ടൊറന്റോ: നിങ്ങൾ വിദേശത്തേക്ക് വിമാനം കയറാൻ ഒരുങ്ങുകയാണോ? എന്നാൽ എയർപോർട്ടിൽ വെച്ച് നിങ്ങളുടെ ലഗേജ് കൈമാറുന്നതിന് മുൻപ് നൂറുവട്ടം ചിന്തിക്കുക. കാനഡയിലെ വിമാനത്താവളങ്ങൾ കേന്ദ്രീകരിച്ച് അന്താരാഷ്ട്ര മയക്കുമരുന്ന് മാഫിയ നടത്തുന്ന ഞെട്ടിക്കുന്ന ‘ബാഗ്-ടാഗ് മാറ്റിവെക്കൽ’ (Bag-Tag Switching) തട്ടിപ്പിന്റെ വിവരങ്ങളാണ് ഇപ്പോൾ പുറത്തുവന്നിരിക്കുന്നത്. സാധാരണക്കാരായ യാത്രക്കാർ അറിയാതെ അവരുടെ പേരും വിവരങ്ങളുമടങ്ങിയ ടാഗുകൾ തട്ടിയെടുത്ത്, കോടിക്കണക്കിന് രൂപയുടെ മയക്കുമരുന്ന് അടങ്ങിയ മറ്റ് ബാഗുകളിൽ ഒട്ടിച്ചാണ് ഇവർ കടത്തുന്നത്. വിദേശ രാജ്യങ്ങളിൽ വെച്ച് ഈ മയക്കുമരുന്ന് ബാഗുകൾ പിടിക്കപ്പെട്ടാൽ, നിരപരാധികളായ യാത്രക്കാർ മയക്കുമരുന്ന് കടത്തുകാരായി ചിത്രീകരിക്കപ്പെടുകയും ജയിലിലാവുകയും ചെയ്യും. ഫിലിപ്പീൻസ്, കൊറിയ തുടങ്ങിയ രാജ്യങ്ങളിലേക്കുള്ള വിമാനങ്ങളിലാണ് ഈ കെണി പ്രധാനമായും ഒരുക്കുന്നത്.
വിമാനത്താവളങ്ങളിലെ ചില അഴിമതിക്കാരായ ജീവനക്കാരുടെ ഒത്താശയോടെയാണ് ഈ മാഫിയ പ്രവർത്തിക്കുന്നത്. യാത്രക്കാർ ലഗേജ് കൗണ്ടറിൽ ഏൽപ്പിക്കുന്ന ബാഗുകളിൽ നിന്നുള്ള ഒറിജിനൽ ടാഗ് ജീവനക്കാർ അതീവ രഹസ്യമായി മാറ്റുകയും, ഈ ടാഗ് മയക്കുമരുന്ന് നിറച്ച മറ്റൊരു ബാഗിൽ ഒട്ടിക്കുകയുമാണ് ചെയ്യുന്നത്. ലക്ഷ്യസ്ഥാനത്ത് ഈ മയക്കുമരുന്ന് ബാഗ് സുരക്ഷിതമായി എത്തിയാൽ മാഫിയയുടെ ആളുകൾ അത് കൈപ്പറ്റും. എന്നാൽ പരിശോധനയിൽ പിടിക്കപ്പെട്ടാൽ, ടാഗിലെ പേര് വിവരങ്ങൾ നോക്കി നിരപരാധികളായ യാത്രക്കാരെ പോലീസ് അറസ്റ്റ് ചെയ്യും. കഴിഞ്ഞ ഒരു വർഷത്തിനിടെ കാനഡയിൽ നിന്നും ഇത്തരത്തിൽ 17 നിരപരാധികളായ യാത്രക്കാരാണ് അന്താരാഷ്ട്ര തലത്തിൽ മയക്കുമരുന്ന് കേസിൽ കുടുങ്ങിയത്. ടൊറന്റോ പിയേഴ്സൺ എയർപോർട്ടിലെ ആറ് ജീവനക്കാരെ ഇതിനോടകം റോയൽ കനേഡിയൻ മൗണ്ടഡ് പോലീസ് (RCMP) അറസ്റ്റ് ചെയ്തിട്ടുണ്ട്.
