ഒട്ടാവ : പരിസ്ഥിതി നയങ്ങളിൽ വരുത്തുന്ന മാറ്റങ്ങളിൽ അതൃപ്തി പ്രകടിപ്പിച്ച് 14 ലിബറൽ പാർട്ടി എംപിമാർ കാനഡ പ്രധാനമന്ത്രി മാർക്ക് കാർണിക്ക് കത്തയച്ചു. ആൽബെർട്ട ഗവൺമെന്റുമായി പുതിയ പൈപ്പ്ലൈൻ കരാർ ഒപ്പിടുന്നതിന് മുൻപ്, ഏപ്രിൽ അവസാനത്തോടെയാണ് എംപിമാർ പ്രധാനമന്ത്രിക്ക് കത്തയച്ചത്. കഴിഞ്ഞ ആഴ്ചയാണ് പടിഞ്ഞാറൻ തീരത്തേക്ക് ഒപ്റ്റിക്കൽ ഓയിൽ പൈപ്പ്ലൈൻ നിർമ്മിക്കുന്നതിനായി അൽബെർട്ട പ്രീമിയർ ഡാനിയേൽ സ്മിത്തുമായി പ്രധാനമന്ത്രി കരാർ ഒപ്പിട്ടത്. പുതിയ കരാർ പ്രകാരം 2027 സെപ്റ്റംബറോടെ നിർമ്മാണം ആരംഭിക്കാൻ സാധിക്കുമെന്നാണ് വിലയിരുത്തൽ.
കത്തിൽ ഒപ്പുവെച്ചിട്ടുണ്ടെങ്കിലും തങ്ങളുടെ പേരുകൾ പരസ്യപ്പെടുത്താൻ എംപിമാർ തയ്യാറായിട്ടില്ല. ഈ നീക്കം സർക്കാരിനെതിരെയല്ലെന്നും മറിച്ച് പരിസ്ഥിതി വിഷയങ്ങളിൽ നിർദ്ദേശങ്ങൾ സമർപ്പിക്കാനും തങ്ങളുടെ ആശങ്കകൾ അറിയിക്കാനും ഉള്ളതാണെന്നും എംപിമാർ വ്യക്തമാക്കുന്നു. നിലവിലെ നയപരമായ മാറ്റങ്ങളിൽ തങ്ങൾക്ക് വലിയ ആശങ്കയുണ്ടെന്നും ഇത് സർക്കാരിന്റെ വിശ്വാസ്യതയെ സാരമായി ബാധിക്കുമെന്നും റേഡിയോ-കാനഡയ്ക്ക് ലഭിച്ച കത്തിൽ എംപിമാർ ചൂണ്ടിക്കാണിക്കുന്നു. ക്യൂബെക്ക്, ബ്രിട്ടീഷ് കൊളംബിയ എന്നിവയുൾപ്പെടെയുള്ള വിവിധ പ്രവിശ്യകളിൽ നിന്നുള്ള എംപിമാരാണ് കത്തിൽ ഒപ്പുവെച്ചിരിക്കുന്നത്.
ആൽബെർട്ടയ്ക്ക് ഇളവുകൾ നൽകുന്ന പശ്ചാത്തലത്തിൽ, ക്ലീൻ ഇലക്ട്രിസിറ്റി നിയന്ത്രണങ്ങളെ പിന്തുണയ്ക്കേണ്ടതിന്റെ പ്രാധാന്യം ജനപ്രതിനിധികൾ കത്തിലൂടെ വീണ്ടും ഓർമ്മിപ്പിച്ചു. നമ്മുടെ കാലഘട്ടം നേരിടുന്ന ഏറ്റവും വലിയ ഭീഷണി കാലാവസ്ഥാ വ്യതിയാനമാണെന്നും കത്തിൽ ഊന്നിപ്പറയുന്നുണ്ട്. ലിബറൽ പാർട്ടിയിലെ സ്റ്റീവൻ ഗിൽബോൾട്ട് ഉൾപ്പെടെയുള്ള പ്രമുഖ നേതാക്കൾ മുൻപും കാർണിയുടെ പരിസ്ഥിതി നയങ്ങൾക്കെതിരെ പരസ്യമായി രംഗത്തുവന്നിരുന്നു. ആൽബെർട്ടയുമായുള്ള പ്രാഥമിക ധാരണാപത്രത്തിന് പിന്നാലെ ഗിൽബോൾട്ട് കാർണിയുടെ ക്യാബിനറ്റിൽ നിന്നും രാജിവെച്ചിരുന്നു. അതേസമയം, കത്തുമായി ബന്ധപ്പെട്ട മാധ്യമങ്ങളുടെ പ്രതികരണത്തോടും ചോദ്യങ്ങളോടും പ്രധാനമന്ത്രിയുടെ ഓഫീസ് ഇതുവരെ പ്രതികരിച്ചിട്ടില്ല.
പാർലമെന്റിന്റെ വേനൽക്കാല അവധിക്ക് മുൻപുള്ള അവസാന ആഴ്ചകളിൽ ലിബറൽ പാർട്ടിയിലെ കാലാവസ്ഥാ അനുകൂലികളായ എംപിമാരെ സ്വാധീനിക്കാനാണ് ബ്ലോക്ക് ക്യുബെക്കോയിസ് (Bloc Québécois) ശ്രമിക്കുന്നത്. കാലാവസ്ഥാ പ്രതിസന്ധിയിൽ ആശങ്കയുള്ളവരുടെ ശബ്ദം പാർലമെന്റിൽ എത്തിക്കാൻ ലഭ്യമായ എല്ലാ മാർഗ്ഗങ്ങളും ഉപയോഗിക്കുമെന്ന് ബ്ലോക്ക് എംപി പാട്രിക് ബോണിൻ ഒരു അഭിമുഖത്തിൽ വ്യക്തമാക്കി. നിലവിൽ എണ്ണ-വാതക കമ്പനികളുടെ അജണ്ടയാണ് നടപ്പിലാക്കുന്നതെന്നും ഇതിനെതിരെ കൂടുതൽ ലിബറൽ എംപിമാർ പരസ്യമായി രംഗത്തുവരുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേർത്തു.
Liberal MPs oppose Mark Carney’s environmental policies; 14 MPs write to PM
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
