വിന്നിപെഗ്: മാനിറ്റോബ പ്രീമിയർ വാബ് കിന്യൂ പുതിയ ബജറ്റ് പ്രഖ്യാപിച്ചു. വർദ്ധിച്ചുവരുന്ന ജീവിതച്ചെലവ് കണക്കിലെടുത്ത് സാധാരണക്കാർക്ക് വലിയ ആശ്വാസം നൽകുന്ന പദ്ധതികളാണ് 2026-27 സാമ്പത്തിക വർഷത്തേക്കുള്ള ബജറ്റിൽ ഉൾപ്പെടുത്തിയിരിക്കുന്നത്. ഭക്ഷ്യവസ്തുക്കളുടെ പ്രൊവിൻഷ്യൽ സെയിൽസ് ടാക്സ് (PST) പൂർണ്ണമായും ഒഴിവാക്കിയതാണ് ബജറ്റിലെ പ്രധാന നടപടി.
ജൂലൈ 1 മുതൽ പ്രാബല്യത്തിൽ വരുന്ന പുതിയ തീരുമാനപ്രകാരം സാൻഡ്വിച്ചുകൾ, ജങ്ക് ഫുഡ് ഉൾപ്പെടെയുള്ള വിവിധ ഭക്ഷ്യവസ്തുക്കൾക്കും ഗർഭിണികൾക്കുള്ള വിറ്റാമിനുകൾക്കും നികുതി ഒഴിവാക്കും. കൂടാതെ, കുറഞ്ഞ വരുമാനമുള്ള 3,500 കുടുംബങ്ങൾക്ക് ചൈൽഡ് കെയർ ഫീസ് ഒഴിവാക്കാനും, സ്കൂൾ പ്രായമുള്ള കുട്ടികൾക്ക് സൗജന്യ ട്രാൻസിറ്റ് യാത്ര അനുവദിക്കാനും ബജറ്റിൽ തുക വകയിരുത്തിയിട്ടുണ്ട്. വീടുടമകൾക്കുള്ള സ്കൂൾ നികുതി ക്രെഡിറ്റ് 1,700 ഡോളറായി ഉയർത്തിയപ്പോൾ, ഒരു മില്യൺ ഡോളറിന് മുകളിൽ വിലയുള്ള വീടുകൾക്ക് ഈ ആനുകൂല്യം പരിമിതപ്പെടുത്തി.
ആരോഗ്യ-അടിസ്ഥാന സൗകര്യ വികസന മേഖലകൾക്കും ബജറ്റിൽ പ്രത്യേക ഊന്നൽ നൽകിയിട്ടുണ്ട്. സെന്റ് ബോണിഫേസ് ആശുപത്രിയിൽ 22.1 മില്യൺ ഡോളർ ചെലവിൽ പുതിയ ഹൃദയചികിത്സാ കേന്ദ്രം നിർമ്മിക്കും. കഴിഞ്ഞ വർഷത്തെ കാട്ടുതീ മൂലമുണ്ടായ നാശനഷ്ടങ്ങൾ കണക്കിലെടുത്ത് താംപ്സണിൽ 75 മില്യൺ ഡോളർ ചെലവിൽ പുതിയ ഫയർ ബേസ് സ്ഥാപിക്കാനും കൂടുതൽ അഗ്നിശമന സേനാംഗങ്ങളെ നിയമിക്കാനും തീരുമാനമായി. പുതിയ പ്രഖ്യാപനങ്ങൾ വഴി 498 മില്യൺ ഡോളറിന്റെ ബജറ്റ് കുറവ് പ്രതീക്ഷിക്കുന്നുണ്ടെങ്കിലും, സർക്കാരിന്റെ കാലാവധി കഴിയുന്നതോടെ സാമ്പത്തിക സ്ഥിതി സമതുലിതമാക്കുമെന്ന് ധനമന്ത്രി അഡ്രിയൻ സാല വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Manitoba Budget 2026: Food tax waived; big announcements to the relief of the people
