കാനഡയിൽ വീണ്ടും ഭാഷാവിവാദം പുകയുന്നു; ന്യൂ ബ്രൺസ്വിക്കിൽ അടുത്ത ആഴ്ച മുതൽ ജനകീയ സമ്പർക്ക പര്യടനം

ഫ്രെഡറിക്ടൺ: ന്യൂ ബ്രൺസ്വിക്കിൽ ദ്വിഭാഷാ പരിപാലനവുമായി ബന്ധപ്പെട്ട് ഉയർന്നുവന്ന തർക്കങ്ങൾക്കും കോടതിവിധികൾക്കും പിന്നാലെ, ഔദ്യോഗിക ഭാഷാ നിയമം പരിഷ്കരിക്കുന്നതിനുള്ള ചരിത്രപരമായ ജനകീയ സമ്പർക്ക പരിപാടിക്ക് അടുത്ത ആഴ്ച തുടക്കമാകും. പ്രവിശ്യയുടെ ചരിത്രത്തിലാദ്യമായാണ് ഔദ്യോഗിക ഭാഷാ നിയമം അവലോകനം ചെയ്യുന്നതിന്റെ ഭാഗമായി പൊതുജനങ്ങളിൽ നിന്ന് നേരിട്ട് അഭിപ്രായം തേടി പ്രത്യേക നിയമസഭാ സമിതി പ്രവിശ്യാപര്യടനം നടത്തുന്നത്. ലിബറൽ, പ്രോഗ്രസീവ് കൺസർവേറ്റീവ്, ഗ്രീൻ പാർട്ടി പ്രതിനിധികൾ ഉൾപ്പെടുന്ന നിയമസഭയുടെ സ്റ്റാൻഡിങ് കമ്മിറ്റിയാണ് ഈ വർഷാവസാനത്തോടെ അന്തിമ റിപ്പോർട്ട് സമർപ്പിക്കുന്നതിന് മുന്നോടിയായി പൊതുജനങ്ങളെ കാണുന്നത്. പ്രവിശ്യയിലെ ഒൻപത് പ്രധാന കേന്ദ്രങ്ങളിലായി ജൂൺ 16 മുതൽ ജൂൺ 26 വരെയാണ് പബ്ലിക് കൺസൾട്ടേഷനുകൾ ക്രമീകരിച്ചിരിക്കുന്നത്.

വിവിധ നഗരങ്ങളിലെ ചർച്ചകളുടെ സമയവിവരം ചുവടെ ചേർക്കുന്നു:

ഗ്രാൻഡ് ഫോൾസ്: ജൂൺ 16, ചൊവ്വാഴ്ച രാവിലെ 9:00 (ഇ. ആൻഡ് പി. സെനെച്ചൽ സെന്റർ)
കാംബെൽട്ടൺ: ജൂൺ 17, ബുധനാഴ്ച രാവിലെ 9:00 (മെമ്മോറിയൽ റീജിയണൽ സിവിക് സെന്റർ)
പെറ്റിറ്റ്-റോഷർ: ജൂൺ 17, ബുധനാഴ്ച ഉച്ചയ്ക്ക് 2:00 (സാലെ മൾട്ടിഫങ്ഷണൽ ഡെനിസ്-റിച്ചാർഡ്)
കാരക്വറ്റ്: ജൂൺ 18, വ്യാഴാഴ്ച രാവിലെ 9:00 (സെന്റർ കൾച്ചറൽ ഡി കാരക്വറ്റ്)
റോജേഴ്സ്വിൽ: ജൂൺ 19, വെള്ളിയാഴ്ച രാവിലെ 9:00 (മുനിസിപ്പൽ ഓഫീസ്)
മോങ്ക്ടൺ: ജൂൺ 23, ചൊവ്വാഴ്ച രാവിലെ 9:00 (ഡെൽറ്റ ഹോട്ടൽസ് ബൈ മാരിയറ്റ് ബ്യൂസേജർ)
സെന്റ് ജോൺ: ജൂൺ 24, ബുധനാഴ്ച രാവിലെ 9:00 (മാർക്കോ പോളോ ക്രൂയിസ് ടെർമിനൽ)
ഫ്രെഡറിക്ടൺ: ജൂൺ 25, വ്യാഴാഴ്ച രാവിലെ 9:00 (ലെജിസ്ലേറ്റീവ് അസംബ്ലി)
വുഡ്സ്റ്റോക്ക്: ജൂൺ 26, വെള്ളിയാഴ്ച രാവിലെ 9:00 (എ.വൈ.ആർ. മോട്ടോർ സെന്റർ)

