ഒട്ടാവ : വാഹനങ്ങളിലെ അമിത പ്രകാശമുള്ള ഹെഡ്ലൈറ്റുകൾ മൂലമുണ്ടാകുന്ന ബുദ്ധിമുട്ടുകളെക്കുറിച്ച് പഠിക്കാൻ ട്രാൻസ്പോർട്ട് കാനഡ പൊതുജനാഭിപ്രായം തേടുന്നു. പുതിയ സാങ്കേതികവിദ്യയിലുള്ള ഹെഡ്ലൈറ്റുകൾ ഡ്രൈവർമാർക്ക് മികച്ച കാഴ്ച നൽകുന്നുണ്ടെങ്കിലും മറ്റ് റോഡ് ഉപയോക്താക്കൾക്ക് ഇവ വലിയ പ്രതിസന്ധിയാണ് സൃഷ്ടിക്കുന്നത്. ഈ സാഹചര്യത്തിൽ, ഹെഡ്ലൈറ്റുകളിൽ നിന്നുള്ള ഗ്ലെയർ (Glare) റോഡ് യാത്രക്കാരെ എങ്ങനെ ബാധിക്കുന്നുവെന്ന് വിലയിരുത്താനാണ് വകുപ്പ് ലക്ഷ്യമിടുന്നത്.
പൊതുജനങ്ങൾക്ക് ഏപ്രിൽ 20 വരെ ഓൺലൈൻ സർവ്വേയിൽ പങ്കെടുക്കാമെന്ന് ട്രാൻസ്പോർട്ട് കാനഡ അറിയിച്ചു. ഏകദേശം 15 മിനിറ്റ് സമയം എടുക്കുന്ന അജ്ഞാത സർവ്വേയിലൂടെയാണ് വിവരങ്ങൾ ശേഖരിക്കുന്നത്. രാത്രികാല യാത്രകളിൽ ഹെഡ്ലൈറ്റ് പ്രകാശം കാഴ്ചയെ ബാധിക്കുന്നുണ്ടോ എന്നും ഇതിന് എന്തൊക്കെ പരിഹാരങ്ങളാണ് ആവശ്യമെന്നും സർവ്വേയിൽ ചോദിക്കുന്നുണ്ട്. കാൽനടയാത്രക്കാർ, സൈക്കിൾ യാത്രക്കാർ എന്നിവരുൾപ്പെടെയുള്ള എല്ലാ റോഡ് ഉപയോക്താക്കൾക്കും ഇതിൽ അഭിപ്രായം രേഖപ്പെടുത്താം.
പരമ്പരാഗത ബൾബുകൾക്ക് പകരം ആധുനിക വാഹനങ്ങളിൽ എൽഇഡി (LED), സിനോൺ (Xenon) ലൈറ്റുകൾ വ്യാപകമായി ഉപയോഗിക്കുന്നത് ഗ്ലെയർ വർദ്ധിക്കാൻ കാരണമായിട്ടുണ്ടെന്നാണ് വിലയിരുത്തൽ. പ്രീമിയം വാഹനങ്ങളിലും ആഫ്റ്റർ മാർക്കറ്റ് അപ്ഗ്രേഡുകളിലും കണ്ടുവരുന്ന ഇത്തരം ലൈറ്റുകൾക്ക് നീല കലർന്ന നിറമാണുള്ളത്. ഇത് മറ്റ് വാഹനങ്ങളിലെ ഡ്രൈവർമാരുടെ കാഴ്ചയെ തടസ്സപ്പെടുത്തുന്നതായി പരാതികളുണ്ട്. നിലവിൽ കാനഡയിലെ വാഹന നിർമ്മാണ നിയമങ്ങൾ യുഎസ് നിയന്ത്രണങ്ങളുമായി ബന്ധപ്പെട്ടു കിടക്കുന്നതാണ് ഇത്തരം പ്രശ്നങ്ങൾക്ക് കാരണമെന്ന് വിദഗ്ധർ ചൂണ്ടിക്കാട്ടുന്നു.
ഹെഡ്ലൈറ്റുകളുടെ തെളിച്ചത്തിന് വ്യക്തമായ പരിധി നിശ്ചയിക്കണമെന്ന് ആവശ്യപ്പെട്ട് ജനുവരിയിൽ വാൻകൂവർ സിറ്റി കൗൺസിൽ പ്രമേയം പാസാക്കിയിരുന്നു. ഫെഡറൽ ഗവൺമെന്റ് ഇക്കാര്യത്തിൽ അടിയന്തരമായി ഇടപെടണമെന്നാണ് കൗൺസിലിന്റെ ആവശ്യം. സർവ്വേയിലൂടെ ലഭിക്കുന്ന വിവരങ്ങൾ കൂടി പരിഗണിച്ച് വരും ദിവസങ്ങളിൽ വാഹനങ്ങളിലെ ലൈറ്റിംഗ് ഫീച്ചറുകളിൽ മാറ്റങ്ങൾ വരുത്തുന്നതിനെക്കുറിച്ച് ട്രാൻസ്പോർട്ട് കാനഡ ആലോചിച്ചേക്കുമെന്ന് റിപ്പോർട്ടുകൾ വ്യക്തമാക്കുന്നു.
Is headlight glare becoming a villain? Transport Canada seeks public opinion
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
