ഒട്ടാവ: കാനഡയിലെ സൈനിക ഉദ്യോഗസ്ഥർ ഉൾപ്പെട്ട ലൈംഗിക അതിക്രമ കേസുകൾ അന്വേഷിക്കാനും വിചാരണ ചെയ്യാനുമുള്ള സൈനിക കോടതികളുടെ അധികാരം നീക്കം ചെയ്യുന്നതിനുള്ള നിയമനിർമ്മാണവുമായി ലിബറൽ സർക്കാർ മുന്നോട്ട്. വിരമിച്ച സുപ്രീം കോടതി ജസ്റ്റിസും കാനഡയുടെ അടുത്ത ഗവർണർ ജനറലുമായി നാമനിർദ്ദേശം ചെയ്യപ്പെട്ട ലൂയിസ് അർബർ 2022-ൽ സമർപ്പിച്ച നിർണ്ണായക ശുപാർശയാണ് ഇതിലൂടെ നിയമമാകുന്നത്. ചൊവ്വാഴ്ച പാർലമെന്റിൽ നടന്ന വോട്ടെടുപ്പിലൂടെയാണ് ഈ ബിൽ സർക്കാർ പുനഃസ്ഥാപിച്ചത്.
ലൈംഗിക അതിക്രമത്തിന് ഇരയായവർക്ക് സൈനിക കോടതി വേണോ അതോ സിവിൽ കോടതി വേണോ എന്ന് തിരഞ്ഞെടുക്കാൻ അവകാശം നൽകുന്ന കൺസർവേറ്റീവ് പാർട്ടിയുടെ ഭേദഗതി സർക്കാർ വോട്ടിനിട്ട് തള്ളി. അർബറിനെ പുതിയ ഗവർണർ ജനറലായി പ്രഖ്യാപിച്ച അതേദിവസം തന്നെ ഈ നീക്കം നടത്തിയത് രാഷ്ട്രീയ പ്രേരിതമാണെന്ന് പ്രതിപക്ഷം ആരോപിച്ചു. എന്നാൽ നിയമനിർമ്മാണത്തിന്റെ സമയം യാദൃശ്ചികം മാത്രമാണെന്ന് പ്രതിരോധ മന്ത്രി ഡേവിഡ് മക്ഗ്വിന്റി വ്യക്തമാക്കി. പൊതുജനവിശ്വാസം വീണ്ടെടുക്കാൻ ഈ മാറ്റം അത്യാവശ്യമാണെന്ന് അദ്ദേഹം കൂട്ടിച്ചേർത്തു.
സൈന്യത്തിലെ ലൈംഗിക അതിക്രമങ്ങൾ സിവിൽ കോടതികൾക്ക് വിടുന്നത് കുറ്റവാളികൾ രക്ഷപ്പെടാൻ കാരണമാകുമെന്ന് കൺസർവേറ്റീവ് എംപി ജെഫ് കിബിൾ ആശങ്ക പ്രകടിപ്പിച്ചു. സിവിൽ കോടതികളിലെ നടപടിക്രമങ്ങൾ സൈനിക കോടതികളേക്കാൾ സങ്കീർണ്ണമാണെന്നും പല കേസുകളും അവിടെ സ്വീകരിക്കപ്പെടില്ലെന്നും അദ്ദേഹം വാദിച്ചു. ലൈംഗിക അതിക്രമങ്ങളെ അതിജീവിച്ച ചില മുൻ സൈനിക ഉദ്യോഗസ്ഥരും സർക്കാർ നീക്കത്തിൽ അതൃപ്തി രേഖപ്പെടുത്തിയിട്ടുണ്ട്. ഇരകൾക്ക് കോടതി തിരഞ്ഞെടുക്കാനുള്ള അവകാശം നൽകണമെന്നാണ് ഇവരുടെ ആവശ്യം.
ലൂയിസ് അർബർ ഗവർണർ ജനറലായി ചുമതലയേറ്റ ശേഷം സ്വന്തം ശുപാർശയിലുള്ള ബില്ലിന് രാജകീയ അംഗീകാരം (Royal Assent) നൽകുന്നത് താൽപ്പര്യ വൈരുദ്ധ്യത്തിന് ഇടയാക്കുമെന്ന് പ്രതിപക്ഷം ചൂണ്ടിക്കാട്ടി. എന്നാൽ പാർലമെന്റ് പാസാക്കുന്ന ബില്ലുകൾക്ക് അംഗീകാരം നൽകുക എന്നത് ഗവർണർ ജനറലിന്റെ ഭരണഘടനാപരമായ ചുമതലയാണെന്നും ഇതിൽ നിയമതടസ്സമില്ലെന്നും ഭരണഘടനാ വിദഗ്ധർ വ്യക്തമാക്കി. വെള്ളിയാഴ്ച ഹൗസ് ഓഫ് കോമൺസിൽ ബില്ലിന്മേൽ മൂന്നാം ഘട്ട ചർച്ച നടക്കും. ജൂൺ 8-നാണ് ലൂയിസ് അർബർ ഗവർണർ ജനറലായി ചുമതലയേൽക്കുന്നത്.
Military law changes in Canada; Military courts no longer have jurisdiction in sexual assault cases
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
