലാളികൾ ജോലി ചെയ്തിരുന്ന ജലവൈദ്യുത പദ്ധതികളെ വെള്ളത്തിനടിയിലാക്കുകയും ചെയ്യുകയായിരുന്നു. കൺട്രോൾ റൂമിലുണ്ടായിരുന്ന സഞ്ജയ് സാഹ ജീവനക്കാരെ നേരിട്ട് കണ്ട് മുന്നറിയിപ്പ് നൽകാൻ ശ്രമിച്ചെങ്കിലും അതിവേഗം പാഞ്ഞെത്തിയ ജലപ്രവാഹം എല്ലാം വിഴുങ്ങി.
തുരങ്കത്തിനുള്ളിലെ വായുസഞ്ചാരമുള്ള ഒരു അറയിലാണ് ഇരുവരും പെട്ടുപോയതെന്ന് രക്ഷാപ്രവർത്തനത്തിന് നേതൃത്വം നൽകിയ തുരങ്ക നിർമ്മാണ വിദഗ്ദ്ധനും എം.എൽ.എയുമായ ശ്രീ റാം നെയ്പാനെ വ്യക്തമാക്കി. ദിവസങ്ങളോളം വെളിച്ചമോ ഭക്ഷണമോ ഇല്ലാതെ ഇരുട്ടിൽ കഴിഞ്ഞ ഇവർ ബോധം നഷ്ടപ്പെട്ട നിലയിലായിരുന്നു. അത്ഭുതകരമായ ഈ രക്ഷാപ്രവർത്തനം ദുരന്തമുഖത്ത് തെരച്ചിൽ നടത്തുന്നവർക്ക് പുതിയ പ്രതീക്ഷയാണ് നൽകിയിരിക്കുന്നത്. രക്ഷാപ്രവർത്തനം തുടരുന്നതിനിടയിൽ തുരങ്കങ്ങളിൽ ഇനിയും കുടുങ്ങിക്കിടക്കുന്ന 121 തൊഴിലാളികളെ ജീവനോടെ കണ്ടെത്താനാകുമെന്ന പ്രതീക്ഷയിലാണ് അധികൃതർ.
ആശുപത്രിയിൽ കിടന്ന് ബോധം വീണ കബീർ മഹർജൻ ആദ്യം തന്റെ ഭാര്യയെ തിരിച്ചറിഞ്ഞിരുന്നില്ല. തനിക്ക് കിടക്കാൻ എന്തുകൊണ്ട് നേരത്തെ ബെഡ് നൽകിയില്ല എന്ന് അദ്ദേഹം അവരോട് ആശയക്കുഴപ്പത്തോടെ ചോദിക്കുകയുണ്ടായി. നിലവിൽ ചികിത്സയിൽ കഴിയുന്ന ഇരുവരുടെയും ആരോഗ്യനില വീണ്ടെടുത്തുവരികയാണ്. ജലവൈദ്യുത പദ്ധതിയുടെ കൺട്രോൾ റൂമിലെ നിരീക്ഷണ സംവിധാനങ്ങൾ ഓരോന്നായി നിശ്ചലമായതോടെയാണ് അധികൃതർ അപകടത്തിന്റെ വ്യാപ്തി തിരിച്ചറിഞ്ഞത്. തുടർന്ന് നൽകിയ അടിയന്തര ഒഴിപ്പിക്കൽ നിർദ്ദേശത്തിന് തൊട്ടുമുമ്പാണ് ഇവർ തുരങ്കത്തിന് ഉള്ളിൽ പെട്ടുപോയത്.
സെപ്റ്റംബർ നാലാം തീയതിയാണ് റാസുവ ജില്ലയിലെ ഭോട്ടെകോശി നദിക്ക് സമീപമുള്ള ത്രിശൂലി-3എ ജലവൈദ്യുത പദ്ധതിയുടെ തുരങ്കത്തിൽ നിന്ന് ഇവരെ രക്ഷാപ്രവർത്തകർ പുറത്തെത്തിച്ചത്. നേപ്പാൾ ആർമിയുടെയും പ്രത്യേക രക്ഷാസംഘത്തിന്റെയും നേതൃത്വത്തിലാണ് ഈ സാഹസിക ദൗത്യം വിജയകരമായി പൂർത്തിയാക്കിയത്. തൊഴിലാളികൾക്ക് രക്ഷപ്പെടാൻ യഥാർത്ഥത്തിൽ ഒരു എമർജൻസി ഏണികൂടി ഉണ്ടായിരുന്നിട്ടും അതിനെക്കുറിച്ച് അറിയാത്തത് ദുരന്തത്തിന്റെ ആഘാതം വർദ്ധിപ്പിച്ചതായി പിന്നീട് നടത്തിയ പരിശോധനകളിൽ വ്യക്തമായിട്ടുണ്ട്. സംഭവത്തിൽ വിശദമായ അന്വേഷണവും അവലോകനങ്ങളും തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
