ചെന്നൈ: നെൽസൺ ദിലീപ്കുമാർ സംവിധാനം ചെയ്യുന്ന സൂപ്പർ ഹിറ്റ് ചിത്രം ‘ജയിലറി’ന്റെ രണ്ടാം ഭാഗത്തിൽ ഇന്ത്യൻ സിനിമയിലെ പ്രമുഖ താരങ്ങൾ ഒന്നിക്കുന്നതായി റിപ്പോർട്ട്. തമിഴ് സൂപ്പർ താരം രജനികാന്ത് നായകനാകുന്ന ചിത്രത്തിൽ മലയാളത്തിന്റെ സൂപ്പർ സ്റ്റാർ മോഹൻലാലിനൊപ്പം ബോളിവുഡ് താരം ഷാരൂഖ് ഖാനും പ്രധാന വേഷത്തിൽ എത്തുന്നു എന്നതാണ് പുതിയ വാർത്ത. ആദ്യ ഭാഗത്തിൽ കാമിയോ റോളിലെത്തി കൈയടി നേടിയ കന്നഡ താരം ശിവരാജ് കുമാറും രണ്ടാം ഭാഗത്തിലുണ്ടാകുമെന്ന് സൂചനകളുണ്ട്.
ചിത്രത്തിന്റെ അണിയറപ്രവർത്തകർ ഔദ്യോഗിക സ്ഥിരീകരണം നൽകിയിട്ടില്ലെങ്കിലും, ഷാരൂഖ് ഖാൻ ജയിലർ 2 വിനായി അഞ്ച് ദിവസത്തെ ഡേറ്റ് അനുവദിച്ചതായാണ് വിവരം. മോഹൻലാലിന്റെ കോസ്റ്റ്യൂം ഡിസൈനറായ ജിഷാദ് ഷംസുദ്ദീൻ സോഷ്യൽ മീഡിയയിൽ പങ്കുവെച്ച എഐ (AI) ചിത്രവും ‘കണ്ടിപ്പാ ഇരുക്കും’ എന്ന കുറിപ്പും ആരാധകർക്കിടയിൽ വലിയ ചർച്ചയായിട്ടുണ്ട്. ഷാരൂഖ് ഖാന്റെ ഭാഗങ്ങളുടെ ചിത്രീകരണം മാർച്ചിൽ ആരംഭിക്കുമെന്നും ഇതാകും സിനിമയുടെ അവസാന ഷെഡ്യൂൾ എന്നും തമിഴ് സിനിമാ ട്രാക്കർമാർ റിപ്പോർട്ട് ചെയ്യുന്നു.
നേരത്തെ നടൻ മിഥുൻ ചക്രവർത്തി ഒരു അഭിമുഖത്തിനിടെ ഷാരൂഖ് ഖാൻ ചിത്രത്തിലുണ്ടെന്ന സൂചന നൽകിയിരുന്നു. ജയിലർ ആദ്യ ഭാഗത്തിൽ മോഹൻലാൽ അവതരിപ്പിച്ച ‘മാത്യു’ എന്ന കഥാപാത്രം തിയേറ്ററുകളിൽ വലിയ തരംഗം സൃഷ്ടിച്ചിരുന്നു. പുതിയ ചിത്രത്തിൽ ഇന്ത്യൻ സിനിമയിലെ ഈ വൻതാരനിര ഒന്നിക്കുന്നതോടെ ബോക്സ് ഓഫീസിൽ പുതിയ റെക്കോർഡുകൾ പിറക്കുമെന്നാണ് സിനിമാ ലോകത്തിന്റെ പ്രതീക്ഷ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
'Jailer 2' to rock the box office; Shah Rukh Khan along with Rajinikanth and Lalettan
