ന്യൂഡൽഹി: ഇന്ത്യയും കാനഡയും തമ്മിലുള്ള സമഗ്ര സാമ്പത്തിക പങ്കാളിത്ത കരാർ (CEPA) യാഥാർത്ഥ്യമാക്കുന്നതിനായി, ഇരുരാജ്യങ്ങൾക്കും വിയോജിപ്പുള്ളതും തർക്കങ്ങൾക്കിടയാക്കിയേക്കാവുന്നതുമായ സെൻസിറ്റീവ് മേഖലകളെ ചർച്ചകളിൽ നിന്ന് തത്കാലം ഒഴിവാക്കാൻ തീരുമാനം. ഇരുരാജ്യങ്ങൾക്കും എളുപ്പത്തിൽ യോജിപ്പിലെത്താൻ സാധിക്കുന്ന മേഖലകൾക്ക് മുൻഗണന നൽകി ചർച്ചകൾ വേഗത്തിലാക്കുമെന്ന് കേന്ദ്ര വാണിജ്യ-വ്യവസായ മന്ത്രി പീയൂഷ് ഗോയൽ അറിയിച്ചു. കാനഡ സന്ദർശനത്തിനിടെ ഒന്റാറിയോ സെന്റർ ഓഫ് ഇന്നൊവേഷനിൽ സംസാരിക്കവെയാണ് മന്ത്രി ഇക്കാര്യം വ്യക്തമാക്കിയത്. നിലവിൽ കരാറുമായി ബന്ധപ്പെട്ട മൂന്നാം ഘട്ട ചർച്ചകൾ കാനഡയിലെ ഓട്ടവയിൽ പുരോഗമിക്കുകയാണ്.
ഇന്ത്യക്ക് കൃഷി, ഡയറി ഫാം തുടങ്ങിയ മേഖലകളിൽ വിദേശ വിപണിക്ക് അനുമതി നൽകുന്നതിൽ കൃത്യമായ നിയന്ത്രണങ്ങളുണ്ട്. അതുപോലെ കാനഡയ്ക്കും വിയോജിപ്പുള്ള പ്രത്യേക മേഖലകൾ ഉണ്ടാകാം. ഇത്തരം തർക്കവിഷയങ്ങളിൽ പരസ്പരം നിർബന്ധം പിടിക്കാതെ, യോജിക്കാൻ കഴിയുന്ന മേഖലകളിൽ ശ്രദ്ധ കേന്ദ്രീകരിക്കാനാണ് ഇരുരാജ്യങ്ങളും തീരുമാനിച്ചിരിക്കുന്നത്. ഈ വർഷാവസാനത്തോടെ കരാർ പൂർത്തിയാക്കാനാണ് ലക്ഷ്യമിടുന്നത്. നിലവിലുള്ള 17 ബില്യൺ ഡോളറിന്റെ ഉഭയകക്ഷി വ്യാപാരം 2030-ഓടെ 50 ബില്യൺ ഡോളറായി ഉയർത്തുകയാണ് പ്രധാന ലക്ഷ്യം.
കാനഡയിലെ പ്രമുഖ പെൻഷൻ ഫണ്ടുകളായ ഒന്റാറിയോ ടീച്ചേഴ്സ് പെൻഷൻ പ്ലാൻ, സി.പി.പി ഇൻവെസ്റ്റ്മെന്റ്സ് എന്നിവയുടെ മേധാവികളുമായി പീയൂഷ് ഗോയൽ കൂടിക്കാഴ്ച നടത്തി. ഇന്ത്യയിലെ അടിസ്ഥാന സൗകര്യ വികസനം, പുനരുപയോഗ ഊർജം, ഡിജിറ്റൽ ഇൻഫ്രാസ്ട്രക്ചർ, ലോജിസ്റ്റിക്സ് എന്നീ മേഖലകളിൽ കൂടുതൽ നിക്ഷേപം നടത്താൻ അദ്ദേഹം ആഹ്വാനം ചെയ്തു.
ഇന്ത്യയിൽ ബൗദ്ധിക സ്വത്തവകാശം കൃത്യമായി സംരക്ഷിക്കപ്പെടുന്നുണ്ടെന്ന് മന്ത്രി ഓർമ്മിപ്പിച്ചു. ലോകത്തിലെ തന്നെ ഏറ്റവും വലിയ മൂന്നാമത്തെ സ്റ്റാർട്ടപ്പ് ഇക്കോസിസ്റ്റം ഇന്ത്യയിലാണുള്ളത്. ആർട്ടിഫിഷ്യൽ ഇന്റലിജൻസ്, ക്ലീൻ ടെക്നോളജി, അഗ്രിടെക്, ഡീപ് ടെക്, ഡിജിറ്റൽ പബ്ലിക് ഇൻഫ്രാസ്ട്രക്ചർ തുടങ്ങിയ പുതുതലമുറ സാങ്കേതികവിദ്യകളിൽ ഇരുരാജ്യങ്ങൾക്കും ഒന്നിച്ച് പ്രവർത്തിക്കാൻ വലിയ സാധ്യതകളുണ്ടെന്ന് അദ്ദേഹം ചൂണ്ടിക്കാട്ടി. ഈ സൗജന്യ വ്യാപാര കരാർ യാഥാർത്ഥ്യമാകുന്നതോടെ ഇരുരാജ്യങ്ങളും തമ്മിലുള്ള ഇറക്കുമതി തീരുവ ഗണ്യമായി കുറയുകയും സേവന മേഖലയിലും നിക്ഷേപങ്ങളിലും വലിയ മുന്നേറ്റം ഉണ്ടാവുകയും ചെയ്യും.
India, Canada to avoid sensitive sectors in trade pact talks
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
