വിന്നിപെഗ്: കാനഡയിലെ മാനിറ്റോബ പ്രവിശ്യയിൽ ഫ്രഞ്ച് ഭാഷയിലുള്ള നഴ്സിംഗ് വിദ്യാഭ്യാസ രംഗത്ത് വൻ വികസനവുമായി സർക്കാർ. ഉന്നത വിദ്യാഭ്യാസ മന്ത്രി റെനീ കേബിളും ആരോഗ്യ മന്ത്രി ഉസോമ അസഗ്വാരയും ചേർന്നാണ് ഈ സുപ്രധാന പ്രഖ്യാപനം നടത്തിയത്. വിന്നിപെഗിലെ ‘യൂണിവേഴ്സിറ്റി ഓഫ് സെന്റ്-ബോണിഫേസ്’ എന്ന സ്ഥാപനത്തിലെ ഫ്രഞ്ച് മീഡിയം ബാച്ചിലർ ഓഫ് നഴ്സിംഗ് കോഴ്സിലാണ് പുതുതായി 30 സീറ്റുകൾ കൂടി അനുവദിച്ചത്. ഇതോടെ ഇവിടുത്തെ ആകെ സീറ്റുകളുടെ എണ്ണം 45-ൽ നിന്നും 75 ആയി ഉയർന്നു.
പ്രവിശ്യയിലെ ആരോഗ്യരംഗം കൂടുതൽ ശക്തിപ്പെടുത്തുന്നതിനും ഫ്രഞ്ച്-ഇംഗ്ലീഷ് ഭാഷകൾ കൈകാര്യം ചെയ്യാൻ കഴിയുന്ന നഴ്സുമാരുടെ സേവനം ഉറപ്പുവരുത്തുന്നതിനുമാണ് സർക്കാർ ഈ നടപടി സ്വീകരിച്ചിരിക്കുന്നത്. ഇതിനായി അടുത്ത നാല് വർഷത്തേക്ക് 2,19,691 കനേഡിയൻ ഡോളറിന്റെ നിക്ഷേപമാണ് മാനിറ്റോബ സർക്കാർ പ്രഖ്യാപിച്ചിരിക്കുന്നത്. ഈ പുതിയ ബാച്ചിലേക്കുള്ള പ്രവേശനം 2026 സെപ്റ്റംബർ മാസം ആരംഭിക്കുന്ന അധ്യയന വർഷം മുതൽ നിലവിൽ വരും.
പടിഞ്ഞാറൻ കാനഡയിൽ പൂർണ്ണമായും ഫ്രഞ്ച് ഭാഷയിൽ ബാച്ചിലർ ഓഫ് നഴ്സിംഗ് കോഴ്സ് വാഗ്ദാനം ചെയ്യുന്ന ഒരേയൊരു സർവ്വകലാശാലയാണ് യൂണിവേഴ്സിറ്റി ഓഫ് സെന്റ്-ബോണിഫേസ്. സമീപകാലത്തായി ഈ കോഴ്സിലേക്ക് അപേക്ഷിക്കുന്നവരുടെ എണ്ണത്തിൽ വൻ വർദ്ധനവാണ് ഉണ്ടായിട്ടുള്ളത്. ഫ്രഞ്ച് ഭാഷ സംസാരിക്കുന്ന രോഗികൾക്ക് തങ്ങളുടെ സ്വന്തം ഭാഷയിൽ മികച്ച ചികിത്സയും പരിചരണവും ഉറപ്പാക്കാൻ ഈ തീരുമാനം സഹായിക്കുമെന്ന് ആരോഗ്യ മന്ത്രി ഉസോമ അസഗ്വാരയും വ്യക്തമാക്കി.
സർക്കാരിന്റെ ഈ പുതിയ തീരുമാനം കാനഡയിൽ നഴ്സിംഗ് കരിയർ ആഗ്രഹിക്കുന്ന മലയാളികൾ ഉൾപ്പെടെയുള്ള അന്താരാഷ്ട്ര വിദ്യാർത്ഥികൾക്കും വലിയ അവസരങ്ങൾ തുറന്നുനൽകിയേക്കും. പ്രവിശ്യയിലെ ഹോസ്പിറ്റലുകളിലെ നഴ്സിംഗ് ക്ഷാമം പരിഹരിക്കാനും രോഗികൾക്ക് കൂടുതൽ സുരക്ഷിതത്വം ഉറപ്പാക്കാനും ഈ പദ്ധതി വഴി സാധിക്കുമെന്നാണ് വിലയിരുത്തൽ.
Manitoba Government Expands French-Language Nursing Education
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
