വിന്നിപെഗ് : മാനിറ്റോബ പ്രവിശ്യയിലെ മദ്യവിൽപ്പന ശാലകളിൽ നിന്ന് നേരത്തെ പിൻവലിച്ച അമേരിക്കൻ മദ്യ ഉൽപ്പന്നങ്ങൾ ക്രിസ്മസ് സീസൺ പ്രമാണിച്ച് താത്കാലികമായി തിരികെയെത്തുന്നു. ഈ വിൽപ്പനയിലൂടെ ലഭിക്കുന്ന പണം പൂർണ്ണമായും ജീവകാരുണ്യ പ്രവർത്തനങ്ങൾക്കായി സംഭാവന ചെയ്യുമെന്ന് പ്രീമിയർ വാബ് കിന്യൂ പ്രഖ്യാപിച്ചു.
യുഎസ് പ്രസിഡൻ്റ് ഡൊണാൾഡ് ട്രംപിൻ്റെ തീരുവകൾക്ക് (Tariffs) മറുപടിയായി കഴിഞ്ഞ ഫെബ്രുവരിയിലാണ് മാനിറ്റോബ ലിക്വർ ആൻഡ് ലോട്ടറീസ് (MBLL) അമേരിക്കൻ മദ്യ ഉൽപ്പന്നങ്ങളുടെ വിൽപ്പന പ്രവിശ്യയിൽ നിർത്തലാക്കിയത്. വിൽപ്പന നിർത്തലാക്കിയതിനെ തുടർന്ന് സ്റ്റോക്കിൽ ബാക്കിയായ ഏകദേശം ഒരു മില്യൺ ഡോളറിൻ്റെ ഉൽപ്പന്നങ്ങളാണ് ഇപ്പോൾ ക്രിസ്മസ് തലേന്ന് വരെ വിൽക്കാൻ തീരുമാനിച്ചിരിക്കുന്നത്. ഇതിലൂടെ ഏകദേശം അഞ്ച് ലക്ഷം ഡോളർ (500,000 ഡോളർ) വിന്നിപെഗ്, ബ്രാൻഡൺ, തോംസൺ എന്നിവിടങ്ങളിലെ ‘ചിയർ ബോർഡ്സ്’ പോലുള്ള പ്രാദേശിക ചാരിറ്റികൾക്ക് സംഭാവന ചെയ്യും.
ഈ വരുന്ന തിങ്കളാഴ്ച മുതൽ വിൽപ്പന ആരംഭിക്കും. ആദ്യഘട്ടത്തിൽ റെസ്റ്റോറൻ്റുകൾ, വെണ്ടർമാർ, സ്വകാര്യ വൈൻ സ്റ്റോറുകൾ എന്നിവയ്ക്ക് ഉൽപ്പന്നങ്ങൾ വാങ്ങാം. തുടർന്ന് ബുധനാഴ്ച മുതൽ പൊതുജനങ്ങൾക്ക് വിൽപ്പന ആരംഭിക്കും.
എങ്കിലും, അമേരിക്കൻ മദ്യ ഉൽപ്പന്നങ്ങൾ ശാശ്വതമായി മാനിറ്റോബയിലേക്ക് തിരികെ കൊണ്ടുവരുന്നതിൻ്റെ ഭാഗമല്ല ഈ നീക്കമെന്ന് പ്രീമിയർ വാബ് കിന്യൂ വ്യക്തമാക്കി. യുഎസിൻ്റെ തീരുവകൾക്കെതിരെ മാനിറ്റോബ സ്വീകരിച്ച നടപടി അമേരിക്കൻ ഉദ്യോഗസ്ഥർ ശ്രദ്ധിച്ചിട്ടുണ്ടെന്നും, ഈ നയം ഉടൻ മാറ്റാൻ ഉദ്ദേശിക്കുന്നില്ലെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Manitoba’s stock of U.S. booze to be sold for charity