കഴിഞ്ഞ മാസം നിയമസഭയ്ക്കുള്ളിൽ വിവിധ സംഘടനകളെ പങ്കെടുപ്പിച്ച് സ്റ്റാൻഡിങ് കമ്മിറ്റി നാല് സുപ്രധാന യോഗങ്ങൾ ചേർന്നിരുന്നു. സ്വകാര്യ പങ്കാളിത്തത്തോടെ പ്രവർത്തിക്കുന്ന നഴ്സിങ് ഹോമുകളിൽ ഔദ്യോഗിക ഭാഷാ നിർബന്ധങ്ങൾ ബാധകമാക്കുന്നതിനെക്കുറിച്ചായിരുന്നു യോഗങ്ങളിൽ ഉയർന്ന പ്രധാന ചോദ്യം. 2021-ലെ നിയമ അവലോകന റിപ്പോർട്ടിലാണ് ഈ ശുപാർശ ആദ്യമായി മുന്നോട്ടുവെച്ചത്.
സെന്റ് ജോണിൽ താമസിക്കുന്ന ഫ്രഞ്ച് സംസാരിക്കുന്ന അക്കാഡിയൻ വംശജർക്ക് തെക്കൻ ന്യൂ ബ്രൺസ്വിക്കിലെ പ്രത്യേക പരിചരണ കേന്ദ്രങ്ങളിൽ ഫ്രഞ്ച് ഭാഷയിൽ സേവനം ലഭിക്കാത്തതിലുള്ള ആശങ്ക സൊസൈറ്റി ഡി ലക്കാഡി ഡു നൊവൊ-ബ്രൺസ്വിക്ക് പ്രസിഡന്റ് നിക്കോൾ ആർസെനോ-സ്ലൂട്ടർ ഉന്നയിച്ചു.

പ്രായമായ കാലത്ത് ഇത്തരം കേന്ദ്രങ്ങളിൽ ഇംഗ്ലീഷിൽ മാത്രം സേവനം ലഭിക്കുന്നത് പ്രയാസമുണ്ടാക്കുമെന്നും ജീവനക്കാരിൽ ഒന്നുരണ്ടു പേരെങ്കിലും ഫ്രഞ്ച് സംസാരിക്കുന്നവരായിരിക്കണമെന്നും അവർ ആവശ്യപ്പെട്ടു. എന്നാൽ, അതീവ ശ്രദ്ധയോടെയല്ലാതെ ഈ നിയമം നടപ്പാക്കിയാൽ അത് നഴ്സിങ് ഹോം മേഖലയുടെ സുസ്ഥിരതയെ ബാധിക്കുമെന്ന് ന്യൂ ബ്രൺസ്വിക്ക് അസോസിയേഷൻ ഓഫ് നഴ്സിങ് ഹോംസ് ചീഫ് ഓപ്പറേറ്റിങ് ഓഫീസർ ജസ്റ്റിൻ വൈസ് ചൂണ്ടിക്കാട്ടി. സ്കൂളുകളിലെ ഫ്രഞ്ച് ഇമ്മേഴ്‌ഷൻ പഠനരീതിയും പുതുതായി എത്തുന്നവർക്കുള്ള ഭാഷാ പരിശീലനവും സമിതിയുടെ ചർച്ചാവിഷയങ്ങളാണ്.

1969-ൽ ലിബറൽ പ്രീമിയർ ലൂയിസ് ജെ. റോബിചൗഡിന്റെ കാലത്താണ് ന്യൂ ബ്രൺസ്വിക്കിൽ ഔദ്യോഗിക ഭാഷാ നിയമം ആദ്യമായി കൊണ്ടുവന്നത്. പിന്നീട് 2002-ൽ ഇതിൽ വലിയ ഭേദഗതികൾ വരുത്തുകയും ലാംഗ്വേജ് കമ്മീഷണർ പദവി സൃഷ്ടിക്കുകയും ചെയ്തു. എന്നാൽ, സമീപകാലത്തുണ്ടായ ചില സംഭവവികാസങ്ങളാണ് ഭാഷാവിഷയം വീണ്ടും സജീവ ചർച്ചയാക്കിയത്.

