വിക്ടോറിയ: വിക്ടോറിയയിൽ പോലീസിനെ വെട്ടിച്ച് രക്ഷപ്പെടാൻ പാലത്തിൽ നിന്ന് വെള്ളത്തിലേക്ക് ചാടിയ യുവാവിനെ അധികൃതർ സാഹസികമായി രക്ഷപ്പെടുത്തി. വിക്ടോറിയ നഗരമധ്യത്തിലെ ജോൺസൺ സ്ട്രീറ്റ് ബ്രിഡ്ജിൽ വെള്ളിയാഴ്ച വൈകുന്നേരമാണ് നാടകീയമായ സംഭവങ്ങൾ അരങ്ങേറിയത്. പാലത്തിൽ ഒരാൾ പൊതുജനങ്ങളോട് ആക്രോശിക്കുകയും അക്രമാസക്തനായി പെരുമാറുകയും ചെയ്യുന്നതായി വിവരം ലഭിച്ചതിനെത്തുടർന്നാണ് പോലീസ് സ്ഥലത്തെത്തിയത്.
സംഭവസ്ഥലത്തെത്തിയ പോലീസ് ഉദ്യോഗസ്ഥർ യുവാവിനെ പിടികൂടാൻ ശ്രമിച്ചതോടെ ഇയാൾ ഓടി രക്ഷപ്പെടാൻ ശ്രമിക്കുകയായിരുന്നു. തുടർന്ന് പാലത്തിന്റെ വടക്ക് ഭാഗത്തുള്ള കൈവരികൾക്കിടയിലൂടെ താഴെയുള്ള വെള്ളത്തിലേക്ക് ഇയാൾ ചാടുകയായിരുന്നു. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
യുവാവ് വെള്ളത്തിൽ വീണ ഉടൻ തന്നെ ഒരു പോലീസ് ഉദ്യോഗസ്ഥനും പിന്നാലെ വെള്ളത്തിലിറങ്ങി. തുടർന്ന് മറ്റ് ഏജൻസികളുടെ സഹായത്തോടെ ഇയാളെ സുരക്ഷിതമായി കരയ്ക്കടുപ്പിച്ചു. സ്ഥലത്തെത്തിയ പാരാമെഡിക്സ് സംഘം പ്രാഥമിക പരിശോധനകൾക്ക് ശേഷം യുവാവിനെ വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റി. സംഭവത്തിൽ കൂടുതൽ അന്വേഷണം നടന്നു വരികയാണെന്ന് വിക്ടോറിയ പോലീസ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Man jumped off Johnson Street Bridge to evade arrest, Victoria police say
