ഇന്ത്യൻ ക്രിക്കറ്റിന്റെ സുവർണകാലഘട്ടത്തിന്റെ അവസാനത്തോടെ പുതിയ യുഗത്തിലേക്കുള്ള കടന്നുകയറ്റത്തിന് തുടക്കമാകുന്നു. രോഹിത് ശർമ, വിരാട് കോഹ്ലി എന്നീ ഇതിഹാസങ്ങളുടെ വിരമിക്കലിനു ശേഷമുള്ള ആദ്യ പ്രധാന പരമ്പരയായ ഇന്ത്യ-ഇംഗ്ലണ്ട് അഞ്ചു മത്സര ടെസ്റ്റ് പരമ്പരയ്ക്ക് നാളെ തുടക്കമാകും. ശുഭ്മാൻ ഗില്ലിന്റെ നേതൃത്വത്തിൽ യുവരക്തത്തിന്റെ ഊർജത്തോടെയാണ് ഇന്ത്യൻ ടീം ഈ വെല്ലുവിളി നേരിടാൻ ഒരുങ്ങുന്നത്.
ഇന്ത്യയുടെ ഭാവി താരമായി കരുതപ്പെടുന്ന ശുഭ്മാൻ ഗില്ലിനെ സംബന്ധിച്ചിടത്തോളം ഇത് ഇരട്ടി വെല്ലുവിളിയാണ്. ഒരു വശത്ത് പുതിയ ടീമിന്റെ നേതൃത്വ പരീക്ഷയും മറുവശത്ത് വ്യക്തിഗത പ്രകടനത്തിലൂടെ സ്വയം തെളിയിക്കേണ്ട ആവശ്യകതയും. ഇന്ത്യയിലെ ടെസ്റ്റുകളിൽ 42.03 എന്ന മികച്ച ബാറ്റിംഗ് ശരാശരിയുണ്ടെങ്കിലും, വിദേശത്ത് 27.53 എന്ന നിരാശാജനകമായ ശരാശരിയാണ് അദ്ദേഹത്തിനുള്ളത്. പ്രത്യേകിച്ച് ഇംഗ്ലണ്ടിലെ കഴിഞ്ഞ പര്യടനത്തിൽ അദ്ദേഹത്തിന്റെ പ്രകടനം വളരെ നിരാശാജനകമായിരുന്നു.
സമീപകാല പരാജയങ്ങൾ ഇന്ത്യൻ ക്രിക്കറ്റിനെ കൂടുതൽ വെല്ലുവിളിയിലാക്കിയിരിക്കുന്നു. ഓസ്ട്രേലിയക്കെതിരായ ബോർഡർ ഗാവസ്കർ ട്രോഫിയും ന്യൂസിലാൻഡിനെതിരായ പരമ്പരയും പരാജയത്തിൽ അവസാനിച്ചതോടെ ലോക ടെസ്റ്റ് ചാംപ്യൻഷിപ്പ് ഫൈനലിലേക്കുള്ള യോഗ്യത നഷ്ടമായി. ഈ പശ്ചാത്തലത്തിൽ പുതിയ ടെസ്റ്റ് ചാംപ്യൻഷിപ്പ് സൈക്കിളിൽ വിജയകരമായ തുടക്കം കുറിക്കുകയെന്നതാണ് ഇന്ത്യയുടെ പ്രധാന ലക്ഷ്യം. അനുഭവസമ്പന്നരായ മുതിർന്ന കളിക്കാരുടെ അഭാവത്തിൽ യുവതാരങ്ങളുടെ കഴിവും ദൃഢനിശ്ചയും പരീക്ഷിക്കപ്പെടുന്ന ഈ പരമ്പര ഇന്ത്യൻ ക്രിക്കറ്റിന്റെ പുതിയ അധ്യായത്തിന്റെ സൂചനയായിരിക്കും.
