ഒട്ടാവ: ഡിഫെൻസ് സെക്യൂരിറ്റി ആൻഡ് റേസിലിൻസ് ബാങ്കിന്റെ (ഡി.എസ്.ആർ.ബി) ആസ്ഥാനം സ്വന്തമാക്കാൻ കാനഡയിലെ പ്രമുഖ നഗരങ്ങൾ തമ്മിൽ മത്സരം മുറുകുന്നു. ബാങ്കിന്റെ ആസ്ഥാനം രാജ്യത്ത് സ്ഥാപിക്കാനുള്ള നീക്കങ്ങൾ സജീവമായതോടെ ടൊറന്റോ, മോൺട്രിയൽ, വാങ്കൂവർ, ഒട്ടാവ നഗരങ്ങളാണ് രംഗത്തെത്തിയിരിക്കുന്നത്. നാറ്റോ സഖ്യരാഷ്ട്രങ്ങളിലെ പ്രതിരോധ-സുരക്ഷാ പദ്ധതികൾക്ക് സാമ്പത്തിക സഹായം നൽകുന്നതിനായി രൂപീകരിക്കുന്ന ഈ ബാങ്ക്, കാനഡയുടെ സാമ്പത്തിക-പ്രതിരോധ മേഖലകളിൽ വലിയ മാറ്റങ്ങൾ കൊണ്ടുവരുമെന്നാണ് പ്രതീക്ഷിക്കുന്നത്.
40 ഓളം രാജ്യങ്ങൾ പങ്കാളികളാകുന്ന ബാങ്കിന് ഏകദേശം 135 ബില്യൺ ഡോളർ ആസ്തിയുണ്ടാകുമെന്നാണ് പ്രാഥമിക കണക്കുകൾ. ആസ്ഥാനം വരുന്ന നഗരത്തിൽ 3,500 ഓളം പേർക്ക് നേരിട്ട് തൊഴിൽ ലഭിക്കാനും സാധ്യതയുണ്ട്. നിലവിൽ ടൊറോന്റോയും മോൺട്രിയലുമാണ് മത്സരത്തിൽ മുന്നിലെങ്കിലും, അന്താരാഷ്ട്ര വിമാനത്താവള സൗകര്യങ്ങളും പ്രതിരോധ വ്യവസായ മേഖലയിലെ സാന്നിധ്യവും പരിഗണിച്ച് മറ്റ് നഗരങ്ങളും അവകാശവാദമുന്നയിക്കുന്നുണ്ട്. ഒന്റാറിയോ പ്രീമിയർ ഡഗ് ഫോർഡ് ടൊറോന്റോയ്ക്കായി ഇതിനോടകം തന്നെ പ്രചാരണം ശക്തമാക്കിയിട്ടുണ്ട്.
അതേസമയം, ബാങ്കിന്റെ ആസ്ഥാനം സംബന്ധിച്ച ഔദ്യോഗിക ടെൻഡർ നടപടികൾ ഫെഡറൽ സർക്കാർ ഉടൻ പ്രഖ്യാപിക്കുമെന്നാണ് വിവരം. പസഫിക് മേഖലയിലെ രാജ്യങ്ങളെ ബാങ്കിൽ ഉൾപ്പെടുത്തുന്ന പക്ഷം വാങ്കൂവറിനും, നയതന്ത്ര പ്രാധാന്യം കണക്കിലെടുത്ത് തലസ്ഥാനമായ ഒട്ടാവയ്ക്കും സാധ്യതയുണ്ടെന്ന് വിലയിരുത്തപ്പെടുന്നു. ആഗോള സുരക്ഷാ താത്പര്യങ്ങൾ മുൻനിർത്തി പദ്ധതി വേഗത്തിൽ നടപ്പിലാക്കുമെന്ന് ധനമന്ത്രി ഫ്രാൻസ്വാ-ഫിലിപ്പ് ഷാംപെയ്നിന്റെ ഓഫീസ് അറിയിച്ചു. നഗരങ്ങളുടെ അടിസ്ഥാന സൗകര്യങ്ങളും സാങ്കേതിക മികവും പരിശോധിച്ച ശേഷമായിരിക്കും അന്തിമ തീരുമാനം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Who will host the DSRB headquarters? Major cities including Toronto and Montreal are in the running
