പണപ്പെരുപ്പത്തെക്കുറിച്ച് കൂടുതൽ വിവരങ്ങൾ പ്രതീക്ഷിക്കുന്നു: ബാങ്ക് ഓഫ് കാനഡ

രാജ്യത്തെ പണപ്പെരുപ്പ നിരക്കിൽ കൂടുതൽ വ്യക്തത തേടുകയാണ് ബാങ്ക് ഓഫ് കാനഡ. ഈ ആഴ്ച സ്റ്റാറ്റിസ്റ്റിക്സ് കാനഡ മേയ് മാസത്തിലെ ഉപഭോക്തൃ വില സൂചിക (CPI) പുറത്തുവിടുമെന്ന് പ്രതീക്ഷിക്കുന്നു. 2025 ഏപ്രിലിൽ വാർഷിക പണപ്പെരുപ്പ നിരക്ക് 1.7% ആയി കുറഞ്ഞിരുന്നു. കാർബൺ നികുതി ഒഴിവാക്കിയതുമൂലം ഇന്ധനവിലയിൽ വന്ന കുറവാണ് ഇതിന് പ്രധാന കാരണം. എന്നാൽ, മേയ് മാസത്തിലെ CPI 1.8% വരെ ഉയർന്നിരിക്കാമെന്ന് സാമ്പത്തിക വിദഗ്ധർ വ്യക്തമാക്കുന്നു. ഇന്ധനവിലയിലെയും താമസച്ചെലവിലെയും നേരിയ വർദ്ധനവ് കണക്കിലെടുക്കുമ്പോൾ മേയ് CPI 1.5% ആയി കുറയാനാണ് സാധ്യതയെന്ന് BMO-യിലെ ബെഞ്ചമിൻ റൈറ്റ്സസ് അഭിപ്രായപ്പെട്ടു.

ബാങ്ക് ഓഫ് കാനഡ ഒരു സംഖ്യയെ മാത്രം ആശ്രയിക്കുന്നില്ലെന്നും, പണപ്പെരുപ്പത്തിൻ്റെ മൊത്തത്തിലുള്ള ചിത്രം മനസ്സിലാക്കാൻ നിരവധി സൂചികകളെ അടിസ്ഥാനമാക്കിയാണ് തീരുമാനമെടുക്കുന്നതെന്നും അദ്ദേഹം വ്യക്തമാക്കി.

ബാങ്ക് ഓഫ് കാനഡ ഗവർണർ ടിഫ് മാക്ലം ജൂൺ 4-ന് ന്യൂഫൗണ്ട്ലാൻഡ് & ലാബ്രഡോറിലെ സെൻ്റ് ജോൺസിൽ നടന്ന ബിസിനസ് സമ്മേളനത്തിൽ സംസാരിക്കുമ്പോൾ, നിലവിലെ പണപ്പെരുപ്പത്തിൻ്റെ ചിത്രം “സങ്കീർണ്ണം” ആണെന്ന് വിലയിരുത്തിയിരുന്നു. അമേരിക്കയുമായി ഉണ്ടായ വ്യാപാര യുദ്ധം കാനഡയിലെ വിലവർദ്ധനവിന് കാരണമാകാൻ സാധ്യതയുണ്ടെന്ന സൂചനകളും അദ്ദേഹം നൽകി. ഫെഡറൽ സർക്കാരിൻ്റെ രണ്ട് മാസം നീണ്ട GST അവധി പല ഉൽപ്പന്നങ്ങളുടെയും വില കുറയ്ക്കാൻ സഹായിച്ചിട്ടുണ്ട്. അതോടൊപ്പം, കാർബൺ നികുതി അവസാനിപ്പിച്ചതും CPI കുറയാൻ കാരണമായി. എന്നാൽ, ഇവയെല്ലാം താൽക്കാലിക ഘടകങ്ങളായതിനാൽ അടുത്ത വർഷം മുതൽ CPI കണക്കുകളിൽ ഇവ ഉൾപ്പെടില്ല.

നികുതി മാറ്റങ്ങൾ ഒഴിവാക്കി കണക്കാക്കിയ പണപ്പെരുപ്പ നിരക്ക് ഏപ്രിലിൽ 2.3% ആയിരുന്നുവെന്ന് മാക്ലം ചൂണ്ടിക്കാട്ടി. ഇത് ബാങ്ക് പ്രതീക്ഷിച്ചതിലും കൂടുതലായിരുന്നു. കോർ ഇൻഫ്ലേഷൻ (അടിസ്ഥാന പണപ്പെരുപ്പം) ഇപ്പോൾ 3% കടന്നുനിൽക്കുന്നുണ്ടെങ്കിലും, മറ്റു ചില സാമ്പത്തിക സൂചികകൾ ഇത് കുറഞ്ഞുവരുന്നതായി കാണിക്കുന്നുണ്ട്. അതിനാൽ, ബാങ്ക് വിവിധ ഘടകങ്ങൾ സംയുക്തമായി വിലയിരുത്തുകയാണ്. നിലവിൽ പണപ്പെരുപ്പത്തെ സ്വാധീനിക്കുന്ന അസാധാരണമായ പല ഘടകങ്ങളും താൽക്കാലികമാണോ അതോ സ്ഥിരമാണോ എന്നത് ഇപ്പോഴും ഒരു ചോദ്യമായി തുടരുകയാണെന്നും മാക്ലം പറഞ്ഞു.

ജൂലൈ 30-ന് നടക്കുന്ന അടുത്ത പലിശ നിരക്ക് തീരുമാനത്തിന് മുമ്പായി ബാങ്കിന് രണ്ട് പണപ്പെരുപ്പ റിപ്പോർട്ടുകൾ കൂടി ലഭിക്കും. പുതിയ താരിഫുകൾ ഭക്ഷണവിലയെ ബാധിച്ചിട്ടുണ്ടാകാമെന്നും, വാടകവിലയിൽ നേരിയ കുറവ് പ്രതീക്ഷിക്കാമെന്നും CIBC ക്യാപിറ്റൽ മാർക്കറ്റ്സിലെ കാതറിൻ ജഡ്ജ് പ്രതീക്ഷിക്കുന്നു. പണപ്പെരുപ്പം കൃത്യമായി നിയന്ത്രിക്കപ്പെടുന്നുവെന്ന് തെളിയിക്കപ്പെട്ടാൽ ബാങ്ക് നിലപാട് മാറ്റിയേക്കാം, എന്നാൽ നിലവിൽ അതിനെ പിന്തുണയ്ക്കുന്ന കണക്കുകളൊന്നും ലഭ്യമല്ലെന്ന് റൈറ്റ്സസ് അഭിപ്രായപ്പെടുന്നു. വരും ദിവസങ്ങളിലെ CPI റിപ്പോർട്ട് കാനഡയുടെ സാമ്പത്തിക നയങ്ങളിൽ നിർണായകമായേക്കാൻ സാധ്യത ഉണ്ട്.