ടെഹ്റാൻ: മധ്യപൂർവേഷ്യയിൽ യുദ്ധസമാനമായ സാഹചര്യം തുടരുന്നതിനിടെ ഇറാനിലെ പ്രധാന നഗരങ്ങളിൽ അമേരിക്കയും ഇസ്രയേലും സംയുക്തമായി ശക്തമായ ആക്രമണം നടത്തി. ഇസ്ഫഹാൻ പ്രവിശ്യയിലെ വിവിധയിടങ്ങളിൽ നടന്ന മിസൈൽ വർഷത്തിൽ പതിനഞ്ച് പേർ കൊല്ലപ്പെട്ടതായാണ് പ്രാഥമിക റിപ്പോർട്ടുകൾ. മേഖലയിലെ അമേരിക്കൻ സാന്നിധ്യം സമാധാനത്തിന് തടസ്സമാണെന്നും അയൽരാജ്യങ്ങൾ തങ്ങളുടെ മണ്ണിലെ യുഎസ് സൈനിക താവളങ്ങൾ എത്രയും വേഗം അടച്ചുപൂട്ടണമെന്നും ഇറാൻ വിദേശകാര്യ മന്ത്രി വീണ്ടും ആവശ്യപ്പെട്ടു.
അതിനിടെ, സംഘർഷം അയൽരാജ്യങ്ങളിലേക്കും വ്യാപിക്കുന്നതിന്റെ സൂചനയായി കുവൈത്ത് അന്താരാഷ്ട്ര വിമാനത്താവളത്തിന് നേരെ ഡ്രോൺ ആക്രമണമുണ്ടായി. വിമാനത്താവളത്തിലെ റഡാർ സംവിധാനങ്ങളെ ലക്ഷ്യം വെച്ചായിരുന്നു ആക്രമണമെങ്കിലും ആർക്കും പരിക്കേറ്റതായി റിപ്പോർട്ടുകളില്ല. ഇതേസമയം യുഎഇയിലെ ഫുജൈറ ഓയിൽ ഇൻഡസ്ട്രി സോണിലുണ്ടായ ഡ്രോൺ ആക്രമണത്തിൽ ഒരു ജോർദാൻ സ്വദേശിക്ക് പരിക്കേറ്റു. നിലവിലെ സാഹചര്യം കണക്കിലെടുത്ത് സൗദി അറേബ്യയിലെ അൽ ഖർജിൽ ജനങ്ങൾക്ക് ജാഗ്രതാ നിർദ്ദേശം നൽകിയിട്ടുണ്ട്.
ലെബനനിലും ഇസ്രയേൽ സൈനിക നടപടി അതിശക്തമായി തുടരുകയാണ്. റിപ്പോർട്ടുകൾ പ്രകാരം ലെബനനിൽ ഇതുവരെ മരിച്ചവരുടെ എണ്ണം 826 ആയി ഉയർന്നു. ഇറാഖിലെ സ്ഥിതിഗതികൾ വഷളായതിനെ തുടർന്ന് അവിടെയുള്ള തങ്ങളുടെ പൗരന്മാരോട് ഉടൻ രാജ്യം വിടാൻ അമേരിക്ക നിർദ്ദേശം നൽകി. ഹോർമൂസ് കടലിടുക്കിലെ ഗതാഗതം സുഗമമാക്കാൻ ലോകരാജ്യങ്ങൾ അടിയന്തരമായി ഇടപെടണമെന്ന് ഡൊണാൾഡ് ട്രംപ് ആവശ്യപ്പെട്ടു.
ഇറാനുമായുള്ള ഏറ്റുമുട്ടൽ ദീർഘകാലം നീണ്ടുനിൽക്കുമെന്ന സൂചനയാണ് ഇസ്രയേൽ സൈന്യം നൽകുന്നത്. വരും മാസങ്ങളിലും ആക്രമണം തുടരാൻ പദ്ധതിയുണ്ടെന്നും ഏപ്രിൽ വരെ നീളുന്ന കൃത്യമായ സൈനിക പ്ലാൻ തയ്യാറാക്കിയിട്ടുണ്ടെന്നും ഇസ്രയേൽ സൈനിക മേധാവി വ്യക്തമാക്കി. മേഖലയിൽ സമാധാനം പുനഃസ്ഥാപിക്കാനുള്ള നയതന്ത്ര നീക്കങ്ങൾ പരാജയപ്പെടുന്ന കാഴ്ചയാണ് നിലവിൽ ദൃശ്യമാകുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Iran-Israel conflict; Attack on Kuwait airport; No one injured, report
