അമേരിക്കയിൽ കഴിഞ്ഞ അഞ്ച് ദിവസമായി കാണാതായ ഇന്ത്യൻ വംശജരായ നാല് മുതിർന്ന പൗരന്മാരെ ഞായറാഴ്ച കാർ അപകടത്തിൽ മരിച്ച നിലയിൽ കണ്ടെത്തി. ആശാ ദിവാൻ (85), കിഷോർ ദിവാൻ (89), ശൈലേഷ് ദിവാൻ (86), ഗീതാ ദിവാൻ (84) എന്നിവരാണ് മരിച്ചത്. ജൂലൈ 29-ന് പെൻസിൽവാനിയയിലെ പീച്ച് സ്ട്രീറ്റിലുള്ള ബർഗർ കിംഗ് ഔട്ട്ലെറ്റിലാണ് ഇവരെ അവസാനമായി കണ്ടത്. ഇവരെ കണ്ടെത്താനായി നടത്തിയ തിരച്ചിലിൽ, ഈ ബർഗർ കടയിലെ നിരീക്ഷണ ക്യാമറകളിൽ നാലംഗ സംഘത്തിലെ രണ്ടുപേർ റെസ്റ്റോറന്റിലേക്ക് കയറുന്ന ദൃശ്യങ്ങൾ പതിഞ്ഞിരുന്നു. ഇവരുടെ അവസാനത്തെ ക്രെഡിറ്റ് കാർഡ് ഇടപാടും ഇതേ സ്ഥലത്താണ് നടന്നതെന്നും കണ്ടെത്തിയിരുന്നു
മാർഷൽ കൗണ്ടി ഷെരീഫ് പുറത്തുവിട്ട പ്രസ്താവന പ്രകാരം, ഇവർ സഞ്ചരിച്ചിരുന്ന ഇളം പച്ച നിറത്തിലുള്ള ടൊയോട്ട കാംറി, ബിഗ് വീലിംഗ് ക്രീക്ക് റോഡിൽ അപകടത്തിൽപ്പെട്ട നിലയിലാണ് കണ്ടെത്തിയത്. അപകടം നടന്ന സ്ഥലം ഏറെ ഉൾപ്രദേശത്തായതിനാൽ രക്ഷാപ്രവർത്തകർക്ക് സ്ഥലത്തെത്താൻ അഞ്ച് മണിക്കൂറിലേറെ സമയമെടുത്തു.
സംഭവത്തിൽ ദുരൂഹതയുണ്ടോ എന്ന് അന്വേഷിക്കുമെന്ന് പൊലീസ് വ്യക്തമാക്കി. മാർഷൽ കൗണ്ടിയിലെ ‘പാലസ് ഓഫ് ഗോൾഡ്’ എന്ന ആരാധനാലയത്തിലേക്കുള്ള യാത്രയിലായിരുന്നു ഇവരെന്നാണ് പ്രാഥമിക വിവരം. ഇസ്കോൺ സ്ഥാപകനായ സ്വാമി പ്രഭുപാദ സ്ഥാപിച്ച ആരാധനാ കേന്ദ്രമാണിത്. ന്യൂയോർക്ക് രജിസ്ട്രേഷനിലുള്ള വാഹനത്തിലാണ് ഇവർ യാത്ര ചെയ്തിരുന്നത്. ജൂലൈ 29-ന് പാലസ് ഓഫ് ഗോൾഡിൽ എത്തേണ്ടിയിരുന്ന ഈ വയോധികർ അവിടെ എത്തിയിരുന്നില്ല. കഴിഞ്ഞ നാല് ദിവസമായി ഹെലികോപ്റ്ററുകൾ ഉൾപ്പെടെ ഉപയോഗിച്ചാണ് ഇവർക്കായി തിരച്ചിൽ നടത്തിയത്.
Four missing Indian senior citizens found dead after car crash in US
