ഒട്ടാവ: കാനഡയിലെ വാർഷിക പണപ്പെരുപ്പ നിരക്ക് ഡിസംബറിൽ 2.4 ശതമാനമായി ഉയർന്നതായി സ്റ്റാറ്റിസ്റ്റിക്സ് കാനഡ തിങ്കളാഴ്ച അറിയിച്ചു. മുൻവർഷം ഇതേ കാലയളവിൽ കേന്ദ്രസർക്കാർ നടപ്പിലാക്കിയ ജിഎസ്ടി ഇളവുകൾ അവസാനിച്ചതാണ് നിരക്ക് വർദ്ധിക്കാൻ പ്രധാന കാരണമായി വിലയിരുത്തപ്പെടുന്നത്. നവംബറിൽ 2.2 ശതമാനമായിരുന്ന പണപ്പെരുപ്പമാണ് ഡിസംബറിൽ നേരിയ തോതിൽ വർദ്ധിച്ചത്.
2024 ഡിസംബർ 14-ന് ആരംഭിച്ച താൽക്കാലിക നികുതി ഇളവ് രണ്ട് മാസത്തേക്കായിരുന്നു നടപ്പിലാക്കിയിരുന്നത്. ഇതിലൂടെ വിപണിയിൽ ചില ഉൽപ്പന്നങ്ങളുടെ വില കുറഞ്ഞത് കഴിഞ്ഞ വർഷത്തെ പണപ്പെരുപ്പ കണക്കുകളെ സ്വാധീനിച്ചിരുന്നു. എന്നാൽ ഇത്തവണ ഇന്ധനവിലയിലുണ്ടായ കുറവ് പണപ്പെരുപ്പത്തിന്റെ ആഘാതം ഒരു പരിധിവരെ കുറയ്ക്കാൻ സഹായിച്ചതായും റിപ്പോർട്ടിൽ പറയുന്നു. ഇന്ധനവില ഒഴിവാക്കിയാൽ ഡിസംബറിലെ പണപ്പെരുപ്പ നിരക്ക് മൂന്ന് ശതമാനമായാണ് രേഖപ്പെടുത്തിയിരിക്കുന്നത്.
ഭക്ഷ്യവസ്തുക്കളുടെ വിലയിൽ നവംബറിനെ അപേക്ഷിച്ച് മാറ്റമൊന്നും ഉണ്ടായിട്ടില്ലെങ്കിലും മുൻവർഷത്തെ അപേക്ഷിച്ച് അഞ്ച് ശതമാനം വർദ്ധനവ് രേഖപ്പെടുത്തി. കാപ്പി, ഫ്രഷ് അല്ലെങ്കിൽ ഫ്രോസൺ ബീഫ് എന്നിവയുടെ വിലയിലുണ്ടായ വർദ്ധനവാണ് ഇതിന് കാരണമായി ചൂണ്ടിക്കാണിക്കുന്നത്. പണപ്പെരുപ്പ നിരക്കിലെ ഈ മാറ്റങ്ങൾ വരും മാസങ്ങളിലെ സാമ്പത്തിക നയങ്ങളെ സ്വാധീനിക്കുമെന്ന് വിദഗ്ധർ വിലയിരുത്തുന്നു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Inflation rate rises in Canada; rises to 2.4 per cent in December, Statistics Canada reports
