മണ്‍ക്ടണ്‍: മലിനജല സംസ്‌കരണത്തില്‍നിന്നുള്ള മാലിന്യങ്ങള്‍ മൂലമുണ്ടാകുന്ന രൂക്ഷമായ ദുര്‍ഗന്ധത്തെക്കുറിച്ച് വര്‍ഷങ്ങളായി പരാതികള്‍ ഉയര്‍ന്നതോടെ ന്യൂ ബ്രണ്‍സ്വിക്കിലെ മണ്‍ക്ടണിലുള്ള കമ്പോസ്റ്റ് കേന്ദ്രത്തിന്റെ പ്രവര്‍ത്തനം അവസാനിപ്പിക്കാന്‍ തീരുമാനമെടുത്തു. ട്രാന്‍സ്അക്വയുടെ ഡെലോങ് ഡ്രൈവിലുള്ള കേന്ദ്രം കുറഞ്ഞത് ഒരു വര്‍ഷം കൂടി പ്രവര്‍ത്തിക്കും. തുടര്‍ന്ന് മാലിന്യസംസ്‌കരണം മൂന്നാം കക്ഷിക്ക് കൈമാറാനാണ് കമ്പനി ലക്ഷ്യമിടുന്നത്. മാറ്റങ്ങള്‍ നടപ്പാക്കാന്‍ രണ്ട് വര്‍ഷം വരെ വേണ്ടിവന്നേക്കാമെന്നും അധികൃതര്‍ അറിയിച്ചു.
മണ്‍ക്ടണിലെ വടക്കന്‍ മേഖലയില്‍ താമസിക്കുന്നവര്‍ 2018-19 കാലം മുതല്‍ കേന്ദ്രത്തില്‍നിന്നുള്ള മലിനജല മാലിന്യങ്ങളുടെ ദുര്‍ഗന്ധത്തെക്കുറിച്ച് പരാതിപ്പെട്ടിരുന്നു. വേനല്‍ക്കാലത്ത് വീടുകളുടെ മുറ്റത്ത് ഇരിക്കാനോ എയര്‍ കണ്ടീഷണറുകള്‍ പ്രവര്‍ത്തിപ്പിക്കാനോ കഴിയാത്ത സാഹചര്യമുണ്ടായിരുന്നുവെന്ന് പ്രദേശവാസികള്‍ പരാതിപ്പെട്ടു. ദുര്‍ഗന്ധം വീടുകള്‍ക്കുള്ളിലേക്കും വ്യാപിച്ചതോടെ ജനങ്ങളുടെ ജീവിതനിലവാരത്തെയും ബാധിച്ചു.
ദുര്‍ഗന്ധം കുറയ്ക്കുന്നതിനായി 2024 മുതല്‍ അധികമായി വരുന്ന മലിനജല സംസ്‌കരണ മാലിന്യങ്ങള്‍ മണ്‍ക്ടണില്‍നിന്ന് ഏകദേശം ഒരു മണിക്കൂര്‍ വടക്കുള്ള വെസ്റ്റ് ബ്രാഞ്ച് മേഖലയിലേക്ക് മാറ്റിയിരുന്നു. ഇതോടെ പരാതികള്‍ കുറഞ്ഞെങ്കിലും പൂര്‍ണമായി അവസാനിച്ചില്ലെന്ന് മണ്‍ക്ടണ്‍ കൗണ്‍സിലര്‍ ബ്രയാന്‍ ബട്ലര്‍ പറഞ്ഞു. ഡെലോങ് ഡ്രൈവിലെയും ഫൈവ് റിവേഴ്സിലെയും പ്രവര്‍ത്തനങ്ങള്‍ അവസാനിപ്പിച്ച് മറ്റൊരു സ്ഥാപനത്തെ മാലിന്യസംസ്‌കരണം ഏല്‍പ്പിക്കാനാണ് പദ്ധതിയെന്ന് ട്രാന്‍സ്അക്വയുടെ കത്തില്‍ വ്യക്തമാക്കിയതായും അദ്ദേഹം പറഞ്ഞു.