ടൊറന്റോ സ്വദേശിയായ നിക്കോൾ എന്ന പാരാമെഡിക് ഉദ്യോഗസ്ഥയ്ക്ക് നേരിടേണ്ടി വന്നത് സമാനമായ ഒരു ഭീതിജനകമായ അനുഭവമാണ്. കുടുംബത്തോടൊപ്പം ന്യൂസിലാൻഡിലേക്ക് യാത്ര തിരിക്കവെയാണ് വാൻകൂവർ എയർപോർട്ടിൽ വെച്ച് കനേഡിയൻ അതിർത്തി രക്ഷാസേന ഇവരെ തടഞ്ഞുവെച്ചത്. നിക്കോളിന്റെ പേര് വിവരങ്ങളുള്ള ബാഗിൽ നിന്നും 20 കിലോഗ്രാമിലധികം മാരക മയക്കുമരുന്നാണ് ഉദ്യോഗസ്ഥർ കണ്ടെടുത്തത്. തന്റെ പേരുള്ള ടാഗ് അതിൽ ഉണ്ടായിരുന്നതിനാൽ ആദ്യം നിഷേധിക്കാൻ പോലും കഴിഞ്ഞില്ലെന്ന് നിക്കോൾ ഭീതിയോടെ ഓർക്കുന്നു. ഒടുവിൽ മണിക്കൂറുകൾ നീണ്ട ചോദ്യം ചെയ്യലിനും സിസിടിവി ദൃശ്യങ്ങളുടെ പരിശോധനയ്ക്കും ശേഷമാണ് നിക്കോൾ നിരപരാധിയാണെന്ന് തെളിഞ്ഞത്. മറ്റൊരു സംഭവത്തിൽ, ഇത്തരമൊരു തട്ടിപ്പിൽ പെട്ട് മൂന്ന് കനേഡിയൻ സ്വദേശികൾക്ക് ഡൊമിനിക്കൻ റിപ്പബ്ലിക്കിലെ ജയിലിൽ 100 ദിവസത്തിലധികം കഴിയേണ്ടി വന്നിരുന്നു.
ഈ തട്ടിപ്പിൽ നിന്ന് രക്ഷപ്പെടാൻ യാത്രക്കാർ കൃത്യമായ മുൻകരുതലുകൾ എടുക്കണമെന്ന് വിദഗ്ധർ നിർദ്ദേശിക്കുന്നു. എയർപോർട്ടിൽ ബാഗ് കൈമാറുന്നതിന് മുൻപ് നിങ്ങളുടെ ബാഗിന്റെ വ്യക്തമായ ചിത്രവും വീഡിയോയും എടുത്തു സൂക്ഷിക്കേണ്ടത് അത്യാവശ്യമാണ്. ലഗേജ് വെയ്റ്റിംഗ് മെഷീനിൽ വെക്കുമ്പോൾ അതിന്റെ ഭാരം കാണിക്കുന്ന ചിത്രമെടുക്കുന്നത് പിന്നീട് ബാഗിൽ മറ്റ് സാധനങ്ങൾ കൂട്ടിച്ചേർത്തിട്ടില്ല എന്ന് തെളിയിക്കാൻ സഹായിക്കും. യാത്ര പൂർത്തിയായി നിങ്ങളുടെ ബാഗ് സുരക്ഷിതമായി കൈകളിൽ കിട്ടുന്നത് വരെ എയർപോർട്ടിൽ നിന്നും തരുന്ന ചെറിയ സ്റ്റിക്കറോ റെസീപ്റ്റോ യാതൊരു കാരണവശാലും കളയരുത്. നിങ്ങളുടെ ബാഗിൽ ഒട്ടിച്ചിരിക്കുന്ന ടാഗിലെ നമ്പർ, പേര്, പോകേണ്ട സ്ഥലം എന്നിവ വ്യക്തമായി കാണുന്ന രീതിയിൽ മൊബൈലിൽ ഒരു ചിത്രമെടുക്കുന്നതും ആപ്പിൾ എയർടാഗ് പോലുള്ള ട്രാക്കിംഗ് ഉപകരണങ്ങൾ ലഗേജിനുള്ളിൽ വെക്കുന്നതും ഇത്തരം കെണികളിൽ പെടാതിരിക്കാൻ സഹായിക്കും.
Luggage-tag switching scheme involves flights from Canada to countries where drug smuggling can carry death penalty
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
