ബ്രാൻഡൻ: മാനിറ്റോബയിൽ മീസിൽസ്, ഫ്ലൂ കേസുകൾ കുത്തനെ ഉയരുന്ന സാഹചര്യത്തിൽ അതീവ ജാഗ്രതാനിർദ്ദേശം പുറപ്പെടുവിച്ച് പ്രവിശ്യയുടെ ചീഫ് പബ്ലിക് ഹെൽത്ത് ഓഫീസർ ഡോ. ബ്രെന്റ് റൂസിൻ. ജനുവരി അവസാനം ബ്രാൻഡനിൽ നടന്ന ‘അഗ് ഡേയ്സ്’ കാർഷിക പ്രദർശനത്തിൽ പങ്കെടുത്തവർക്കിടയിൽ രോഗവ്യാപനം കണ്ടെത്തിയതായും അദ്ദേഹം വാർത്താസമ്മേളനത്തിൽ അറിയിച്ചു.
അഗ് ഡേയ്സ് പ്രദർശനവുമായി ബന്ധപ്പെട്ട് മാത്രം 30-ലധികം പുതിയ മീസിൽസ് കേസുകളാണ് റിപ്പോർട്ട് ചെയ്തിട്ടുള്ളത്. ഇതിൽ ഫെബ്രുവരി 9-ന് മാത്രം 12 പേർക്ക് രോഗം സ്ഥിരീകരിച്ചു. ഇത് ഈ പകർച്ചവ്യാധി കാലയളവിലെ ഏറ്റവും ഉയർന്ന ഒറ്റദിവസത്തെ കണക്കാണ്. വായുവിലൂടെ അതിവേഗം പടരുന്ന രോഗമായതിനാൽ വരും ദിവസങ്ങളിൽ എണ്ണം ഇനിയും വർധിക്കാൻ സാധ്യതയുണ്ടെന്ന് ഡോക്ടർമാർ മുന്നറിയിപ്പ് നൽകുന്നു. ഈ സാഹചര്യത്തിൽ ആറ് മാസം പ്രായമുള്ള കുട്ടികൾക്ക് വരെ വാക്സിൻ നൽകത്തക്ക രീതിയിൽ വിപുലീകരിച്ചിട്ടുണ്ട്.
മീസിൽസിന് പുറമെ മാനിറ്റോബയിൽ ഫ്ലൂ കേസുകളും റെക്കോർഡ് നിലയിലാണ്. ഈ സീസണിൽ 3,309 ഫ്ലൂ കേസുകൾ റിപ്പോർട്ട് ചെയ്തപ്പോൾ 132 മരണങ്ങളും സംഭവിച്ചു. കോവിഡ് കേസുകളെക്കാൾ കൂടുതൽ ഫ്ലൂ കേസുകളാണ് നിലവിൽ റിപ്പോർട്ട് ചെയ്യുന്നത്. വരാനിരിക്കുന്ന റോയൽ മാനിറ്റോബ വിന്റർ ഫെയറിൽ വലിയ ജനക്കൂട്ടം എത്താൻ സാധ്യതയുള്ളതിനാൽ, വാക്സിൻ എടുക്കാത്തവർ കൂടുതൽ ജാഗ്രത പാലിക്കണമെന്നും പൊതുപരിപാടികളിൽ പങ്കെടുക്കുമ്പോൾ മുൻകരുതൽ എടുക്കണമെന്നും ആരോഗ്യവകുപ്പ് നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Measles scare in Manitoba: More than 30 people have been diagnosed with the disease; Health Department warns of caution
