ടൊറന്റോ: അന്താരാഷ്ട്ര വിപണിയിലെ ആശങ്കകൾക്ക് വിരാമമിട്ട് യൂറോപ്പിൽ ജെറ്റ് ഇന്ധനക്ഷാമം ഉണ്ടാകില്ലെന്ന ഉറപ്പുമായി എയർ കാനഡ ഉൾപ്പെടെയുള്ള പ്രമുഖ ആഗോള വിമാനക്കമ്പനികൾ രംഗത്തെത്തി. മിഡിൽ ഈസ്റ്റിലെ യുദ്ധസാഹചര്യങ്ങളെ തുടർന്ന് ഇന്ധന വിതരണത്തിൽ പ്രതിസന്ധി നേരിടുമെന്ന മുന്നറിയിപ്പുകൾ ഉയർന്ന പശ്ചാത്തലത്തിലാണ്, വരാനിരിക്കുന്ന വേനൽക്കാല യാത്രാസീസണിൽ വിമാന സർവീസുകളെ ഇതൊന്നും ബാധിക്കില്ലെന്ന് കമ്പനികൾ ഔദ്യോഗികമായി വ്യക്തമാക്കിയത്. ഇതോടെ യൂറോപ്പിലേക്കുള്ള യാത്രാ ബുക്കിംഗുകൾ തടസ്സമില്ലാതെ തുടരുമെന്നും വ്യോമയാന മേഖല ഉറപ്പുനൽകി.
ഏപ്രിലിൽ ഇറാൻ യുദ്ധത്തെത്തുടർന്ന് വിതരണ ശൃംഖല തകരാറിലായതോടെയാണ് യൂറോപ്പിൽ കടുത്ത ഇന്ധനക്ഷാമം ഉണ്ടാകുമെന്ന സൂചനകൾ പുറത്തുവന്നത്. ആറാഴ്ചത്തേക്കുള്ള ഇന്ധനം മാത്രമാണ് അവശേഷിക്കുന്നതെന്ന രാജ്യാന്തര ഊർജ ഏജൻസിയുടെ (IEA) മുന്നറിയിപ്പിനെത്തുടർന്ന് ജർമ്മൻ വിമാനക്കമ്പനിയായ ലുഫ്താൻസ ഒട്ടേറെ സർവീസുകൾ റദ്ദാക്കിയിരുന്നു. എന്നാൽ നിലവിൽ മെയ് മാസത്തോടെ ഇന്ധന ആവശ്യകത കുറയുകയും, ആഫ്രിക്ക, അമേരിക്കൻ ഗൾഫ് തീരങ്ങൾ എന്നിവിടങ്ങളിൽ നിന്ന് പുതിയ വിതരണ മാർഗങ്ങൾ കണ്ടെത്തുകയും ചെയ്തതോടെയാണ് പ്രതിസന്ധിക്ക് താൽക്കാലിക പരിഹാരമായത്.
വലിയ വിമാനക്കമ്പനികൾക്ക് ആവശ്യമായ ഇന്ധനം വിപണിയിൽ ലഭ്യമാണെന്ന് വ്യോമയാന വിദഗ്ധർ വിലയിരുത്തുന്നുണ്ടെങ്കിലും വിപണിയിലെ അനിശ്ചിതത്വം പൂർണമായി ഒഴിഞ്ഞിട്ടില്ല. നിലവിൽ ഇന്ധനവിലയിൽ കുറവുണ്ടെങ്കിലും അന്താരാഷ്ട്ര തലത്തിലെ കപ്പൽ ഗതാഗത തടസ്സങ്ങൾ തുടർന്നാൽ ഭാവിയിൽ വില വീണ്ടും ഉയർന്നേക്കാമെന്ന് വിപണി ഗവേഷണ സ്ഥാപനങ്ങൾ ചൂണ്ടിക്കാണിക്കുന്നുണ്ട്. എങ്കിലും നിലവിലെ സാഹചര്യത്തിൽ വേനൽക്കാല യാത്രകൾക്ക് ഇളവുകൾ പ്രഖ്യാപിച്ചുകൊണ്ട് റയാൻഎയർ ഉൾപ്പെടെയുള്ള സർവീസുകൾ സാധാരണ നിലയിൽ മുന്നോട്ട് പോകുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Jet fuel shortage? No need to worry, major airlines say services are normal
