വിസ തടസ്സപ്പെട്ടതിനെ തുടർന്ന് നടൻ മോഹൻലാൽ പങ്കെടുക്കേണ്ടിയിരുന്ന ഓസ്ട്രേലിയയിലെ സിഡ്നി ഷോ മാറ്റിവെച്ചു. കെ.എസ്. ചിത്ര ഉൾപ്പെടെയുള്ള മറ്റ് പ്രമുഖ താരങ്ങളെല്ലാം ഓസ്ട്രേലിയയിൽ എത്തിയ ശേഷമാണ് അവസാന നിമിഷം മോഹൻലാലിന്റെ യാത്ര മുടങ്ങിയത്. ഇതോടെ പരിപാടി താൽക്കാലികമായി നീട്ടിവെക്കാൻ സംഘാടകർ തീരുമാനിക്കുകയായിരുന്നു.
സംഭവത്തിൽ സംഘാടകരോടും ടിക്കറ്റെടുത്ത് കാത്തിരുന്ന കാണികളോടും മോഹൻലാൽ വീഡിയോ സന്ദേശത്തിലൂടെ വൈകാരികമായി ക്ഷമ ചോദിച്ചു. സാങ്കേതിക പിഴവാണോ ക്ലറിക്കൽ തെറ്റാണോ എന്ന് അറിയില്ലെന്നും, എന്തായാലും ഇതിന്റെ ഉത്തരവാദിത്തം സ്വന്തം കുറ്റമായി തന്നെ ഏറ്റെടുക്കുന്നുവെന്നും അദ്ദേഹം പറഞ്ഞു. ഇത്രയും വലിയൊരു നിസ്സഹായവസ്ഥ തന്റെ ജീവിതത്തിൽ ആദ്യമായാണെന്നും മോഹൻലാൽ വ്യക്തമാക്കി.
ഇന്ത്യയിൽ നിന്നുള്ള ഒരു അഭിനേതാവ് എന്ന നിലയിൽ ഏറ്റവും കൂടുതൽ സ്റ്റേജ് ഷോകൾ ചെയ്തിട്ടുള്ളത് താനായിരിക്കുമെന്നും, എന്തു കൊണ്ടാണെന്ന് അറിയില്ല ജീവിതത്തിൽ ആദ്യമായാണ് ഇങ്ങനെ സംഭവിക്കുന്നതെന്നും അദ്ദേഹം കൂട്ടിച്ചേർത്തു. മണിക്കൂറുകളോളം ഡ്രൈവ് ചെയ്തും അല്ലാതെയും ഷോ കാണാനെത്തിയ എല്ലാവരോടും ഹൃദയത്തിന്റെ ഭാഷയിൽ ക്ഷമ ചോദിക്കുന്നതായും താരം സന്ദേശത്തിൽ പറഞ്ഞു.
ഇതേ ടീമുമായി കൂടുതൽ ഗംഭീരമായ ഒരു ഷോയുമായി മടങ്ങിയെത്തുമെന്ന് മോഹൻലാൽ ഉറപ്പുനൽകി. പുതിയ തീയതി ആളുകളുടെ സൗകര്യം കൂടി പരിഗണിച്ച് പിന്നീട് പ്രഖ്യാപിക്കും. തന്റെ നിസ്സഹായത മനസ്സിലാക്കി ഈ ക്ഷമാപണം സ്വീകരിക്കണമെന്ന് പറഞ്ഞാണ് മോഹൻലാൽ വീഡിയോ സന്ദേശം അവസാനിപ്പിച്ചത്.
Lalettan fails to get visa; Australian show cancelled
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
