ഒട്ടാവ: ഉപരിപഠനത്തിനും ജോലിക്കുമായി കാനഡയിലേക്ക് ചേക്കേറുന്ന ഇന്ത്യക്കാരുടെ എണ്ണം വർധിച്ചുവരുന്ന പശ്ചാത്തലത്തിൽ, വിദേശപഠനത്തിന്റെ യഥാർത്ഥ സാമ്പത്തിക സ്ഥിതി വ്യക്തമാക്കുന്ന ഒരു സോഷ്യൽ മീഡിയ പോസ്റ്റ് വലിയ ചർച്ചയാവുകയാണ്. സാമ്പത്തിക ഉപദേശകനായ ഹർഷ് ഗുപ്തയാണ് ഇൻസ്റ്റഗ്രാമിലൂടെ ഈ സംഭവം പങ്കുവെച്ചത്. മകന് കാനഡയിൽ മാസ്റ്റർ ഓഫ് സയൻസ് പഠനത്തിനായി 15 വർഷത്തോളം കഷ്ടപ്പെട്ട് സമ്പാദിച്ച 50 ലക്ഷം രൂപയുടെ ഫിക്സഡ് ഡെപ്പോസിറ്റാണ് ഒരു കുടുംബം പിൻവലിച്ചത്.
പഠനത്തിനുശേഷം ടൊറന്റോയിൽ പ്രതിവർഷം 55,000 കനേഡിയൻ ഡോളർ, അതായത് ഏകദേശം 33 മുതൽ 35 ലക്ഷം രൂപ വരെ ശമ്പളമുള്ള ജോലി മകന് ലഭിച്ചു. എന്നാൽ ഉയർന്ന വീട്ടുവാടക, കനത്ത നികുതി, മറ്റ് ഉയർന്ന ജീവിതച്ചെലവുകൾ എന്നിവ കാരണം ഇന്ത്യയിലെ ഒരു ഇടത്തരം നഗരത്തിൽ ജോലി ചെയ്താൽ ലഭിക്കുന്ന സമ്പാദ്യത്തേക്കാൾ കുറഞ്ഞ തുക മാത്രമേ മകന് മാസം തോറും മിച്ചം പിടിക്കാൻ കഴിയുന്നുള്ളൂ.
50 ലക്ഷം രൂപ ഇന്ത്യയിൽ തന്നെ നിക്ഷേപിച്ചിരുന്നെങ്കിൽ ലഭിക്കുമായിരുന്ന വലിയ ലാഭത്തെക്കുറിച്ചും സാമ്പത്തിക ഭദ്രതയെക്കുറിച്ചും പലരും ചിന്തിക്കുന്നില്ലെന്ന് ഹർഷ് ഗുപ്ത ഓർമ്മിപ്പിക്കുന്നു. വിദേശ ബിരുദങ്ങൾ പലപ്പോഴും വലിയ സാമ്പത്തിക സ്വാതന്ത്ര്യമായി ചിത്രീകരിക്കപ്പെടുന്നുണ്ടെങ്കിലും യാഥാർഥ്യം മറിച്ചാകാമെന്നും അദ്ദേഹം ചൂണ്ടിക്കാട്ടുന്നു.
ഈ പോസ്റ്റ് പുറത്തുവന്നതോടെ സോഷ്യൽ മീഡിയയിൽ വലിയ പ്രതികരണങ്ങളാണ് ഉയർന്നുവരുന്നത്. വിദേശത്ത് പോകുന്നതിന് മുമ്പ് യാഥാർഥ്യങ്ങൾ മനസ്സിലാക്കി കൃത്യമായ സാമ്പത്തിക ആസൂത്രണം നടത്തണമെന്ന് ഭൂരിഭാഗം ആളുകളും അഭിപ്രായപ്പെടുന്നു. നിലവിൽ കാനഡയിലുള്ള പലരും ഉയർന്ന ജീവിതച്ചെലവും കഠിനമായ തണുപ്പുകാലത്തെ മാനസിക ബുദ്ധിമുട്ടുകളും പങ്കുവെച്ചുകൊണ്ട് ഈ പോസ്റ്റിനെ പിന്തുണച്ചപ്പോൾ, യാതൊരു മുൻകരുതലുമില്ലാതെ ഇത്തരം വലിയ സാമ്പത്തിക തീരുമാനങ്ങൾ എടുക്കുന്നതിനെ മറ്റ് ചിലർ വിമർശിക്കുകയും ചെയ്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
