കൊച്ചി : സ്റ്റേജ് പരിപാടിക്കിടെ CM വി.ഡി. സതീശന്റെ പേര് പരാമർശിച്ചതിനെച്ചൊല്ലി മിമിക്രി കലാകാരനും ഡബ്ബിംഗ് ആർട്ടിസ്റ്റുമായ മഹേഷ് കുഞ്ഞുമോനെതിരെ രൂക്ഷമായ സൈബർ ആക്രമണം. അയർലണ്ടിലെ ഒരു പരിപാടിക്കിടെ വി.ഡി. സതീശന്റെ ശബ്ദം അനുകരിക്കുന്നതിനിടയിൽ എൽ.ഇ.ഡി വാളിൽ ചിത്രം പ്രദർശിപ്പിക്കാൻ സാങ്കേതിക പ്രവർത്തകരോട് നിർദ്ദേശിച്ചതാണ് വിവാദങ്ങൾക്ക് വഴിവെച്ചത്. പേര് വിളിച്ചപ്പോൾ ‘സർ’ എന്നോ ‘മുഖ്യമന്ത്രി’ എന്നോ ചേർത്തു പറഞ്ഞില്ലെന്നാരോപിച്ചാണ് സോഷ്യൽ മീഡിയയിൽ വ്യാപകമായ അധിക്ഷേപങ്ങൾ ഉയർന്നത്.
പരിപാടിയുടെ ദൃശ്യങ്ങളിലെ ഒരു ചെറിയ ഭാഗം മാത്രം അടർത്തിമാറ്റി സോഷ്യൽ മീഡിയയിൽ പ്രചരിപ്പിച്ചതാണ് തെറ്റിദ്ധാരണയ്ക്ക് കാരണമായതെന്ന് മഹേഷ് കുഞ്ഞുമോൻ വിശദീകരിക്കുന്നു. എൽ.ഇ.ഡി വാളിൽ ചിത്രം വരാൻ വൈകിയപ്പോൾ സാങ്കേതിക ആവശ്യത്തിനായി ഫയലിന്റെ പേര് വിളിച്ചു പറയുക മാത്രമാണ് ചെയ്തത്. എന്നാൽ, ഇത് ബോധപൂർവ്വം അപമാനിച്ചതാണെന്ന് വരുത്തിത്തീർത്ത് വലിയ തോതിലുള്ള സൈബർ ആക്രമണമാണ് തനിക്ക് നേരിടേണ്ടി വന്നതെന്ന് അദ്ദേഹം വ്യക്തമാക്കി.
സംഭവത്തിൽ വിശദീകരണവുമായി മഹേഷ് നേരിട്ട് രംഗത്തെത്തി. ആരെയും വേദനിപ്പിക്കുകയോ അപമാനിക്കുകയോ എന്നത് തന്റെ ഉദ്ദേശ്യമായിരുന്നില്ലെന്നും, എല്ലാവരെയും ഒരുപോലെ ബഹുമാനിക്കുന്ന വ്യക്തിയാണ് താനെന്നും അദ്ദേഹം ഫേസ്ബുക്കിലൂടെ അറിയിച്ചു. തന്റെ പരാമർശം ആർക്കെങ്കിലും വേദനയോ വിഷമമോ ഉണ്ടാക്കിയിട്ടുണ്ടെങ്കിൽ ഹൃദയപൂർവ്വം ക്ഷമ ചോദിക്കുന്നതായും അദ്ദേഹം കുറിപ്പിൽ വ്യക്തമാക്കി.
അഭിപ്രായവ്യത്യാസങ്ങൾ എന്തുതന്നെയായാലും അവ മാന്യമായ രീതിയിൽ പ്രകടിപ്പിക്കണമെന്ന് മഹേഷ് കുഞ്ഞുമോൻ അഭ്യർത്ഥിച്ചു. വ്യക്തിപരമായ അധിക്ഷേപങ്ങളും അസഭ്യവർഷങ്ങളും ഒരാളെ മാനസികമായി ഏറെ തളർത്തുമെന്നും, സോഷ്യൽ മീഡിയയിൽ പരസ്പര ബഹുമാനവും മനുഷ്യസ്നേഹവും കാത്തുസൂക്ഷിക്കാൻ എല്ലാവരും തയ്യാറാകണമെന്നും അദ്ദേഹം ഓർമ്മിപ്പിച്ചു. തന്നെ പിന്തുണയ്ക്കുന്നവർക്ക് നന്ദി അറിയിച്ചുകൊണ്ടാണ് അദ്ദേഹം പോസ്റ്റ് അവസാനിപ്പിച്ചത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
“It’s not VD Satheesan, Kerala CM!” Social media surrounds and attacks mimicry star Mahesh Kunjumon!
