ഒൻ്റാറിയോ: ഒൻ്റാറിയോയിൽ ഇന്ത്യൻ വംശജയായ സോഷ്യൽ മീഡിയ ഇൻഫ്ലുവൻസറും യൂട്യൂബറുമായ നാൻസി ഗ്രെവാൾ (45) കുത്തേറ്റു മരിച്ചു. ഒൻ്റാറിയോയിലെ വിൻഡ്സറിന് അടുത്തുള്ള ലാസാലെയിൽ മാർച്ച് 3-ന് രാത്രിയാണ് സംഭവം നടന്നത്. ഗുരുതരമായി പരിക്കേറ്റ നാൻസിയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ചൊവ്വാഴ്ച രാത്രി 9:30-ഓടെയാണ് ഒരു സ്ത്രീക്ക് കുത്തേറ്റതായി ലാസാലെ പൊലീസിന് വിവരം ലഭിക്കുന്നത്. സംഭവസ്ഥലത്തെത്തിയ ഉദ്യോഗസ്ഥർ നാൻസിയെ രക്തത്തിൽ കുളിച്ച നിലയിൽ കണ്ടെത്തുകയായിരുന്നു. നാൻസിയുടെ മരണം യാദൃശ്ചികമായി നടന്ന ഒന്നല്ലെന്നും ബോധപൂർവ്വം ലക്ഷ്യം വെച്ച് നടത്തിയ ആക്രമണമാണെന്നും (Targeted Attack) പ്രാഥമിക അന്വേഷണത്തിന് ശേഷം പൊലീസ് സ്ഥിരീകരിച്ചിട്ടുണ്ട്.
പഞ്ചാബ് രാഷ്ട്രീയം, ഖാലിസ്ഥാൻ വിരുദ്ധ നിലപാടുകൾ, ഇന്ത്യ-കാനഡ ബന്ധം എന്നിവയെക്കുറിച്ച് നാൻസി തന്റെ സോഷ്യൽ മീഡിയ അക്കൗണ്ടുകളിലൂടെ നിരന്തരം സംസാരിക്കാറുണ്ടായിരുന്നു. ഇതിന്റെ പേരിൽ അവർക്ക് നേരത്തെ തന്നെ നിരവധി വധഭീഷണികൾ ലഭിച്ചിരുന്നതായി ജലന്ധറിലുള്ള നാൻസിയുടെ മാതാവ് ഷിന്ദർപാൽ കൗർ പറഞ്ഞു. കുറച്ചു മാസങ്ങൾക്ക് മുമ്പ് നാൻസിയുടെ വീടിന് തീയിടാൻ ശ്രമം നടന്നതായും അവർ വെളിപ്പെടുത്തി. നാൻസിയുടെ മരണത്തിന് പിന്നിൽ വലിയ ഗൂഢാലോചനയുണ്ടെന്നും കുറ്റവാളികളെ ഉടൻ പിടികൂടണമെന്നും കുടുംബം അധികൃതരോട് ആവശ്യപ്പെട്ടു.
ആരാണ് നാൻസി ഗ്രെവാൾ?
ലുധിയാന സ്വദേശിയായ നാൻസി 2018-ലാണ് കാനഡയിലേക്ക് കുടിയേറിയത്. അവിടെ നഴ്സായി ജോലി ചെയ്യുന്നതിനൊപ്പം തന്നെ ‘Nancy Grewal Canada CA’ എന്ന യൂട്യൂബ് ചാനലിലൂടെയും മറ്റ് സോഷ്യൽ മീഡിയ പ്ലാറ്റ്ഫോമുകളിലൂടെയും രാഷ്ട്രീയ-സാമൂഹിക വിഷയങ്ങളിൽ തന്റെ നിലപാടുകൾ വ്യക്തമാക്കിയിരുന്നു. ഖാലിസ്ഥാൻ തീവ്രവാദത്തെ പരസ്യമായി എതിർത്തിരുന്ന അവർക്ക് വലിയൊരു വിഭാഗം ഫോളോവേഴ്സ് ഉണ്ടായിരുന്നു. ഈ കൊലപാതകവുമായി ബന്ധപ്പെട്ട് ഇതുവരെ ആരെയും അറസ്റ്റ് ചെയ്തിട്ടില്ല. സംഭവസ്ഥലത്തെ സിസിടിവി ദൃശ്യങ്ങൾ ശേഖരിച്ചും കൂടുതൽ സാക്ഷികളെ മൊഴിയെടുത്തും അന്വേഷണം ഊർജിതമാക്കിയിരിക്കുകയാണ് ലാസാലെ പൊലീസ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Indian-origin social media influencer Nancy Grewal stabbed to death in Ontario