ട്രാന്‍സ്അക്വ ജനറല്‍ മാനേജര്‍ കെവിന്‍ റൈസ് ജീവനക്കാര്‍ക്ക് അയച്ച കത്തിലാണ് പുതിയ തീരുമാനം അറിയിച്ചത്. സ്വന്തം കമ്പോസ്റ്റ് കേന്ദ്രങ്ങള്‍ പ്രവര്‍ത്തിപ്പിക്കുന്നതിന് പകരം മൂന്നാം കക്ഷിയെ ഉപയോഗിച്ച് മലിനജല മാലിന്യങ്ങള്‍ സംസ്‌കരിക്കാനാണ് ഒക്ടോബറിലെ യോഗത്തില്‍ കമ്മിഷന്‍ തീരുമാനിച്ചതെന്ന് കത്തില്‍ പറയുന്നു. എന്നാല്‍ മാലിന്യങ്ങള്‍ സംസ്‌കരിക്കുന്ന പുതിയ സ്ഥാപനത്തിന്റെ പേരോ സ്ഥലമോ ഇതുവരെ വെളിപ്പെടുത്തിയിട്ടില്ല.
നിലവിലെ കമ്പോസ്റ്റ് കേന്ദ്രത്തിലെ ജീവനക്കാര്‍ക്ക് റിവര്‍വ്യൂവിലുള്ള മലിനജല ശുദ്ധീകരണ കേന്ദ്രത്തില്‍ അവസരങ്ങള്‍ ലഭിക്കുന്നതിനനുസരിച്ച് ജോലി നല്‍കാനാണ് മാനേജ്മെന്റിന്റെ പദ്ധതി. ഗ്രേറ്റര്‍ മണ്‍ക്ടണ്‍ മേഖലയിലെ മലിനജലം ശേഖരിച്ച് സംസ്‌കരിക്കുന്ന സ്ഥാപനമാണ് ട്രാന്‍സ്അക്വ. കമ്പോസ്റ്റ് കേന്ദ്രത്തില്‍ സംസ്‌കരിക്കുന്ന മാലിന്യത്തില്‍നിന്ന് വളം ഉല്‍പ്പാദിപ്പിച്ച് പ്രദേശവാസികള്‍ക്ക് സൗജന്യമായി നല്‍കുന്നുമുണ്ട്.
ഫൈവ് റിവേഴ്സ് മേയര്‍ കെവിന്‍ സ്‌കള്ളിയും തീരുമാനം പ്രദേശവാസികള്‍ക്ക് ആശ്വാസമാകുമെന്ന് പ്രതികരിച്ചു. ട്രാന്‍സ്അക്വയുടെ പ്രവര്‍ത്തനരീതിയെ അദ്ദേഹം പ്രശംസിച്ചെങ്കിലും ദുര്‍ഗന്ധം ജനങ്ങളുടെ ജീവിതത്തെ ബാധിച്ചിരുന്നുവെന്ന് ചൂണ്ടിക്കാട്ടി. മണ്‍ക്ടണ്‍, ഡൈപ്പെ, റിവര്‍വ്യൂ എന്നിവിടങ്ങളിലെ മേയര്‍മാരുമായും കൗണ്‍സില്‍ അംഗങ്ങളുമായും ഡിസംബറില്‍ ചര്‍ച്ച നടത്തിയശേഷം ബയോസോളിഡ്സ് സംസ്‌കരണ പദ്ധതിയെക്കുറിച്ച് കൂടുതല്‍ വിവരങ്ങള്‍ പുറത്തുവിടുമെന്ന് ട്രാന്‍സ്അക്വ വക്താവ് വെല്‍റ്റ ടോംസണ്‍ അറിയിച്ചു.
ദുര്‍ഗന്ധം നിയന്ത്രിക്കാന്‍ ട്രാന്‍സ്അക്വ ഇതിനകം ദശലക്ഷക്കണക്കിന് ഡോളര്‍ ചെലവഴിക്കുകയും കമ്പോസ്റ്റ് കേന്ദ്രത്തില്‍ ദുര്‍ഗന്ധം പുറത്തേക്ക് വ്യാപിക്കുന്നത് തടയാനുള്ള വലിയ കവറുകള്‍ ഉള്‍പ്പെടെ വിവിധ സംവിധാനങ്ങള്‍ ഒരുക്കുകയും ചെയ്തിരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Moncton Compost Facility to Close’
