ഒട്ടാവ: വിദേശത്ത് പോകുമ്പോൾ അവിടുത്തെ വ്യത്യസ്തമായ കാഴ്ചകൾ കാണാമെന്ന് കരുതിയാകും പലരും വിമാനം കയറുന്നത്. എന്നാൽ കാനഡയിലെത്തിയ ഒരു ഇന്ത്യൻ യുവാവിന് ലഭിച്ച അനുഭവം അല്പം വ്യത്യസ്തമാണ്. കാനഡയിലെ ബ്രാംപ്ടണിലുള്ള ഒരു തിരക്കേറിയ ഷോപ്പിംഗ് മാളിൽ എത്തിയ ഇൻസ്റ്റാഗ്രാം ഇൻഫ്ലുവൻസറായ ശിവ് സ്വരൂപ് പങ്കുവെച്ച വീഡിയോ ആണ് ഇപ്പോളത്തെ ചർച്ചാ വിഷയം. ഇത് ഡൽഹിയിലെ സുഭാഷ് നഗറിലുള്ള ‘പസഫിക് മാൾ’ പോലെയുണ്ടെന്നാണ് യുവാവ് പറയുന്നത്.
ഒന്റാറിയോയിലുള്ള ബ്രാംപ്ടണിലെ ഒരു മാളിൽ നിന്നാണ് ഇദ്ദേഹം ഈ രസകരമായ വീഡിയോ പകർത്തിയത്. മാളിലെ വലിയ ജനക്കൂട്ടത്തെയും അവിടെയുള്ള ഇന്ത്യക്കാരുടെ എണ്ണത്തെയും നോക്കുമ്പോൾ താൻ കാനഡയിലാണോ അതോ ഡൽഹിയിലാണോ നിൽക്കുന്നതെന്ന് തോന്നിപ്പോകുന്നുവെന്ന് ശിവ് തമാശയായി പറയുന്നുണ്ട്. “കാനഡയിൽ വന്നാൽ എല്ലാം വ്യത്യസ്തമായിരിക്കുമെന്ന് കരുതി, പക്ഷേ ഈ കാഴ്ച എന്നെ പസഫിക് മാളിനെ ഓർമ്മിപ്പിച്ചു” എന്ന അടിക്കുറിപ്പോടെയാണ് അദ്ദേഹം വീഡിയോ സോഷ്യൽ മീഡിയയിൽ പോസ്റ്റ് ചെയ്തത്.
വീഡിയോ നിമിഷങ്ങൾക്കകം വൈറലായതോടെ നിരവധി പേരാണ് കമന്റുകളുമായി രംഗത്തെത്തിയത്. ഇത് കാനഡയല്ലെന്നും ‘മിനി ഇന്ത്യ’ ആണെന്നുമാണ് ഭൂരിഭാഗം ആളുകളുടെയും അഭിപ്രായം. കാനഡയിൽ ഏറ്റവും കൂടുതൽ ഇന്ത്യൻ വംശജർ താമസിക്കുന്ന നഗരങ്ങളിൽ ഒന്നാണ് ബ്രാംപ്ടൺ എന്നതുകൊണ്ട് തന്നെ അവിടുത്തെ മാളുകളിലും തെരുവുകളിലും ഇന്ത്യക്കാരെ കാണുന്നത് ഇപ്പോൾ ഒരു സാധാരണ കാഴ്ചയായി മാറിയിരിക്കുകയാണ്. തനിക്കും ഇതേ അനുഭവം ഉണ്ടായിട്ടുണ്ടെന്ന് പറഞ്ഞ് നിരവധി ആളുകൾ വീഡിയോയ്ക്ക് താഴെ പ്രതികരണങ്ങൾ രേഖപ്പെടുത്തുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Indian Man Jokes Canada Mall Feels Like Delhi’s Mall
