ഒട്ടാവ: ബ്രിട്ടീഷ് കൊളംബിയയിൽ ആകാശത്ത് പ്രത്യക്ഷപ്പെട്ട നിഗൂഢമായ പ്രകാശം ജനങ്ങൾക്കിടയിൽ വലിയ പരിഭ്രാന്തി പരത്തി. ചൊവ്വാഴ്ച രാത്രി പത്ത് മണിയോടെ ആകാശത്ത് പതുക്കെ നീങ്ങുന്ന വെളിച്ചം കണ്ടതോടെ ഇത് അന്യഗ്രഹ ജീവികളുടെ വാഹനമാണോ എന്ന തരത്തിലുള്ള ചർച്ചകൾ സോഷ്യൽ മീഡിയയിൽ സജീവമായി. വില്ല്യംസ് ലേക്ക്, പ്രിൻസ് ജോർജ്ജ് തുടങ്ങിയ നഗരങ്ങളിലുള്ളവർ ഭീതിയോടെയും അത്ഭുതത്തോടെയുമാണ് ഈ ദൃശ്യങ്ങൾ പകർത്തിയത്. എന്നാൽ മണിക്കൂറുകൾക്കുള്ളിൽ തന്നെ ഈ നിഗൂഢതയുടെ ചുരുളഴിക്കാൻ ശാസ്ത്രജ്ഞർക്ക് സാധിച്ചു.
യഥാർത്ഥത്തിൽ ഇലോൺ മസ്കിന്റെ ഉടമസ്ഥതയിലുള്ള സ്പേസ് എക്സ് വിക്ഷേപിച്ച ഫാൽക്കൺ 9 റോക്കറ്റാണ് ആകാശത്ത് ഇത്തരമൊരു കാഴ്ചയൊരുക്കിയത്. കാലിഫോർണിയയിലെ വാൻഡൻബെർഗ് സ്പേസ് ഫോഴ്സ് ബേസിൽ നിന്നാണ് റോക്കറ്റ് വിക്ഷേപിച്ചത്. റോക്കറ്റിന്റെ രണ്ടാം ഘട്ടം അന്തരീക്ഷത്തിന്റെ മുകൾത്തട്ടിലേക്ക് പ്രവേശിക്കുമ്പോൾ പുറന്തള്ളുന്ന വാതകങ്ങൾ ശൂന്യതയിൽ വ്യാപിക്കുകയും, ഭൂമിയിൽ സൂര്യൻ അസ്തമിച്ചാലും ഉയർന്ന ഭാഗങ്ങളിൽ നിലനിൽക്കുന്ന സൂര്യപ്രകാശം ഈ വാതക പടലങ്ങളിൽ പ്രതിഫലിക്കുകയും ചെയ്യുന്നതാണ് ഈ പ്രകാശത്തിന് കാരണമായത്.
‘സ്പേസ് ജെല്ലിഫിഷ്’ എന്നാണ് ശാസ്ത്രലോകം ഈ പ്രതിഭാസത്തെ വിശേഷിപ്പിക്കുന്നത്. പ്രിൻസ് ജോർജ്ജ് അസ്ട്രോണമിക്കൽ ഒബ്സർവേറ്ററിയിലെ വിദഗ്ധനായ മൽഹാർ കെന്ദുർക്കർ അടക്കമുള്ളവർ ഈ വെളിച്ചം റോക്കറ്റ് വിക്ഷേപണത്തിന്റേതാണെന്ന് സ്ഥിരീകരിച്ചു. റോക്കറ്റ് വിക്ഷേപണങ്ങൾ വർദ്ധിച്ചുവരുന്ന ഇന്നത്തെ കാലത്ത് ഇത്തരം കാഴ്ചകൾ സാധാരണമാണെന്നും എന്നാൽ ആകാശത്തെ അത്ഭുതങ്ങളെക്കുറിച്ച് കൂടുതൽ അറിയാൻ ഇത്തരം സംഭവങ്ങൾ സഹായിക്കുമെന്നും വാൻകൂവർ സ്പേസ് സെന്ററിലെ വിദഗ്ധർ അഭിപ്രായപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Mysterious Cone-Shaped Lights Appear Over Canada
