വിനിപെഗ്: കാനഡയിലേക്ക് രണ്ട് ക്യൂബൻ പൗരന്മാരെ നിയമവിരുദ്ധമായി പ്രവേശിപ്പിക്കാൻ സഹായിച്ച കേസിൽ രണ്ട് അമേരിക്കൻ പൗരന്മാർക്ക് മാനിറ്റോബ കോടതി ഒരു വർഷം തടവ് ശിക്ഷ വിധിച്ചു. എമാനുവൽ ട്രെഹോ ഗൊൻസാലസ് (29), ഹോസെ റാഫേൽ റാമോസ് കാർട്ടഹീന (50) എന്നിവർ കുറ്റം സമ്മതിച്ചതിനെ തുടർന്നാണ് ജഡ്ജി ഡെനിസ് ഗ്യുനെറ്റ് ശിക്ഷ വിധിച്ചത്. അമേരിക്കയിലെ കർശനമായ കുടിയേറ്റ നടപടികളിൽ നിന്ന് സുഹൃത്തുക്കളെ രക്ഷിക്കാനാണ് തങ്ങൾ ഈ സാഹസത്തിന് മുതിർന്നതെന്ന് പ്രതികൾ കോടതിയെ അറിയിച്ചു.
2025 ജൂലൈ 21-ന് മാനിറ്റോബയിലെ എമേഴ്സൺ അതിർത്തി ചെക്ക്പോസ്റ്റിൽ കാനഡ ബോർഡർ സർവീസസ് ഏജൻസി (CBSA) നടത്തിയ പരിശോധനയിലാണ് പ്രതികൾ പിടിയിലായത്. ഇവരുടെ വാഹനത്തിൽ നിന്ന് ക്യൂബൻ പൗരന്മാരുടെ മരുന്നുകളും രേഖകളും അടങ്ങിയ ബാഗുകൾ ഉദ്യോഗസ്ഥർ കണ്ടെത്തി. ഇതിന് പിന്നാലെ അതിർത്തി കടക്കാൻ ശ്രമിച്ച രണ്ട് ക്യൂബൻ പൗരന്മാരെ റോയൽ കനേഡിയൻ മൗണ്ടഡ് പോലീസ് (RCMP) കസ്റ്റഡിയിലെടുത്തു. പ്രതികളുടെ ഫോണുകൾ പരിശോധിച്ചപ്പോൾ അതിർത്തി കടക്കാനുള്ള പ്ലാനുകളെക്കുറിച്ച് മുൻകൂട്ടി ചർച്ച ചെയ്തിരുന്നതായും തെളിഞ്ഞു.
സാമ്പത്തിക ലാഭം പ്രതീക്ഷിച്ചുള്ള മനുഷ്യക്കടത്തല്ല ഇതെന്നും സുഹൃത്തുക്കളെ സഹായിക്കാനുള്ള ശ്രമമായിരുന്നുവെന്നും പ്രതിഭാഗം അഭിഭാഷകർ വാദിച്ചു. യു.എസ്. ഭരണകൂടത്തിന്റെ കർശനമായ കുടിയേറ്റ വിരുദ്ധ നടപടികൾ ഭയന്നാണ് ക്യൂബൻ പൗരന്മാർ കാനഡയിൽ അഭയം തേടാൻ ആഗ്രഹിച്ചതെന്ന് കോടതിയെ ബോധിപ്പിച്ചു. എന്നാൽ ക്യൂബൻ പൗരന്മാർക്ക് ക്രിമിനൽ പശ്ചാത്തലമുള്ളതിനാൽ അവർക്ക് കാനഡയിൽ പ്രവേശനം അനുവദിക്കില്ലായിരുന്നുവെന്ന് സർക്കാർ അഭിഭാഷകൻ വ്യക്തമാക്കി. സഹായം നൽകാൻ ഇത്തരം നിയമവിരുദ്ധമായ വഴികൾ സ്വീകരിക്കരുതെന്ന് ജഡ്ജി മുന്നറിയിപ്പ് നൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Manitoba court sentences two US citizens to prison for trying to smuggle immigrants across border
