വാഷിംഗ്ടൺ: അമേരിക്കയിൽ നിന്ന് കാനഡയിലേക്ക് അതിർത്തി കടന്ന് തോക്കുകൾ കടത്തുന്ന വൻ സംഘത്തെ യുഎസ് സുരക്ഷാ ഏജൻസികൾ പിടികൂടി. മൂന്ന് വർഷത്തോളമായി തുടർന്നുപോന്ന ഈ നിയമവിരുദ്ധ പ്രവർത്തനത്തിൽ പങ്കാളികളായ 13 പേർക്കെതിരെയാണ് ഫെഡറൽ അധികൃതർ കേസെടുത്തത്. ന്യൂ ഹാംഷെയറിൽ നിന്ന് ആരംഭിച്ച് അതിർത്തി കടന്ന് കാനഡയിലെ ക്രിമിനൽ സംഘങ്ങളിലേക്ക് ആയുധങ്ങൾ എത്തിക്കുന്നതായിരുന്നു ഇവരുടെ രീതി. കാനഡയിൽ നടന്ന തട്ടിക്കൊണ്ടുപോകൽ, വധശ്രമം ഉൾപ്പെടെയുള്ള കുറ്റകൃത്യങ്ങളിൽ ഇത്തരത്തിൽ കടത്തിയ ആയുധങ്ങൾ ഉപയോഗിച്ചതായി കണ്ടെത്തിയിട്ടുണ്ട്.
അതിർത്തിയിലെ ഭൂപ്രകൃതിയും തദ്ദേശീയ റിസർവേഷൻ ഇടനാഴികളും ദുരുപയോഗം ചെയ്താണ് ഈ ശൃംഖല പ്രവർത്തിച്ചിരുന്നതെന്ന് ന്യൂ ഹാംഷെയറിലെ യുഎസ് അറ്റോർണി ഇറിൻ ക്രീഗൻ വാർത്താ സമ്മേളനത്തിൽ അറിയിച്ചു. 2021 മുതൽ 2024 വരെയുള്ള കാലയളവിൽ അൻപതിലധികം അത്യാധുനിക തോക്കുകൾ ഇവർ കടത്തിയതായാണ് പ്രാഥമിക വിവരം. ‘സ്ട്രോ പർച്ചേസിംഗ്’ (Straw Purchasing) എന്നറിയപ്പെടുന്ന രീതിയിലൂടെ, തോക്ക് വാങ്ങാൻ നിയമപരമായ അനുമതിയുള്ളവരെ ഉപയോഗിച്ച് ആയുധങ്ങൾ ശേഖരിക്കുകയും പിന്നീട് അവ അതിർത്തി കടത്തുകയുമായിരുന്നു.
ന്യൂയോർക്കിലെ അക്വെസാസ്നെ റിസർവേഷനിലെ അംഗങ്ങൾ വെർമോണ്ടിലെത്തി ജസ്റ്റിൻ ജാക്സൺ എന്നയാളുടെ സഹായത്തോടെ ആയുധങ്ങൾ വാങ്ങാൻ പദ്ധതിയിട്ടു. തോക്കുകൾ വാങ്ങാൻ നിയമപരമായ വിലക്കുള്ള ജാക്സൺ, മെലിസ ലോഞ്ച്, ഡസ്റ്റിൻ ടട്ടിൽ, കലേബ് വിൽകോട്ട്, ഡഗ് മള്ളിക്കൻ എന്നിവരെ ഉപയോഗിച്ച് ന്യൂ ഹാംഷെയറിലെ ലൈസൻസുള്ള വിൽപനക്കാരിൽ നിന്ന് ആയുധങ്ങൾ വാങ്ങിപ്പിക്കുകയായിരുന്നു. ഈ കേസിലെ പ്രധാന പ്രതികളായ അഞ്ച് പേർ ഈ വർഷം ആദ്യം തന്നെ കുറ്റസമ്മതം നടത്തിയിരുന്നു. ബാക്കിയുള്ള എട്ടുപേരെ കഴിഞ്ഞ ആഴ്ചയാണ് ഫെഡറൽ ഗ്രാൻഡ് ജൂറി പ്രതിപ്പട്ടികയിൽ ഉൾപ്പെടുത്തിയത്.
കടത്തിയ തോക്കുകളിൽ പലതും കാനഡയിലെ കുറ്റകൃത്യങ്ങൾ നടന്ന സ്ഥലങ്ങളിൽ നിന്ന് കണ്ടെത്തിയിട്ടുണ്ട്. കാനഡയിൽ വർഷം തോറും പിടിച്ചെടുക്കുന്ന 20,000-ഓളം നിയമവിരുദ്ധ ആയുധങ്ങളിൽ പകുതിയോളം അമേരിക്കയിൽ നിന്ന് കടത്തുന്നതാണെന്നാണ് ബ്യൂറോ ഓഫ് ആൽക്കഹോൾ, ടൊബാക്കോ, ഫയർ ആംസ് ആൻഡ് എക്സ്പ്ലോസീവ്സ് (ATF) നൽകുന്ന കണക്ക്. ടൊറന്റോ പോലുള്ള വലിയ നഗരങ്ങളിൽ കുറ്റകൃത്യങ്ങൾക്കായി ഉപയോഗിക്കുന്ന കൈത്തോക്കുകളിൽ 90 ശതമാനവും അമേരിക്കയിൽ നിന്ന് അതിർത്തി കടന്നെത്തുന്നവയാണ്.
അമേരിക്കൻ സുരക്ഷാ ഏജൻസികളും കനേഡിയൻ പോലീസും സംയുക്തമായി നടത്തിയ നീക്കമാണ് ഈ വൻ ശൃംഖലയെ തകർക്കാൻ സഹായിച്ചത്. പിടിയിലായവരിൽ നാലുപേർ ഇപ്പോൾ കസ്റ്റഡിയിലാണെങ്കിലും ജൊനാഥൻ ഹാർട്ട്, ഇയോ-റതേക്ക സ്വാമ്പ്, ബ്ലേഡ് ഓക്സ് എന്നിവർ ഇപ്പോഴും ഒളിവിലാണ്. അതിർത്തി സുരക്ഷ ഉറപ്പാക്കുന്നതിനും അന്താരാഷ്ട്ര കുറ്റകൃത്യങ്ങൾ തടയുന്നതിനും ഇരു രാജ്യങ്ങളും തമ്മിലുള്ള സഹകരണം ശക്തമായി തുടരുമെന്ന് ഒന്റാറിയോ പ്രൊവിൻഷ്യൽ പോലീസ് അറിയിച്ചു.
Massive gun smuggling across the border into Canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