സർക്കാർ ഉടമസ്ഥതയിലുള്ള കോർപ്പറേഷനുകൾക്ക് വേണ്ടി സ്വകാര്യ വ്യക്തികൾ നടത്തുന്ന ഏജൻസി മദ്യഷാപ്പുകളിൽ (ANBL) ദ്വിഭാഷാ സേവനം നിർബന്ധമാക്കിക്കൊണ്ട് കഴിഞ്ഞ മാസം ഒഫീഷ്യൽ ലാംഗ്വേജ് കമ്മീഷണർ ഉത്തരവിട്ടിരുന്നു. 2025 ഫെബ്രുവരിയിൽ ഒരു ഏജൻസി സ്റ്റോറിൽ ഇംഗ്ലീഷ് മാത്രം സംസാരിച്ചതിനെതിരെ ഉയർന്ന പരാതിയിലായിരുന്നു ഈ നടപടി. കമ്മീഷണറുടെ ഈ തീരുമാനത്തെ നിയമസഭയിലെ മൂന്ന് പ്രധാന രാഷ്ട്രീയ പാർട്ടികളും പിന്തുണച്ചിരുന്നു.

ഇതിനുപുറമേ, കഴിഞ്ഞ വെള്ളിയാഴ്ച കാനഡ സുപ്രീം കോടതി പുറപ്പെടുവിച്ച മറ്റൊരു നിർണായക വിധിയും പ്രവിശ്യയിൽ ചർച്ചയായിട്ടുണ്ട്. ന്യൂ ബ്രൺസ്വിക്ക് ലഫ്റ്റനന്റ് ഗവർണർ പദവിയിലിരിക്കുന്നയാൾക്ക് രണ്ട് ഔദ്യോഗിക ഭാഷകളും (ഇംഗ്ലീഷും ഫ്രഞ്ചും) അറിഞ്ഞിരിക്കണമെന്നാണ് സുപ്രീം കോടതി ഉത്തരവിട്ടത്. 2019-ൽ ഇംഗ്ലീഷ് മാത്രം സംസാരിക്കുന്ന ബ്രെൻഡ മർഫിയെ ലഫ്റ്റനന്റ് ഗവർണറായി നിയമിച്ചതിനെതിരെ ഫയൽ ചെയ്ത ഹർജിയിലാണ് ഈ വിധി.

സുപ്രീം കോടതി വിധിയെ സ്വാഗതം ചെയ്യുന്നതായി പ്രീമിയർ സൂസൻ ഹോൾട്ട് വ്യക്തമാക്കി. ഔദ്യോഗിക പദവിയിലിരുന്ന കാലയളവിൽ ദ്വിഭാഷാ നൈപുണ്യം നേടാൻ ബ്രെൻഡ മർഫി വലിയ ശ്രമങ്ങൾ നടത്തിയിട്ടുണ്ടെങ്കിലും, തുടക്കത്തിൽ തന്നെ രണ്ട് ഭാഷകളും അറിയാവുന്ന ഒരാളെ വേണമായിരുന്നു ഈ പദവിയിലേക്ക് നിയമിക്കേണ്ടതെന്ന് പ്രീമിയർ മാധ്യമങ്ങളോട് പറഞ്ഞു. ഈ പശ്ചാത്തലങ്ങളെല്ലാം മുൻനിർത്തി അടുത്ത ആഴ്ച ആരംഭിക്കുന്ന ജനകീയ സമ്പർക്ക പരിപാടിക്ക് വലിയ രാഷ്ട്രീയ-സാമൂഹിക പ്രാധാന്യമാണ് കാനഡയിൽ കൽപ്പിക്കപ്പെടുന്നത്.

Language controversy reignites in Canada; New Brunswick to hold public outreach tour next week

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt